02/10/2024
_*بلوغت کے وقت بیٹیوں سے کیا کہا جائے کس طرح معاملات ہینڈل کیے جائیں اس سب پر ایک تحریر ہے جو بہت پسند کی گئی 💕
پوچھا گیا کہ بیٹی جب بڑی ہونے لگے تو اس کو بلوغت کے حوالے سے کیا بتایا جائے کتنا بتایا جائے اور کیسے بتایا جائے؟
اور بتایا بھی جائے یا نہیں؟
میں نے سوچا نہیں تھا کہ اس موضوع پر بھی قلم کشائی کروں گا لیکن بات یہ ہے کہ بیٹیوں کی مائیں اس سلسلے میں گائیڈ لائن چاہتی ہیں
بچیاں جب بڑی ہونے لگیں تو ماں یا بڑی بہن کے لئے بہتر یہی ہے کہ وہ آنے والے دنوں میں رونما ہونے والی تبدیلیوں کے بارے میں بچی کو آگاہ کریں
خود اس لیے کہ اگر آپ نہیں بتائیں گی تو شاید کوئی سہیلی بتائے گی اس کی ہم عمر بچی اس کو اپنا تجربہ ہی بتائے گی جس سے عین ممکن ہے کہ آپ کی بچی کچھ ڈر جائے بہتر ہو کہ بچی کو ڈرائے بغیر اسکو بتایا جائے کہ لڑکی بالغ ہونے کی نشانی کیا ہے اسکو کہیں کہ یہ دن تو سیلیبریشن کا دن ہوگا کہ میری بیٹی ماشاءاللّٰہ اب بڑی ہو گئی ہے
ہم کیلنڈر پر اس تاریخ پر سٹار بنائیں گے (اس سے اگلے ماہ کی تاریخ یاد رکھنے میں بھی آسانی ہو گی) کیک بنائیں گے آپ چاہیں تو اکیلے واک پر جائیں گے (ٹرانسپیرنٹ نیل پالش اور لپ گلاز کا تحفہ بھی دیا جا سکتا ہے بڑے ہونے کا سیلیبریٹ کرنے کے لئے) تھوڑی discomfort کے لئے بھی بیٹی کو تیار کریں کہ کمر پیٹ یا ٹانگوں میں ذرا تکلیف ہو گی تو اس کے لئے گرم پانی کی بوتل سے ٹکور کی جا سکتی ہے
دارچینی والا قہوہ ہلدی دودھ یا سوپ پیا جا سکتا ہے اور ہلکی پھلکی واک سے بھی درد میں کمی آتی ہے یہیں انہیں یہ بھی بتائیں کہ سائیکل شروع ہونے سے ایک دو دن پہلے ہی شاید discomfort شروع ہو جائے یا سفید سی رطوبت خارج ہو یہ نارمل ہے
اگر ماما/آپی پاس نہ ہوں تو کیا کرنا ہے؟
اگر اس وقت سکول میں ہوں تو گھبرانا نہیں ہے ٹیچر سے علیحدگی میں بات کر لیں
اگر بالفرض اپنی کسی سہیلی کے گھر ہوں تو اس کی امی سے بات کر لیں کہیں باہر ہوں جیسے ریسٹورنٹ وغیرہ تو باتھ روم میں کافی سارا ٹشو لے کر اسکو فولڈ کرتی جائیں تا کہ ایمرجینسی والا وقت ٹل جائے جب ذکر چھڑ ہی گیا ہے تو بچی کے ساتھ مل کر گھر میں موجود اشیاء سے ایک چھوٹا سا پرس/والٹ بنا لیں جس میں ضرورت کی چیزیں رکھ کر وہ سکول بیگ میں رکھ لیں انہیں یہ بھی سمجھائیں کہ بالفرض کسی سہیلی کیساتھ ایمرجینسی پیش آ گئی ہے تو مدد کریں جذباتی طور پر بھی اور اگر ضرورت ہو تو سامان شئیر کر کے بھی گھر آ کر یاد سے پھر سے چیزیں اپنے بیگ میں رکھ لیں..
یہ بھی سمجھانا پڑے گا کہ اب چونکہ وہ بڑی ہو جائیں گی تو ذمہ دار بھی ہونا پڑے گا ویسے بھی ماما کے لئے ممکن نہیں کہ اس سلسلے میں وہ ان پر چیک رکھیں صفائی کو ہمارے دین میں بہت اہمیت حاصل ہے اور ایک سمجھدار لڑکی اپنی ہائیجین کا بہت خیال رکھتی ہے اسلئے بہت زیادہ دیر ایک ہی نیپکن نہیں رکھنا بلکہ حسبِ ضرورت تبدیل کرنا ہے اور اسکو احتیاط سے ٹشو میں لپیٹ کر باسکٹ میں ڈسپوز آف کرنا ہے کہ گھر کے مردوں کی نگاہ نہ پڑے جسمانی صفائی کے لئے میرے خیال میں ویکسنگ بہترین ہے کیمسٹ سے numbing cream ملتی ہے
جس جگہ لگائیں وہ حصہ سن ہو جاتا ہے جب تک جلد عادی نہ ہو جائے یہ کریم لگا کر ویکسنگ کی عادت شروع سے ہی ڈالی جائے بلوغت کے ساتھ آنے والی جسمانی تبدیلیوں کے بارے میں اگاہ کرنا بھی ضروری ہے اور پھر یہ تاکید کہ دوپٹہ اچھی طرح پھیلا کر لینا شروع کرنا ہے
کبھی ماموں کے ساتھ لٹکنا کبھی چاچو کی گود میں بیٹھنا لڑکے کزنز کے ساتھ زیادہ بےتکلفی اس کے بارے میں محتاط رہنا ہے
نئی جسمانی ساخت کے اعتبار سے موزوں انڈر گارمنٹس کا بھی اہتمام کیا جائے اور جاذب نرم کاٹن کی چیزیں لی جائیں (بنیان والا کپڑا) اور رات کے وقت ہر قید سے آزاد ہو کر کھلے ڈھیلے کپڑوں میں سونے کی عادت ڈالیں
اور پھر بات صرف جسمانی تبدیلیوں ہی کی نہ ہو ہارمونز کے اتار چڑھاؤ کی وجہ سے غصہ آنا چڑچڑا پن رونا آنا بھی نارمل ہے تو بچی کو یقین دلائیں کہ اس سفر میں آپ اسکے ساتھ ہیں
انہی تبدیلیوں میں ایک چہرے پر دانے نکلنا بھی ہے
اسکی وجہ سے بچے اکثر احساسِ کمتری کا شکار ہونے لگتے ہیں
گھر کی بنی صاف غذا ڈھیر پانی اور صفائی کا خیال رکھنے کے باوجود بھی دانے نکل سکتے ہیں
بچے کو اسکے لیے تیار بھی رکھیں یہ بھی بتائیں کہ آپکا دل اور اخلاق خوبصورت ہونا زیادہ اہم ہے اور ساتھ ہی اگر ضرورت سمجھیں تو dermatologist کو دکھا لیں مجھے ویسے یہ لگتا ہے کہ وہ لوگ بچوں کی معصوم جلد کے اعتبار سے بہت تیز کریمیں دیتے ہیں
ان کیمیکلز سے بہتر ہے کہ ہاتھ نہ لگائیں ہمدرد کی صافی پیئیںصابن سے ہاتھ دھو کر منہ صرف صاف پانی سے متعدد بار دھوئیں اور کسی کپڑے سے خشک نہ کریں سرھانے پر بھی کوئی کپڑا رکھ لیں جو ایک آدھ دن کے بعد تبدیل کر لیا جائے
بچیاں اپنی ہم عمر سہیلیوں کے ساتھ موازنہ کرتی ہیں اور بعض اوقات پریشان ہو جاتی ہیں
انہیں سمجھائیں کہ تین سے لے کر سات دن تک جو بھی دورانیہ ہے وہ ٹھیک ہے اسی طرح بہاؤ کم یا زیادہ ہونا بھی اور ایک سائیکل سے دوسرے سائیکل کا درمیانی وقفہ بھی مختلف لوگوں کے لیے مختلف ہے
سائیکل ختم ہونے پر طہارت حاصل کرنے کے بارے میں تفصیل سے آگاہ کرنا بہت ضروری ہے۔
دل میں پاکی کی نیت کر کے مسنون طریقے پر وضو کریں پھر سر اچھے طریقے سے دھو کر بدن پر دائیں طرف اور پھر بائیں طرف پانی بہائیں اور ملیں نیل پالش وغیرہ لگائی ہو تو غسل سے پہلے اتار دیں تا کہ جسم کا کوئی عضو گیلا ہونے سے رہ نہ جائے یہ بھی بتایا جائے کہ طہارت حاصل کرنے تک نماز کی مکمل چھٹی ہے اور اسکی قضا بھی نہیں پڑھنی قرآن کو بھی نہیں چھونا اور ہاں صبح شام کے اذکار کر لیے جائیں روزے بھی نہیں رکھنے کیونکہ اللّٰہ تعالی ہمیں کمزور نہیں کرنا چاہتے تو اچھا ہیلتھی کھانا اور خوب پانی پیتے رہنا ہے یہ ہے اللّٰہ کی محبت اسکی مخلوق سے روزوں کی قضا بعد میں پوری کر لی جائے
پوری بات بتانے کے بعد اسکو بتائیں کہ آپ بہت خوش ہیں اور انتظار کر رہی ہیں کہ کب مل کر سیلیبریٹ کریں گی اور پھر ماما بیٹی کی اپنی سیکرٹ باتیں ہونگی مل کر سب عبادات ہونگی خوب مزے ہونگے اسکے سامنے بار بار یہ نہ کہیں کہ ہائے ہماری بچی ساری عمر کے لئے پھنس گئی اس مصیبت میں اسکے دل میں اچھے خیال ڈالیں اور یقین دہانی کروائیں کہ آپ ہر حال میں اسکے ساتھ ہیں 💕
تحریر: نیر تاباں
