07/11/2025
Opisyal nga Pahayag gikan sa Toledo City General Hospital (TCGH)
Nagpasalamat kami sa tanan nga Toledanos nga nagpaabot sa ilang kabalaka ug mga sugyot kabahin sa kasamtangang kahimtang sa atong ospital. Nasabtan gyud namo ang kasuko ug kalisod nga gibati sa atong mga pasyente ug ilang pamilya, labi na human sa kalisod nga gidala sa Bagyong Tino.
Tungod sa kalit ug daghang pagdagsa sa mga pasyente nga nanginahanglan og tambal ug pag-atiman human sa bagyo, ang atong Emergency Room ug mga Wards nakalapas na sa 200% nga kapasidad. Daghang pasyente ang nanginahanglan dayon og serbisyo, maong nahimong puno ug huot ang ubang lugar sa ospital.
Bisan pa niini, ang atong mga doktor, nars, ug tanang hospital staff nagpadayon sa ilang trabaho labaw pa sa ilang regular nga oras aron matabangan ang tanan, bisan limitado ang kagamitan, luna, ug pwersa sa tao.
Gusto namo ipasabot sa tanan nga nadungog ug gitrabahoan namo ang inyong mga reklamo ug kabalaka. Anaa na usab sa proseso ang mga plano para sa pagpaayo ug pagpalapad sa atong ospital, aron mas mapalambo pa ang serbisyo sa kadaghanan.
Mohangyo kami sa inyong pasensya ug pagsabot, tungod kay ang among mga frontliners naningkamot gyud nga makahatag og maayong serbisyo sa tanan, bisan paman sa limitado nga kahimtang.
Nagpasalamat usab kami sa lokal nga kagamhanan ug mga kaabag sa padayong suporta, ug naglaum kami nga mas lig-on pa ang koordinasyon ug pagtinabangay aron mas mapaayo pa ang kahimtang sa atong ospital sa umaabot.
Magtinabangay ta aron makabangon ug makalig-on pag-usab isip usa ka komunidad sa Toledo.
Toledo City General Hospital
November 7, 2025
