21/01/2026
بن دیوان مری: قدرتی چشموں کے پانی کو محفوظ بنانے کے لیے پبلک ہیلتھ انجینیئرنگ ڈپارٹمنٹ (پی ایچ ای ڈی) مری کی ٹیم کا دورہ
مری کے گاؤں بن دیوان میں قدرتی چشموں کے ضائع ہوتے پانی کو محفوظ بنانے کے لیے پبلک ہیلتھ انجینیئرنگ ڈپارٹمنٹ (پی ایچ ای ڈی) مری کی ٹیم نے آج علاقے کا تفصیلی دورہ کیا۔ ٹیم نے گاؤں میں موجود نو (9) قدرتی چشموں کا جائزہ لیا جہاں سے قیمتی پانی ضائع ہو رہا ہے۔
دورے کے دوران پی ایچ ڈی مری کے حکام نے قدرتی چشموں پر پانی ذخیرہ کرنے کے لیے مجوزہ ٹینکس اور پائپ لائنز کے اخراجات کا بھی جائزہ لیا۔ حکام کے مطابق منصوبے کی رپورٹ تیار کی جا رہی ہے اور امید ہے کہ جلد ہی فنڈز کی منظوری دے دی جائے گی۔
گاؤں بندیوان میں تقریباً ایک سو دس (110) گھر آباد ہیں جہاں پینے کے صاف پانی کی شدید ضرورت ہے۔ مقامی افراد کا کہنا ہے کہ اگر چشموں کے پانی کو محفوظ کر لیا جائے تو پورے گاؤں کو صاف پینے کا پانی مہیا کیا جا سکتا ہے۔
واضح رہے کہ دیوان یوتھ ویلفیئر ٹرسٹ نے سوشل میڈیا پر قدرتی پانی کے ضیاع کے خلاف آواز بلند کی تھی، جس پر پبلک ہیلتھ انجینیئرنگ ڈپارٹمنٹ (پی ایچ ای ڈی) مری نے دیوان یوتھ ویلفیئر ٹرسٹ سے رابطہ کیا۔ اسی سلسلے میں آج پی ایچ ڈی مری کی ٹیم نے موقع پر پہنچ کر سروے کیا۔
علاقہ مکینوں نے امید ظاہر کی ہے کہ جلد فنڈز کی منظوری کے بعد عملی اقدامات شروع ہوں گے اور قدرتی پانی کو ضائع ہونے سے بچا کر گاؤں کے عوام کو صاف پینے کا پانی فراہم کیا جائے گا۔
