08/10/2025
🚨 في أنباء متداولة عن ظهور ٧ حالات وفاة بوباء "الدفتيريا" في منطقة الجريف، وفعلاً دي أخبار مؤسفة ومقلقة لو الخبر صحيح... لكن مهم جداً نوضح إنو المنشور دا ما للتهويل ولا لإثارة الخوف، بالعكس الغرض منو التوعية والتعامل بعقلانية مع الوضع.👍
مرض الدفتيريا سببو بكتيريا بتهاجم الحلق والمجرى التنفسي، وبتسبب التهاب شديد وتورم، وأحياناً غشاء رمادي بيقفل الحلق ويصعّب التنفس....
المرض بينتقل بسهولة عن طريق النفس أو العطس أو الملامسة، يعني لو في حالة واحدة في منطقة مزدحمة ممكن العدوى تنتشر بسرعة، عشان كدا الوعي والتصرف السريع لابُد منه.
لكن الحمد لله، المرض قابل للعلاج والوقاية... العلاج بيبدأ فوراً في المستشفى بمصل مضاد للدفتيريا مع مضاد حيوي زي Erythromycin أو Penicillin. المريض لازم يتعزل عن الناس لحدي ما يكون غير معدي.
أما الوقاية فهي بسيطة لكن فعالة جدًا:
أولاً، التطعيم — ودا أهم خطوة لأن لقاح الدفتيريا ضمن لقاحات الأطفال الأساسية في السودان، وبمنع المضاعفات الخطيرة.
ثانياً، المحافظة على النظافة، وغسل اليدين، وتجنب الزحمة خصوصاً في الأماكن البظهر فيها المرض.
📢 يا جماعة، الوعي أهم من الخوف...... ما عايزين الناس تتخوف أو تتناقل الشائعات، لكن لازم نكون جاهزين ونتعامل مع أي أعراض بجدية.
وأي زول يحس بآلام في الحلق، حرارة عالية، أو صعوبة في التنفس — يمشي أقرب مستشفى فوراً.
ربنا يحفظ الجريف وأهل السودان كلهم من كل سوء 🤲
– د. المقداد إبراهيم 🤲
- Almigdad Ibrahim
