27/04/2024
انسومنیا (نیند کی کمی کی بیماری) کا دوائیوں کے بغیر علاج
- انسومنیا کی ایک خاص طرح کی کوگنیٹو بیہیویئر تھراپی (سی بی ٹی) ہوتی ہے جس سے اتنا ہی فائدہ ہوتا ہے جتنا کہ دوائیوں سے ہوتا ہے، لیکن اس کا مزید فائدہ یہ ہے کہ اس کا فائدہ ایک عرصے تک برقرار رہتا ہے جبکہ نیند کی دوائیوں کا فائدہ کچھ ہفتوں کے بعد ختم ہونے لگتا ہے۔
- سونے اور جاگنے کا وقت مقرّر ہو نا چاہیے اور انسان کو ہفتے کے ساتوں دن ایک ہی وقت پہ سونے اور جاگنے کی کوشش کرنی چاہیے۔
- دن میں اور خصوصاً صبح کے وقت میں اپنے آپ کو سورج کی روشنی سے ایکسپوژ کریں یعنی سورج کی روشنی میں کچھ وقت گزاریں۔
- سونے کے وقت سے کچھ گھنٹے پہلے گھر کی بتیاں مدھم کر دیں، اور تقریباً ایک گھنٹہ پہلے سے تمام اسکرینز مثلاً ٹی وی، موبائل، اور کمپیوٹر کا استعمال بند کر دیں کیونکہ ان کی روشنی بھی دماغ کو یہ غلط سگنل دیتی ہے کہ ابھی سونے کا وقت نہیں ہوا۔
- باقاعدگی سے روزانہ کچھ نہ کچھ ورزش کرنے کی عادت ڈالیں۔ ہفتے میں پانچ دن آدھا گھنٹہ واک یعنی تیز رفتار سے چہل قدمی کرنا بھی صحت اور نیند کے لئے بہت فائدہ مند ثابت ہوتا ہے۔
- سونے سے پہلے اپنے آپ کو ریلیکس کرنے یعنی پرسکون کرنے کی ایک روٹین بنائیں، مثلاً کوئی ہلکی پھلکی کتاب پڑھیں، یا ریلیسیشن ایکسرسائزز کریں۔ آج کل موبائل پہ ایسی ایپس مل جاتی ہیں جو ریلیکسیشن کرنے میں مدد دیتی ہیں۔ اسی طرح انٹرنیٹ پہ بھی فری ریلیکسیشن ایکسرسائزز کی آڈیوز اور وڈیوز بھی مل جاتی ہیں۔
- چاہے رات میں نیند کتنی خراب رہی ہو، دن میں نہ سونے کی کوشش کریں۔ اس کی وجہ یہ ہے کہ دن کی نیند گہری ہوتی ہے اور اگر انسان کئی گھنٹے سو لے گا تو اس ے اگلی رات کی نیند بھی خراب ہو گی۔
- دوپہر کے بعد سے کافی نہ پیئیں اور سگریٹ نوشی نہ کریں۔
()
