15/02/2026
چیئرمین بورڈ آف گورنرز ایم ٹی آئی بنوں کا خلیفہ گلنواز ہسپتال میں آکسیجن جنریشن پلانٹ کا افتتاح، زیتون باغ میں شجرکاری مہم کا آغاز
چیئرمین بورڈ آف گورنرز ایم ٹی آئی بنوں پروفیسر ڈاکٹر خالد محمود نے خلیفہ گلنواز ہسپتال بنوں میں جدید آکسیجن جنریشن پلانٹ کا باقاعدہ افتتاح کر دیا۔ یہ پلانٹ ہسپتال میں آکسیجن کی مسلسل، محفوظ اور معیاری فراہمی کو یقینی بنانے کے لیے قائم کیا گیا ہے، جس سے ایمرجنسی، آئی سی یو، آپریشن تھیٹر اور دیگر اہم شعبہ جات میں زیرِ علاج مریضوں کو بروقت اور بلا تعطل طبی سہولت میسر آ سکے گی۔
آکسیجن جنریشن پلانٹ کی تنصیب سے ہسپتال کی طبی استعداد میں نمایاں اضافہ ہوگا اور ہنگامی صورتحال میں بیرونی انحصار کم ہو کر مریضوں کو فوری اور مؤثر علاج کی فراہمی ممکن بنائی جا سکے گی۔ انتظامیہ کے مطابق یہ اقدام ادارے میں جدید طبی سہولیات کے فروغ کی جانب ایک اہم پیش رفت ہے۔
اسی موقع پر چیئرمین بورڈ آف گورنرز نے ہسپتال کے احاطے میں قائم کیے گئے زیتون باغ میں پودا لگا کر شجرکاری مہم کا آغاز بھی کیا۔ زیتون کے پودوں کی شجرکاری کا مقصد ہسپتال کے ماحول کو سرسبز، خوشگوار اور صحت بخش بنانا ہے تاکہ مریضوں، تیمارداروں اور عملے کو بہتر اور پُرسکون فضا میسر آ سکے۔ زیتون کا درخت ماحولیاتی اہمیت اور پائیداری کے اعتبار سے خصوصی مقام رکھتا ہے، جو نہ صرف ماحول کی بہتری میں معاون ہے بلکہ طویل المدتی فائدہ بھی فراہم کرتا ہے۔
اس موقع پر چیئرمین ڈاکٹر خالد محمود نے کہا کہ طبی اداروں میں جدید سہولیات کی فراہمی کے ساتھ ساتھ ماحولیات کے تحفظ کو بھی یکساں اہمیت دی جانی چاہیے۔ انہوں نے اس عزم کا اظہار کیا کہ ایم ٹی آئی بنوں ہسپتالوں کو طبی سہولیات، مریض دوست ماحول اور پائیدار اقدامات کے اعتبار سے ایک مثالی ادارے بنانے کے لیے عملی اقدامات جاری رکھے جائیں گے۔
