28/04/2024
تعالوا أحكيلكم سر خطير رح يساعد أطفالكم يتعلموا أي موضوع مستصعبينه أو مش حابينه بدون ملل وزن!! 👇اقرؤوا البوست للآخر ( طويل بس رح يعجبكم)👇👇
قبل فترة لاحظت شغف ابني بالحيوانات بشكل عام، وبالضفادع بشكل خاص!!🐸🐸
فقررت أستغل الفرصة لنزور أحد المستنقعات القريبة، وأعطيه فرصة يستكشف كل شي بخص الموضوع! مثل البيئة، الحيرانات، الحشرات الخ
جهزت للأطفال مجموعة من الأدوات والكتب لتساعدهم وتلهمهم في مهمتهم، مثل: شبكة صيد ، منظار مكبر للحشرات🔬، مرطبانات، دفتر ملاحظات وكتب وبروشورات📚 عن الحيوانات والحشرات الي ممكن نلاقيها بطريقنا ..
وهيك صرنا جاهزين لنبلش مغامرتنا 😍الحماس كان مليوووون عند الأولاد 🔥🤩
أكثر شي كانوا متحمسينله الضفادع، 🐸 وكانوا متوقعين يقدروا يصيدوا ضفدع بشبكتهم الصغيرة! فكرت كثير إذا لازم اخبرهم الحقيقة أو لأ! وبعدين قررت ما أحكي شي طالما ما سألوني! 🤔
كان بدي يكون عندهم الحماس للتجربة بدون أي معلومات مسبقة عن النتيجة! الي كان ممكن تخليهم يغيروا رأيهم بموضوع المغامرة كله!!
في طريقنا للمستنقع كان لازم نمر من ممر عشبي والأرض مش مكشوفة!! 🌿هون ضروري حد من الأهل يقود الطريق أمام الأطفال ليتأكد انها آمنة!!
ومثل ما كنت متوقعة ما قدروا يصيدوا ضفدع! بس قضوا وقت طويل يراقبوا سلوك الضفدع في المستنقع، كيف بصيد الحشرات، حركته، صوته .. الخ
بكل الرحلة قررت أكتفي بأخذ دور المشرف! بتعرفوا ليش؟⁉️🤔
لاني واثقة انه الفضول الفطري لأطفالنا كافي انه يوجههم!
بكفي اني أتأكد من أمانهم، أراقب وأشاركهم في التجربة!
بعد ما خلصوا مراقبة الضفدع قرروا يبحثوا عن أكبر قدر من الحشرات والطيور الموجودة في كتيب المستنقعات الي جبناه معنا! ومن الشغلات الي قدروا ينجزوها:
🛑 صادوا أكثر من نوع حشرات غير مؤذية باستخدام الشبكة، واستخدموا المكبر ليتعرفوا على تفاصيلها!
🛑مروا بطريقهم على بيت نمل وتجمع كبير للنمل أثار فضولهم!
🛑لقيوا bird feeder وعش خشبي أثاروا فضولهم ليبحثوا عن بيض داخل العش!
وغيرها كثير
وأكيد مثل أي مغامرة لازم يكون في نصيب للتجارب السيئة!
أثناء مشينا في البارك لحقنا طائر صغير ولكنه من فئة الطيور الي بتهاجم الحيوانات والبشر! اضطرينا نهرب ونركض بأقصى سرعة 😱😱😂😂كانت تجربة مخيفة ومضحكة بنفس الوقت
طبعاً هيك موقف طبيعي جداً في أي مكان في الطبيعة! ومش سبب أبداً لنحرم أطفالنا ونبطل نغامر!
لهيك البارك والمستنقع اساساً مرخصين من الدولة انهم مكان آمن للزوار 😁😁
انتهت مغامرتنا بعد ما قضينا عدة ساعات في الطبيعة، تعرفنا فيهم على بيئة المستنقعات بشكل تفصيلي!!
بس ما كان هاد هدفي من المغامرة!! 😱😱
استغربتوا صح؟؟ 🤔🤔
هدفي الأساسي كان تشجيع أولادي على القراءة في المواضيع العلمية!! والبحث العلمي … بعد ما لاحظت ميلهم للروايات
المضحكة بآخر فترة!
وهيك مشوار صغير أخد منا عدة ساعات ساهم في:
🛑 تشجيع الأولاد على القراءة في المواضيع العلمية
🛑تنمية قدرتهم على البحث عن المعلومة الحقيقية
🛑تنمية التفكير الإبداعي عندهم من خلال التساؤل، الملاحظة، البحث، والتجربة
🛑توجيههم ليتأملوا عظمة الخالق سبحانه وتعالى، وجمال خلقه وإتقانه لكل تفصيل مر علينا في رحلتنا
خليني ألخصلكم الطريقة العلمية السابقة الي ممكن تستخدموها ليتعلم طفلك أي موضوع مستصعبه أو مش حابه!
في كل مرحلة من حياة طفلنا بنلاحظ شغفه وهوسه بموضوع معين ممكن يكون لاعب كرة قدم، سوبرهيرو معين، حيوان ما، الخ ——->> فبنستغل شغف الطفل بهاي المرحلة لندرسه أي موضوع عن طريق ربطه بهاد الشغف!
أمثلة على الطريقة:
🛑نساعد الطفل يمارس الجمع والضرب عن طريق انه يعمل بطاقة كرة قدم لأخوه، إذا كان محب للعبة
🛑يتعلم الجمع عن طريق لعبة الشدة إذا كان شغوف فيها
🛑يمارس القراءة والبحث العلمي عن طريق استكشاف المستنقعات مثل ما أنا عملت!
وهيك بكونوا تعلموا ودرسوا المطلوب منهم بعيداً عن الطريقة التقليدية الي بتعتمد على الطلب والزن من قبل الأهل!
وبتتحول العملية التعليمية لمتعة كبيرة لطفلك 😍😍 وبتعلم بدون ما يحس 👏👏
والأهم من هيك بتكونوا ضفتوا كثير لمخزون ذكريات أطفالكم المميزة معكم ❤️❤️
وانتو بشو ابنكم شغوف هاي الفترة؟
خبروني في التعليقات إذا بتحبوا أشاركم تجارب ثانية مع أولادي وطلابي 🥰
م. آية،
متخصصة في تصميم المناهج التعليمية في مجالات STEAM للأطفال والمدارس
