14/10/2024
آن لائن کاروبار کا جائز طریقہ
سوال
آن لائن خرید و فروخت میں اگر وعدہ بیع کرکے بیچا جائے یعنی مبیع موجود نہ ہو بلکہ آڈر لیتے ہوئے وہ وعدہ بیع کرلے کہ میں بیچ دوں گا پھر وہ مطلوبہ جگہ سے مبیع لے کر بیچ دے تو آیا ایسا کرنا جائز ہے؟ اور اس صورت میں وعدہ بیع کا کیا طریقہ کار شرعًا ہوسکتا ہے؟ کیوں کہ بعض اوقات مشتری سے بات چیت آن لائن میں نہیں ہوتی، بلکہ طریقہ کار کے مطابق آڈر وصول کرکے ڈیلیور کیا جاتا ہے۔
جواب
آن لائن کاروبار میں اگر مبیع (جوچیزفروخت کی جارہی ہو)بیچنے والے کی ملکیت میں نہیں ہے تو بیع کرنے کے بجائے وعدۂ بیع کرنا درست ہے، اگر محض اشتہار، تصویر دکھلا کر کسی کو ایسا سامان فروخت کیا جائے جو ملکیت میں نہیں ہے، اور بعد میں وہ سامان دکان،اسٹوروغیرہ سے خرید کردیا جائے تو یہ صورت جائز نہیں ؛ اس لیے کہ بائع کی ملکیت میں مبیع موجود نہیں ہے اور وہ غیرکی ملکیت میں موجودسامان کو فروخت کررہاہے۔
اس کے جواز کی صورت یہ ہوسکتی ہے کہ بائع مشتری کو یہ کہہ دے کہ یہ سامان میری ملکیت میں نہیں، میں اسے خرید کرآپ پر اتنی قیمت میں فروخت کرسکتاہوں،اگر آپ راضی ہیں تو میں یہ سامان خرید کر اپنے قبضہ میں لے کر آپ پر بیچ دوں گا۔یوں بائع اس سامان کوخرید کر اپنے قبضہ میں لے کر باقاعدہ سودا کرکے مشتری پر فروخت کرے تو یہ درست ہے۔
اسی طرح آن لائن کام کرنے والا فرد یا کمپنی ایک فرد (مشتری) سے آرڈر لے اورمطلوبہ چیز کسی دوسرے فرد یا کمپنی سے لے کر خریدار تک پہنچائے اور اس عمل کی اجرت مقرر کرکے لے تو یہ بھی جائز ہے۔
اور اگر مبیع بائع کی ملکیت میں موجود ہو اور تصویر دکھلا کرمشتری پر فروخت کی جارہی ہو اور مشتری سے قیمت وصول کرلی جائے تو یہ بیع درست ہے، البتہ جب مبیع مشتری تک پہنچ جائے اور دیکھنے کے بعد اس کی مطلوبہ شرائط کے مطابق نہ ہوتواسےواپس کرنے کااختیار حاصل ہوگا۔
ان دونوں صورتوں میں مشتری جب تک مبیع پر قبضہ نہ کرلے وہ آگے کسی اور پر وہ سامان فروخت نہیں کرسکتا
