22/01/2026
२०८२ माघ ८: नेपाल नेत्रहीन संघको ३३औँ स्थापना दिवसको अवसरमा विभिन्न कार्यक्रमहरू आयोजना गरिएको थियो। यस अवसरमा “कोसेली घर” समुद्घाटन गरिएको थियो, जहाँ दृस्टी सम्बन्धि अपांगता र अन्य अपांगता भएका व्यक्तिहरूद्वारा उत्पादित , संकलित सामग्रीहरू तथा विभिन्न अर्गानिक खाद्य, सामग्रीहरू बिक्री र प्रदर्शनका लागि राखिएका थिए। सोहि अवसरमा संघले सञ्चालन गर्दै आएको तालिमहरु,सहायिक सामग्री, उपकरण तथा ब्रेल प्रेसको प्रदर्शनी समेत आयोजना गरिएको थियो।
कार्यक्रममा पूर्वाधार बिकास मन्त्रालयका माननीय मन्त्री डा. दिनेश चन्द्र देवकोटा ज्यु प्रमुख अतिथिको रूपमा उपस्थित रहनु भएको थियो। सो अवसरमा,“दृष्टिविहीन व्यक्तिहरूको मर्यादित तथा सम्मानित जीवनका लागि सहकार्य” सम्बन्धी अन्तरक्रियात्मक कार्यक्रम सम्पन्न भएको थियो। साथै २०२५ मा सम्पन्न 1st Women’s T20 World Cup Cricket for the Blind प्रतियोगितामा नेपालको तर्फबाट उपविजेता भएका महिला खेलाडीहरूको सम्मान तथा पुरस्कार वितरण कार्यक्रम सम्पन्न भएको थियो। उहाँले आफ्नो महत्वपूर्ण मन्तव्यको साथसाथै अपांगता अधिकारको प्रवर्द्धन र संरक्षणमा सरकारको प्रतिवद्धता जनाउनुभयो। त्यस्तै, दोस्रो सत्रमा “अपाङ्गता आन्दोलन: वर्तमान र भविष्य” विषयमा विभिन्न सरोकारवालाहरूसँग अन्तर्क्रिया कार्यक्रम सम्पन्न गरिएको थियो। कार्यक्रममा अधिकारमुखी अपांगता आन्दोलनमा महत्वपूर्ण भूमिका निर्वाह गर्नुभएको आदरणीय व्यक्तित्वहरू,अपांगता भएका व्यक्तिहरूद्वारा संचालित संघ–संस्थाका पदाधिकारी तथा प्रतिनिधिहरूको सक्रिय सहभागिता रहेको थियो भने अन्य संघ–संस्थाबाट पनि आदरणीय व्यक्तित्वहरूको उपस्थिती उल्लेखनीय रहेको थियो।यस सत्रले अपांगता अधिकारका गतिविधिहरूको वर्तमान स्थिति र भावी दिशाहरू स्पष्ट रुपमा देखाउने परिणाम प्रदान गर्यो।
नेपाल नेत्रहीन संघ, प्रमुख अतिथिज्यू,सहभागी आदरणीय व्यक्तित्वहरू, मिडियाकर्मी र कार्यक्रम सफल बनाउन सहयोग गर्नुहुने सम्पूर्ण महानुभावहरुलाइ हार्दिक धन्यवाद ज्ञापन गर्दछ।
