01/09/2025
Usheega jiilkan dambe, in uu casrigu xawli ku socdo, isla markaana daqiiqad-kasta wax isbeddelayaan, qofka aan maanta ka gaashaaman oo aan naftiisa tacab gelinina uu berri khasaarayo.
Usheega jiilkan dambe, in fadhi-ku-dirirka iyo maqaaxi ka sheekayntu ay waqti h**e ahayd astaamo ilbaxnimo loo nisbeeyo, balse maanta ay tahay dib-u-dhac, waqti lumis, iyo in khayrka aad ka hadho oo maalinta berri aad cidlo taagnaato.
Usheega jiilkan dambe, in baraha bulshada iyo App-yada cusub ee maalin kasta iska daba imanaya ay yihiin aalado loogu talagalay in ganacsato ka macaashaan wakhtigaaga iyo dareenkaaga. Iyagu faa’iido ayay ka helayaan, inaguna in yar mooyee waa aynu ku khasaaraynaa dhaqan ahaan, cilmi ahaan, diin ahaan iyo mustaqbal ahaanba.
Usheega jiilkan dambe, in qoomamada iyo fashilka wadankeena ka muuqdaa uu ku yimi jiil hankoodii iyo hal-abuurkoodii hunguri iyo dano gaaban isugu geeyay, kadibna aynu ka dhaxalnay waddan sidan u liita.
Usheega jiilkan dambe, in baratanka sawirba sawir ka qurux badan yahay, beenta, faanka iyo muuqaal iska duubistu aanay waxba ka goyn nolosha, balse waxa dhabta ahi uu yahay inaad naftaada runta u sheegto, u soo jeedsato, isla markaana ku mashquusho dhisideeda.
Ugu dambayn, usheega jiilkan dambe, in urursashada xirfadaha micnaha leh ee maanta iyo mustaqbalka dhowba faa’iido u leh, iyo ka faa’iidaysiga fursadaha internetka dhex yaalla, ay yihiin waxa kaliya ee aynu ku badbaadi karno, kuna gaadhi karno nolosha aynu higsanayno.
Jiilkan dambe waa in uu fahmaa, wakhtigu waa maalgashi, maskaxdu waa hanti, hal-abuurkuna waa hubka keliya ee lagu jebin karo jahawareerka iyo dib-u-dhaca.
Rugsan Pharmacy & Clinic
