10/07/2025
म विद्यार्थी जीवनमा रहँदा, मेरा गुरुहरूले पढाइ मात्र होइन, जीवन जिउने कला, धैर्यता, अनुशासन र परिश्रमको महत्व सिकाउनुभयो। खासगरी मेरो मेडिकल र मनोचिकित्सा प्रशिक्षणका दिनहरूमा मैले गुरुहरूसँगको अनुभवबाट बुझें कि ज्ञान भनेको किताबी कुरा मात्र होइन — अनुभव, व्यवहार, र सहानुभूतिको संगालो हो।
आज म स्वयं एक शिक्षक, गुरु र मार्गदर्शकको भूमिकामा छु। विगतमा गुरुबाट पाएको ज्ञान र संस्कारलाई आफ्ना विद्यार्थीहरूमा हस्तान्तरण गर्ने जिम्मेवारीमा छु। म बुझ्छु — ज्ञान सधैं दिन सकिन्छ, तर प्रेरणा र दृष्टिकोण दिनु अझ ठूलो कुरा हो।
विद्यार्थी रहँदा जुन सम्मान र भरोसा मैले आफ्ना गुरुप्रति राखें, आज आफ्ना विद्यार्थीहरूले पनि मलाई त्यो दृष्टिकोणले हेरेका छन् भन्ने महसुस हुँदा गर्व लाग्छ। जब विद्यार्थीहरू मलाई सर/गुरु भनेर बोलाउँछन्, त्यो केवल सम्बोधन मात्र नभई एक जिम्मेवारी हो।
गुरुपूर्णिमाको दिन, म मेरा सबै गुरुहरूप्रति श्रद्धा व्यक्त गर्न चाहन्छु। उहाँहरूको मार्गदर्शन र शिक्षा विना म आज जहाँ छु, त्यहाँ पुग्न सक्दिनथें। साथै, म आफू पनि गुरु भएर विद्यार्थीहरूलाई जीवनमा आत्मनिर्भर, संवेदनशील र सहिष्णु बनाउने प्रेरणा दिन सकूँ भन्ने कामना गर्दछु।
शिक्षा र गुरु सधैं मार्गदर्शक हुन्। जति अगाडि बढे पनि, जीवनभर विद्यार्थी भइ रहने भावना नै असल गुरुलाई सच्चा आदर हो।
गुरुपूर्णिमाको शुभकामना।
