25/03/2026
Fibrotåke, hjernetåke – kjært barn har mange namn!
For mange med fibromyalgi er hjernetåke ein del av kvardagen – men det er ikkje alltid så lett å forstå, verken for ein sjølv eller andre.
Det startar ofte snikande. Du gløymer små ting, mistar tråden i samtalar, eller leitar etter ord du eigentleg kan. Først tenkjer du kanskje at du berre er sliten. Men når det held fram, er det lett å bli uroa – og nokre kan til og med tenkje: “Held eg på å bli dement?”
Hjernetåke er ikkje demens. Det er ein tilstand der hjernen jobbar under belastning. Forsking tyder på at det heng saman med mellom anna smerter, dårleg søvn og eit nervesystem i konstant beredskap. Resultatet er at konsentrasjon, minne og tempo blir påverka. Det kan kjennast som om hovudet går i sirup.
🍋💜🍋💜🍋💜🍋💜🍋
Så kjem desse små kvardagsaugeblikka som er heilt utrulege og fantastiske på same tid. Dagens vesle kvardagseventyr kjem frå eitt av våre medlemmer. Historia er ingen aprilspøk, men eit heilt reelt innblikk i korleis fibrotåke kan utarte seg i dagleglivet:
- Eg skulle teste ut ei ny oppskrift på sitronkake. Følgde oppskrifta til punkt og prikke, brukte stormiksaren. Men - vispen fekk ikkje heilt tak i røra - smøret og sukkeret ville liksom ikkje samarbeide og bli fløffy slik oppskrifta sa…
Løysingsorientert som eg er, så tenkte eg: “Jaja, eg får finne fram handmiksaren då!”
Så eg gjorde. Fann han fram, plugga i støpselet og skulle til å feste vispane…
…og der står eg altså med STRYKEJERNET i handa!
🫣💜😅💜😄💜😆💜😂
Ja – det er lov å le 😄
For sjølv om det kan vere både frustrerande og litt skremmande å stå i det, så kan kvardagen bli litt lettare om ein ser humoren i det.
For bak latteren ligg det noko ekte. Ein kvardag som krev ekstra tolmod, forståing – både frå oss sjølve og dei rundt oss – og ikkje minst god sjølvomsorg krydra med ein herleg dose humor.
Fleire som kjenner seg att? Del gjerne ei god historie med oss andre i kommentarfeltet 💜
