https://www.facebook.com/103501338782312/

Hilotanan sa Nabunturan, Purok 9, Poblacion Nabunturan, Nabunturan (2026)

21/02/2024

P38 NGA USBAW SA SWELDO SA MGA KATABANG SA DAVAO REGION, APROBADO NA

Anaa sa P38 ang usbaw sa matag adlaw nga sweldo sa mga katabang sa Davao Region subay sa gi-isyu nga Wage Order No. RB XI-22 sa Regional Tripartite Wages and Productivity Board XI bag-ohay lang.

Kalabot niini, gibutyag sa Department of Labor and Employment, nga moabot sa 132,347 nga mga minimum wage earners ang makabenepisyo sa pagtaas sa sweldo.

Ang pagpataas sa sweldo ipatuman sulod sa duha ka tranches ning tuiga diin P19 increase ang epektibo sugod sa Marso 6 ug laing P19 usab ang idugang sa Setyembre 1 niining tuiga.

Tungod niini, misaka na sa P481 gikan sa P443 ang daily minimum wage sa non-agriculture workers samtang P476 na usab gikan sa P438 ang daily minimum wage sa mga trabahante sa agriculture sector.

21/02/2024

PATAYNG LAWAS SA BABAYE UG LALAKING GIBAATAN OG PACKAGING TAPE DIDTO SA BUKIDNON, TAGA-TAGUM UG MATI DIAY

Nailhan na ang mga patay nga lawas sa babaye ug lalaki kinsa gipanglabay didto sa may San Fernando Bukidnon.

Mismo ang inahan nga si Virginia Atis Gastañe ang nagkumpirma nga ang biktimang babaye mao ang iyahang Anak nga si Wenifer Atis Gastañes, Single Mom, dunay 4 ka mga anak nga residente sa Magapo, Barangay Central, Mati City.

Samtang positibo usab nga giila ug gikuha ang kauban niining lalaki nga si Joel Anchita, 43 anyos, minyo, nga residente sa Purok Caimito, Barangay Mankilam, Tagum City sa asawa nga si Miraluna Pacaldo Anchita.

Una nang nakaplagan ang mga biktima niadto pang Pebrero 17, 2024 adlaw nga Sabado, pasado alas tres sa hapon didto sa Sitio Bolicat, Barangay Kalagangan, San Fernando Bukidnon, diin ang patayng lawas sa lalaki dunay 11 ka samad dinunggaban sa tuong bahin sa liog ug ang babaye duna usab walo ka samad dinunggaban sa walang bahin sa liog nga pulos gipang-putos pa og packing tape ang ilahang mga ulo.

Sa pagkakaron padayon pa ang gihimong lawom nga imbestigasyon sa kapulisan pagsulbad sa mangilngig nga krimen apan adunay hulohungihong nga adunay relasyon ang duha ka mga biktima.

21/02/2024

18-ANYOS NGA LALAKING TIGPAYUHOT OG DRUGA SIKOP SA SANTO TOMAS

Giaresto sa mga otoridad ang usa ka lalaki nga gikaingong tigpayuhot sa gidili nga druga atol sa usa ka drug buy-bust operation didto sa Feeder Road 3, Barangay Tibal-og, Lungsod sa Santo Tomas, Davao del Norte tungang gabie sa niaging adlaw.

Kapulisan nag-ila sa suspek nga si Alyas Bebe 18-anyos residente sa Purok 11-A, Feeder Road 4 sa nasangpit nga barangay kinsa giingong anaa sa listahan sa PDEA ug sa PNP.

Nakuha gikan sa posesyon sa suspek ang usa ka pakete sa pinaugang dahon sa ma*****na nga ang kantidad og Php 216 lakip na P200 nga kwartang minarkahan.

Samtang balhog sa prisohan ang suspek nag-atubang og kasong kalapasan sa RA 9165 kon Comprehensive Dangerous Drugs Act of 2002.

21/02/2024

PSYCHOSOCIAL ACTIVITIES UG STRESS DEBRIEFING ALANG SA KABATAANG APEKTADO SA MASAR LANDSLIDE GIPAHIGAYON

Taliwala sa nahiagomang trahedya sa Zone 1, Barangay Masara, Maco, anaa gihapon nagpabilin ang pagkalig-on sa mga katawhan labina ang mga inosenteng kabataang labing naapektohan usab nga anaa karon nahimotang sa mga evacuation centers.

Sa paningkamot sa local nga panggamhanan ning probinsya, nagpahigayon niadtong miaging adlaw, Pebrero 19, 2024 og psychosocial activities ug stress debriefing ngadto sa mga kabataan sa Nuevo Iloco High School ang usa ka grupo sa dedikado nga mga social worker gikan sa City Social Welfare and Development Office sa syudad sa Davao.

Nakahatag kalipay sa mga kabataan ang managlahing intervention programs agig suporta aron mahatagag kahupayan ug kasulbaran ang emosyonal nga samad nga gibilin sa maong traumatic nga panghitabo.

Nanghatag usab og hygiene kits ang CSWDO ngadto sa mga ginikanan samtang school materials ug mga matam-is nga pagkaon usab para sa mga kabataan nga gipasilitaran sa mga personahe sa IDPs Protection Cluster sa probinsya.

Mipaabot usab si Governor Dorothy Montejo-Gonzaga og dakong pagpasalamat sa tanang social workers nga minghatag sa ilang kahanas pagtabang sa mga katawhan.

21/02/2024

GROUND VALIDATION ALANG SA PERMANENTENG RELOCATION SA MGA RESIDENTENG APEKTADO SA MASARA LANDSLIDE, PAGSUGDAN NA SA MGB XI

Gikatakdang sugdan sa Mines and Geosciences Bureau XI ang ground validation sa Brgy. Masara, Maco, ning probinsya sa Davao de Oro human sa nahitabong landslide niadtong nakalabayng Pebrero 6, 2024.

Sigon kang MGB XI Geologist Mark Allan Abanilla atol sa usa ka press confecrence, nga kini mao ang sunod nilang lakang human sa gihimo nilang aerial survey sa nakalabayng semana kauban ang Office of Civil Defense XI ug sa local nga panggamhanan ning probinsya sa Davao de Oro.

Sumala ni Abanilla, tumong nila nga susihon kung diin nga mga lugar sa Masara ug sa mga kasakbit niini nga barangay ang luwas nga balhinan sa mga namakwit nga residente sa mga lugar nga apektado sa pagdahili sa yuta lakip na sa mga dapit nga adunay dakong risgo sa landslide.

Nasayran nga ning kasamtangan, magpabilin pa ang mga bakwit sa temporaryong relokasyon nga gihatag sa LGU Maco nga anaa sa kasikbit nga barangay sa ground zero.

Pamahayag ni OCD XI Regional Director Ednar Dayanghirang nga ang LGU Maco nag-andam og lugar sa Brgy. Elizalde ug Brgy. Malamudao isip temporaryong relocation site.

18/01/2024

KAPIN P1M NGA HINABANG SA MGA NA-APEKTOHAN SA PAGBAHA SA DAVAO DE ORO GIHATAG SA DSWD XI

Naka-apod-apod na og mga hinabang atol sa nasinatiang walay undang nga pag-ulan nga niresulta og pagbaha sa nagkalain-laing bahin ning probinsya sa Davao Region ang Department of Social Welfare and Development kon DSWD Field Office XI.

Gibutyag sa DSWD XI nga sukad niadtong nakalabay nga adlawng Martes, nakaturnover kini og 2,683 ka family food packs ug non-food items nga nagkantidad og P1,910,776.00 sa mga apektadong residente sa probinsya sa Davao de Oro.

Padayon usab ang pagmonitor sa DSWD XI ning kasmatangan pinaagi sa Disaster Response Management Division sa mga epekto sa shear line ug localized thunderstorms ug andam nga muhatod og hinabang alang sa augmentation kon mohangyo ang mga apektadong local government units.

18/01/2024

LUNGSOD SA NABUNTURAN UG MONTEVISTA PABILING SUSPENDIDO ANG MGA KLASE

Nagpabiling suspendido ang klase sa mga tunghaan sa mga lungsod sa Nabunturan ug Monevista, ning probinsya sa Davao de Oro hangtod ning adlawa, Huwebes, Enero 18.

Sa usa ka pahibalo nga gi-post sa opisyal nga page sa duha ka mga nahisgotang lungsod, gimando nila ni Mayor Myrocel Balili sa lungsod sa Nabunturan ug Mayor Cyrex Basalo sa lungsod sa Montevista nga wala unay klase nga mahitabo hangtod ning mga adlawa alang sa seguridad sa mga estudyante lakip na sa mga magtutudlo ug mga non-teaching staff sa mga tunghaan.

Gani matud ni Basalo nga ang maong desisyon iyang gipagawas basi na usab sa rekomendasyon sa Municipal Disaster Risk Reduction and Management Office kon MDRRMO human sa makuting assessment sa sitwasyon ilabina sa mga dapit nga naapektuhan sa mga pagbaha sa Montevista ug uban pang mga hitabo may kalabot niini.

Nasayrang kagahapon sa hapon, basi sa report sa Weather Forecast sa PAGASA, makasinati gihapon ang ubang parte sa probinsya og mga ulan tungod sa Shear Line.

Kalabot niini, hugot nga nagpahimangno ang local nga panggamhanan ning probinsya sa Davao de Oro sa tanang katawhan sa pag double amping ilabina sa pagmaneho niadtong mobiyahe.

11/01/2024

SESYON SA SANGGUNIANG BAYAN SA MONKAYO NAHIMONG PRODUKTIBO; POULTRY FARM NGA HINUNGDAN SA DAGHANG LANGAW NASIRAD-AN NA!

Nahimong produktibo ang adlaw nga Miyerkules sa Sangguniang Bayan human nga gipahigayon ang ika-75th Regular Session nga gipanguluhan ni Vice Mayor Manuel “Junjun” Brillantes, Jr. kagahapong adlawa, Enero 10.

Atol sa maong sesyon, gipasa ang resolusyon nga nag-ila isip bag-ong miyembro sa konseho kang Konsehal Raul G. Mabanglo, ang bag-ong presidente sa Liga ng mga Barangay.

Nahisgotan usab sa konseho ang mga bag-ong polisiya ug guidelines sa AICS diin naaprobahan kini ug napasa.

Samtang panahon sa question hour nadiskusyonan sa mga opisyal ang bahin sa poultry farms operations nga hinungdan nga nakadaghan sa langaw didto sa Brgy. Upper Ulip ug naaksyonan na kini ni Mayor Manuel “Way Kurat” Zamora pinaagi sa pagpasirado niini tungod kay apektado na ang mga residente sa maong barangay.

11/01/2024

LUNGSOD SA NABUNTURAN GIDEKLARANG "FULLY COMPLIANT" SA GAWAD KALASAG 2023 SEAL OF EXCELLENCE

Gipasigarbo karon sa local nga panggamahanan ning lungsod sa Nabunturan nga sa tuig 2023, gideklara kita isip "Fully Compliant" sa Gawad KALASAG (GK) Seal of Excellence.

Magarbohong gidawat sa ngalan sa Lungsod pinaagi ni Jennifer Echavez, sa MDRRMO, ang plake gikan sa National Disaster Risk Reduction and Management Council kon NDRRMC, nga nagpamatood sa padayong paningkamot sa Lokal nga Panggamhanan sa Nabunturan sa pagsiguro sa kaluwasan sa katawhan sa panahon sa kalamidad o emerhensya.

Malipayon usab nga gidawat ni Mayor Myrocel Clarin Balili ang maong plake nga ika-duha na niining kadaugan sa susamang pag ila sukad sa iyang paglingkod isip mayor ning Lungsod.

Ang Gawad KALASAG kon KAlamidad at sakuna LAbanan, SAriling Galing ang kaligtasan - Search for Excellence in Disaster Risk Reduction and Management and Humanitarian Assistance, usa ka tinuig nga kalihokan sa National Disaster Risk Reduction and Management Council (NDRRMC), nga nagarekognisa sa mga lokal nga panggamhanan ug uban pang ahensya nga adunay mga maayo ug epektibong lakang ug programa, batok sa mga kalamidad o emerhensya, aron masiguro ang kaluwasan sa katawhan nga ginsakpan niini.

11/01/2024

PAGBABAG SA ANNUAL BUDGET SA PROBINSIYA SA DAVAO DE ORO GIHIMAKAK SA SANGGUNIANG PANLALAWIGAN

Hugtanong gipanghimakak ni Davao de Oro Vice Governor Jayvee Tyron Uy nga gibabagan sa Sangguniang Panlalawigan ang Annual Budget sa probinsiya alang sa tuig 2024.

Pamahayag sa bise gobernador nga dili pa maka padayon ang sanggunian sa hisgutanan sa annual budget sanglit wala pay naaprobahan nga Annual Investment Plan ang Sangguniang Panlalawigan.

Girason sa opisyal nga wala naaprobahan ang gisang-at nga Annual Investment Plan niadtong Disyembre 27 sa nakalabayng tuig tungod kay wala miabot sa mayorya ang mibotar pabor sa maong AIP.

Dugang pa ni Uy nga usa sa mga daghang rason nganong wala naaprobahan ang AIP mao ang mga rekomendasyon nga ibalhin ang pondo gikan sa Crisis Intervention Program, nga naa ilawom sa Peace and Order Program diin mao kini ang nag hatag og mga assistance sa mga residente sa conflict affected areas sa probinisya sa wala pa ma deklara nga insurgency free ang Davao de Oro, ngadto sa Social Development Office.

Nauna na nga girekomendar ni BM Kris Caballero nga ibalhin na lamang ang maong pondo sa Provincial Social Development Office sanglit mao kini ang responsable sa paghatod og mga ayuda sa mga lumolupyo sa probinsiya.

Hinuon gipasalig ni Uy nga aduna pa silay 90 ka adlaw sa pagtrabaho sa maong AIP ug pagpasa sa Annual Budget sa Probinsiya.

Gidugang usab sa nahisgotan nga kung gyud dili magkasinabot ang mga magbabalaod ug ang buhatan sa gobernador kalabot sa maong hisgutanan, mamahimong mapasar sa Sanggunian Panlalawigan ang reenacted budget sa Davao de Oro alang sa tuig 2024.

11/01/2024

111 KA MGA ESTUDYANTE SA DAVAO DE ORO NAKADAWAT OG P25 MIL NGA CASH ASSISTANCE

Anaa sa 111 ka mga scholars para sa Annual Year 2023-2024 gikan sa lungsod sa Maco ug Mawab ang nakadawat og P25 mil ka pesos nga cash assistance ubos sa 𝐶𝑜𝑚𝑚𝑖𝑠𝑠𝑖𝑜𝑛 𝑜𝑛 𝐻𝑖𝑔ℎ𝑒𝑟 𝐸𝑑𝑢𝑐𝑎𝑡𝑖𝑜𝑛 - 𝑆𝑡𝑢𝑑𝑒𝑛𝑡 𝑀𝑜𝑛𝑒𝑡𝑎𝑟𝑦 𝐴𝑠𝑠𝑖𝑠𝑡𝑎𝑛𝑐𝑒 𝑓𝑜𝑟 𝑅𝑒𝑐𝑜𝑣𝑒𝑟𝑦 𝑎𝑛𝑑 𝑇𝑟𝑎𝑛𝑠𝑖𝑡𝑖𝑜𝑛 kun CHED SMART program.

Tumong sa maong programa nga matabangan ang mga deserving students nga mapadayun ug makahuman sa ilang pag eskwela sa kolehiyo.

Kalabot niini, gipaabot nila Governor Dorothy Montejo-Gonzaga ug Congressman Ruwel Peter Gonzaga nga ang Probinsyal nga panggamhanan padayun sa tinguha nga mahatod ang mga dekalidad nga serbisyo labina sa matang sa edukasyon aron masiguro ang maayung kaugmaon sa mga kabataan onan sa probinsya.

Samtang mapasalamataon usab ang mga benepisyaryo ngadto sa gobyerno tungod sa makanunayong pagsuporta gikan sa probinsya ug sa national nga ahensya.

08/01/2024

ILADONG NEGOSYANTE SA DAVAO CITY NGA SI PHILLIP “SONNY” DIZON, PATAY SA DISGRASYA

Patay ang iladong negosyante sa syudad sa Davao nga si Phillip “Sonny” Dizon human kini nadisgrasya sa may Gumamela St., Bansalan-Balutakay road, sakop sa probinsya sa Davao del Sur kagahapon sa udto.

Kini maoy gikumpirma sa Pamilya sa negosyante ngadto sa publiko.
Basi sa report nga nahipos sa AFM, sakay ang biktima sa iyang can-am nga motorsiklo ug samtang nagbiyahe kini sa nahisgotang lugar, gilikayan niini ang usa ka elf truck apan sa iyang paglikay, nalagpot kini ug naka-angkon og mga pangos ug bun-og sa lawas hiungdan sa kamatayon niini.

Si Dizon maoy tag-iya sa Davao Crocodile Park ug Mt. Apo Coffee sa Davao City, apil na ang mga negosyo niini Digos City, nga mao ang Apo Highland Resorts sa Kapatagan.

Si Dizon nahimo usab nga chairman sa American Chamber of Commerce Mindanao.

Hilotanan sa Nabunturan

21/02/2024

21/02/2024

21/02/2024

21/02/2024

21/02/2024

18/01/2024

18/01/2024

11/01/2024

11/01/2024

11/01/2024

11/01/2024

08/01/2024

Address

Telephone

Website

Alerts

Contact The Practice

Shortcuts

Share

Category