22/09/2025
ویسے تو ہر مریض کے ساتھ وقت گزارتے ہوئے ایک رشتہ سا بن جاتا ہے۔ ان کے معمولات، مسائل، وسائل اور چیلنجز کا اندازہ ہو جاتا ہے۔ مگر جب بات حاملہ خواتین کی ہو، تو دل کا رشتہ اور بھی گہرا ہو جاتا ہے۔ ان کی امیدوں اور دعاؤں میں شریک ہونا، ان کے دکھ اور پریشانیوں کو سمجھنا، یہی لمحے سب سے زیادہ سکون اور خوشی دیتے ہیں۔
اکثر خواتین کو حمل کے دوران ایسی مشکلات کا سامنا کرنا پڑتا ہے جن کا تصور بھی دل دہلا دیتا ہے۔ بار بار حمل ضائع ہونا، وہ بے بسی، وہ ذہنی اذیت اور جسمانی کمزوری ، لفظ ان سب کو بیان کرنے میں بے بس ہو جاتے ہیں۔
خاص طور پر شوگر سے متاثرہ خواتین کے لیے یہ سفر اور بھی کٹھن ہوتا ہے۔ کبھی حمل ٹھہرتا ہی نہیں، کبھی ٹھہر جائے تو ڈیلیوری تک ہر دن ایک جنگ کی طرح ہوتا ہے۔ زچگی کے وقت مسائل کا سامنا، یا پھر بچے کی زندگی بیماریوں میں گھری رہنے کا خوف ، یہ سب ایک بھاری بوجھ کی طرح دل پر ہوتا ہے۔
شوگر اسپیشلسٹ ہونے کے ناطے مجھے ہمیشہ یہ احساس رہتا ہے کہ ان خواتین کا اعتماد سنبھالنا، ان کا ہاتھ پکڑ کر اس مشکل راستے پر چلنا صرف میرا فرض نہیں بلکہ ایک بھاری ذمہ داری بھی ہے
اب ذرا ان کی مثال لیجیے۔ وسائل کی شدید کمی ہے ، کئی بار حمل ضائع ہونے کے بعد جسم اور روح دونوں تھک کر ہار مان چکے تھے۔ چہرے پر امید کی بجھتی ہوئی کرنیں اور دل میں ہار کا سایہ
لیکن جب انہیں صرف تھوڑی سی رہنمائی ملی، تھوڑا سا اعتماد ملا، ہر لمحہ رابطے کا یقین ملا اور حمل کے دوران شوگر اور دیگر مسائل پر تعلیم اور بااختیار بننے کا موقع ملا، تو نتائج نے ہمیں حیران کر دیا۔
ان کی زندگی بدلنے لگی، امید کی وہ کرن پھر روشن ہوئی اور ہماری ساری تھکن ایک لمحے میں اتر گئی۔
ایک ہی ہفتے میں دو رحمتیں اُتریں
گود میں لے کر پیار کیا تو ایک شہزادی نے جماہی لی شاید میں اسے بورنگ لگا
اور دوسری نے اچانک چھینک مار دی شاید میرے پرفیوم کی خُوشبو محترمہ کو ناگوار گزری
ہنسی چھوٹ گئی، آنکھیں بھیگ گئیں
دل نے کہا
"ابے یہ کیسا انوکھا اندازِ پذیرائی ہے"
شہزادیو، جگ جگ جیو۔
یہ دنیا تمہارے لیے خوشیوں سے بھری ہو
خوش آمدید ❤️
