24/10/2025
*جامعہ سندھ کا مختلف پروگرامز کے امتحانی فارم جمع کرانے کی آخری تاریخ میں توسیع کا اعلان*
جامشورو (پریس ریلیز) جامعہ سندھ جامشورو نے اپنے ملحقہ کالجز کے طلبہ و طالبات کو ریلیف دیتے ہوئے کئی پروگرامز کیلئے امتحانی فارم جمع کرانے کی تاریخ میں اہم توسیع کا اعلان کیا ہے۔ گزشتہ روز جاری کردہ مختلف سرکیولرز میں ناظم سیمسٹر امتحانات محمد معشوق صدیقی نے مطلع کیا ہے کہ سیمسٹر کی امتحانی فیس و فارم آن لائن جمع کرانے کی تاریخ میں 28 اکتوبر 2025ء تک توسیع کی گئی ہے، جو بغیر لیٹ فی کے لاگو ہوگی۔ اس سے پہلے یہ تاریخ 20 اکتوبر تک تھی۔ یہ فیصلہ مختلف ملحقہ کالجز و اداروں کی درخواستوں کی روشنی میں کیا گیا ہے۔ اعلامیہ میں مزید ہدایت کی گئی ہے کہ تمام کالجز کے پرنسپال یقینی بنائیں کے امتحانی فارم 30 اکتوبر 2025ء تک کنٹرولر کے آفیس میں لازما جمع کرائے جائیں۔ مذکورہ توسیع مختلف پروگرامز پر نافذ العمل ہوگی، جن میں 3 سالہ بی سی ایس پروگرام، 2 سالہ اے ڈی ایس (باٹنی) پروگرام، 4 سالہ بی بی اے (آنرز)، بی ایس (سافٹ ویئر انجنیئرنگ)، بی ایس انفارمیشن ٹیکنالوجی پروگرام، بی ایس 4 سالہ کے مختلف شعبے جیساکہ کامرس، انگریزی، کیمسٹری، اے ڈی ای و بی ایڈ (2) پروگرامز، 4 سالہ ایم بی اے (ایوننگ) و ایم بی اے (ریگیولر) پروگرامز اور 5 سالہ ایل ایل بی پروگرام شامل ہیں۔ کنٹرولر نے واضح کیا ہے کہ 30 ستمبر 2025ء کو جاری کردہ اصلی نوٹیفکیشن میں درج دیگر تمام شرائط و ضوابط وہی رہیں گے۔ طلباء کو ہدایت کی گئی ہے کہ اپنے متعلقہ کالجز کے معرفت نئی مقرر کردہ تاریخ تک اپنے فارم جمع کرائیں۔
