Naadiga Qalinjabiyaasha Caafimaaddka Jaamacadda Umadda Soomaaliyeed

18/02/2026

𝐇𝐚𝐦𝐛𝐚𝐥𝐲𝐨 𝐁𝐢𝐥𝐚𝐬𝐡𝐚𝐝𝐚 𝐁𝐢𝐬𝐡𝐚 𝐁𝐚𝐫𝐚𝐤𝐞𝐞𝐬𝐚𝐧 𝐞𝐞 𝐒𝐨𝐨𝐧 🌙

Guddoomiyaha Naadiga Qalinjabiyaasha Caafimaadka Jaamacadda Ummadda Soomaaliyeed Dr. Axmed Cusmaan Ibraahim ( Dr. Shuqul), wuxuu hambalyo iyo bogaadin u dirayaa dhamaan ummadda Soomaaliyeed, gaar ahaan bahda Caafimaadka, bilashada bisha barakeysan ee Soon .Bisha barakeysan ee Ramadaan waa bil raxmad, dembi-dhaaf iyo naarta oo laga xoreeyo adoomada Alle. Waa bil uu Alle (SWT) uu naxariistiisa balaariyo, ducada aqbalo, dambigana ku dhaafo.

Waxaan Alle SWT ka baryeynaa inuu inoo naxariisto, dambiyadeena dhaafo, acmaasha wanagsan naga aqbalo, nagana xoreeyo Naarta. Sido kale uu Alle nawaafajiyo habeenka Leylatul-qadri oo Ka qeyr badan kun bilood.Sidoo kale, Naadiga wuxuu ku baraarujinayaa dhamaan bulshada in laga faa’iideysto fadliga bishan barakeysan, lana badiyo camalka suuban.

Dalkeena Soomaaliyeed wuxuu wajahaya xaalado adag, gaar ahaan abaarta saameysay dad badan oo walaalaheen ah. Sidaa darteed, waxaan ku boorineynaa bulshada in loo duceeyo dalka iyo dadka, isla markaana la muujiyo garab istaag iyo gurmad intii karaanka ah. Alle ha naga aqbalo soonkeena, salaadeena iyo sadaqadeena, Alle hanaga dhigo kuwa ka faa’iidaysta fadliiyo Bishan Barakeesan.

SOON WANASAN🌙


DHAMAAD

12/02/2026

HAMBALYO IYO BOGAADIN

Naadiga Qalinjabiyaasha Caafimaadka Jaamacadda Ummadda Soomaaliyeed (JUS) wuxuu hambalyo iyo bogaadin u dirayaa dhamaan dhaqaatiirta Soomaaliyeed ee ku guuleystay Imtixaanka Takhasuska Caafimaadka ee ay qaaday Isbitaalka Tababarada iyo Cilmi-baarista Muqdisho Somali Turkey ( Ex-Digfeer).

Waxay guushan ka tarjumaysa dadaal, karti, aqoon iyo dulqaad ay muujiyeen dhaqaatiirta, waxaana u rajeynenaa in dadaalka halkaas ay ka sii wadaan. Waxaan hambalyo gaar ah u diraynaa:
Dr. Niciima Cabdirisaaq Cumar
Dr. Usaman Xasan Xuseen
Dr. Ibrahim Cabdullahi Xaashi

Dhaqaatiirtan waxay ka mid yihiin dhaqaatiirta ka qalinjabiyay Jaamacadda Ummadda Soomaaliyeed (JUS), waxayna ku guuleysteen kaalmooyin sare, taasoo muujinaysa tayada iyo heerka waxbarasho ee ay heleen.

Ugu dambayn, waxaan dhamaan guuleystayaasha u rajaynaynaa horumar joogto ah, mustaqbal ifaayo, iyo in ay door muuqata ka qaataan horumarinta iyo tayeynta adeegyada caafimaadka bulshada Soomaaliyeed.
DHAMAAD

01/02/2026

Madaxweynaha JFS Mudane Dr. Xasan Sheekh Maxamuud ayaa u magacaabay masuuliyiinta hoos ku xusan xilalka Guddoomiye Kuxigeennada Jaamacadda Ummadda Soomaaliyeed:

1-Prof. Dr. Cabdirisaaq Cabdullaahi Xaashi – Guddoomiye Kuxigeenka Arrimaha Tacliinta
2-Ms. Deeqa Maxamed Qaalib – Guddoomiye Kuxigeenka Maamulka iyo Maaliyadda
3-Prof. Dr. Cabdullaahi Sheekh Rashiid – Guddoomiye Kuxigeenka Arrimaha Ardayda iyo Isku Xirka Bulshada
4-Dr. Cali Cawil Axmed – Guddoomiye Kuxigeenka Arrimaha Cilmibaarista iyo Hal-abuurka
5-Dr. Fuaad Mirre Xasan – Guddoomiye Kuxigeenka Arrimaha Qorshaynta iyo Horumarinta

Madaxweynaha Jamhuuriyadda Federaalka Soomaaliya, Dr Xasan Sheekh Maxamuud ayaa faray masuuliyiintan in ay xilka culus ee loo igmaday u gutaan si waafaqsan shuruucda dalka, isaga oo u rajeeyay masuuliyiintan cusub guul iyo hufnaan.

Ugu danbeen wuxu Naadiga Qalinjabiyaasha Caafimaaddka Jaamacadda Umadda Soomaaliyeed mar labaad leeyahay hambalyo, Alle ha idin fududeyo masuuliyadda.

DHAMMAAD

27/01/2026

HAMBALYO IYO BOGAADIN

Naadiga Qalin-jabiyaasha Caafimaadka Jaamacadda Ummadda Soomaaliyeed wuxuu si sharaf, qadarin iyo bogaadin mug leh ugu hambalyeynayaa
Dr. Faadumo Yuusuf Aybakar, oo ka mid ah dhakhaatiirta ka qalin-jabisay Jaamacadda Ummadda Soomaaliyeed, kuna suntan karti sare, akhlaaq iyo go’aan qaadasho xirfadeed oo ku dhisan mas’uuliyad iyo aqoon.

Waxay Dr. Faadumo si muuqata uga dhex iftiintay howsha culus ee la tacaalida bukaanada xaaladaha halista ah, iyadoo muujisay faham qoto dheer, dulqaad iyo feejignaan caafimaad oo sare, taas oo keentay in ku abaalmariyaan Maamulka sare ee Isbitaalka Xooga daka Soomaaliyeed. Go’aanadeeda caafimaad waxay tusaale u yihiin sida aqoonta saxda ah iyo maarayn xirfadeed ay door weyn uga qaataan, daryeelka bukaanka iyo xoojinta badqabka bukaanada.

Naadigu wuxuu rumeysan yahay in dadaalka Dr. Faadumo uu ka tarjumayo kaalinta muhiimka ah ee ay dhaqaatiirta Soomaaliyeed ka ciyaaraan badbaadinta nolosha, kor u qaadista kalsoonida bulshada ee adeegyada caafimaadka, iyo dhismaha nidaam caafimaad oo waara. Waxay sidoo kale dhiirigelin u tahay ardayda caafimaadka iyo dhaqaatiirta da’da yar, iyadoo muujineysa in aqoon, dulqaad iyo hufnaan ay yihiin tiirarka ugu waaweyn ee lagu gaari karo horumar caafimaad oo dhab ah.

Naadiga Qalin-jabiyaasha Caafimaadka Jaamacadda Ummadda Soomaaliyeed wuxuu mar kale ku bogaadinayaa Dr. Faadumo guushan wax ku oolka ah, isaga oo u rajeynaya horumar dheeraad ah, guulo miro dhal ah, iyo sii wadidda adeegga naf-hurnimada leh ee ay ugu adeegayso bukaanka iyo bulshada Soomaaliyeed guud ahaan.

DHAMAAD

Xafiiska Warfaafinta Naadiga Qalinjabiyaasha Caafimaadka Jaamacadda Ummadda Soomaaliyeed
Faafaahin dheeri ah fadlan nagala soo xiriir.
snu.med.alumni@gmail.com

22/01/2026

MAHADCELIN IYO BOGAADIN

Marka h**e Alle SW ayaa mahad iska leh oo Webinar-ka si wanagsan inoogu soo dhameye wuxuu sidoo kale Naadiga Qalinjabiyeyaasha Caafimaadka ee Jaamacadda Ummadda Soomaaliyeed si qoto dheer uga oo lasoo koobi karin ugu mahadcelinaynaa Dr.Maxamed Nur Cali iyo Dhaqaatiirta kaso qebgashay webinar-kii MRCPCH Part 1 & 2, kaas oo uu soo jeediyay Dr. Mohamed Nur Ali (MBChB, MRCPCH 1 & 2), khabiir ku takhasusay cudurrada carruurta .

Waxaan sidoo kale u mahadcelineynaa Kulliyadda Caafimaadka iyo Qalliinka Jaamacadda Ummadda Soomaaliyeed oo gacan buuxda ka geysatay abaabulka iyo taageerada webinar-kan, taasoo cadeynaysa sida ay uga go’an tahay kor u qaadista aqoonta, xirfadaha, iyo waayo-aragnimada dhaqaatiirta Soomaaliyeed.

Ugu danben Naadiga Qalinjabiyeyaasha Caafimaadka waxa uu sii xoojinayaa dadaallada aqoon isdhaafsiga iyo tababarrada cilmiyeed ee dhaqaatiirta, isagoo ka go’an in la abuuro fursado joogto ah oo kor loogu qaado xirfadaha caafimaad ee gudaha iyo dibadda dalka, laguna taageero horumarinta caafimaadka bulshada Soomaaliyeed.

19/01/2026

Ogeysiis Muhiim ah

Naadiga Qalinjabiyeyaasha Caafimaadka ee Jaamacadda Ummadda Soomaaliyeed, oo garab ka helaayo Kulliyadda Caafimaadka iyo Qalliinka Jaamacadda Ummadda Soomaaliyeed, waxay dhaqaatirta ku martiqaadaysaa webinar cilmiyeed gaar ah oo ku saabsan MRCPCH Part 1 & 2.

Waxaa Webinar-kan soo jeedin doona Dr. Mohamed Nur Ali (MBChB, MRCPCH 1 & 2), oo ah khabiir ku takhasusay cudurrada carruurta, kana tirsan Somali Türkiye Training and Research Hospital - Muqdisho.

Waxaa uu tababarka diiradda saarayaa diyaargarow qoto dheer, istaraatiijiyado oo cilmi iyo waayo-aragnimo ku dhisan, iyo khibrado dhab ah oo ku saleysan waayo-aragnimada imtixaanka MRCPCH, isaga oo ujeedkiisu yahay in la xoojiyo aqoonta, kalsoonida, iyo diyaargarowga xirfadeed ee dhakhaatiirta ee isu diyaarinaya imtixaanada caalamiga ah ee horumariya xirfadooda caafimaad.

Sidas darteed, Webinar-kan waxa uu u furan yahay dhammaan dhaqaatiirta ku takhasusaya cudurrada carruurta, qalinjabiyeyaasha kulliyadaha caafimaadka, iyo guud ahaan dhakhaatiirta daneynaya imtixaanka MRCPCH.

Waqti iyo Goob:
🗓 Arbaco, 21 Janaayo 2026
⏰ 7:30 fiidnimo
📍 Fogaan arag (Online)

DHAMAAD

13/01/2026

13/01/2026

Shirka Qaran ee Maalgelinta Caafimaadka Gudaha iyo Aasaaska Caymiska Caafimaadka Qaranka, kaas oo ka socda Hoolka Prof. Shariif Saalax.
Shirku wuxuu diiradda saaraya dhismaha nidaam caymis caafimaad oo qaran iyo xoojinta maalgelinta caafimaadka.

31/12/2025

Jaamacadda Ummadda Soomaaliyeed, oo kaashanaysa Wasaaradda Caafimaadka iyo Daryeelka Bulshada ayaa qabanaysa Shirka Qaran ee Dood-wadaagga Maalgelinta Caafimaadka iyo Nidaamka Caymiska Caafimaadka Qaranka.
Shirku wuxuu isu keenayaa masuuliyiin, aqoonyahanno, khubaro iyo daneeyayaal si looga doodo mustaqbalka maalgelinta caafimaadka, hirgelinta caymiska caafimaadka qaranka, loona xaqiijiyo adeegyo caafimaad oo caddaalad iyo sinnaan leh, lana yareeyo culayska dhaqaale ee muwaadiniinta.

14/12/2025

Xarig Jarka Masraxa Prof. Shariif Saalax ee Jaamacadda Ummadda Soomaaliyeed

Muqdisho 14,Deceembar 2024, Naadiga Qalinjabiyaasha Caafimaadka ee Jaamacadda Ummadda Soomaaliyeed (JUS) waxa uu sharaf weyn u ahaa ka-qaybgalka xafladda xarig-jarka Masraxa Prof. Shariif Saalax, oo si heer sare ah loo soo agaasimay, isla markaana astaan u ah horumarinta kaabeyaasha waxbarasho iyo cilmiyeed ee Jaamacadda Ummadda Soomaaliyeed.

Xafladdan qiimaha badan waxaa ka soo qaybgalay Ra’iisul Wasaaraha Jamhuuriyadda Federaalka Soomaaliya Mudane Xamsa Cabdi Barre, maamulka sare ee Jaamacadda Ummadda Soomaaliyeed, wasiiro, xildhibaano, madaxda jaamacadaha dalka, agaasimayaal, professors, barayaal, saraakil,haween, arday, iyo qaybo kala duwan oo bulshada ka tirsan.

Naadigu waxa uu bogaadinayaa dadaalka joogtada ah ee lagu horumarinayo waxbarashada sare, gaar ahaan abuurista goobo casri ah oo u adeegaya barashada, cilmi-baarista iyo wada-xaajoodyada aqooneed. Waxs sidoo kale u mahadcelineynaa dhammaan masuuliyiinta, marti-sharafta iyo bahda waxbarashada ee ka qayb qaatay hirgelinta iyo guusha munaasabaddan.

Ugu dambayn, Naadiga Qalinjabiyaasha Caafimaadka JUS waxa uu mar walba garab taagan yahay dadaallada kor u qaadaya tayada waxbarashada, midnimada aqoonyahanka, iyo horumarka guud ee dalka.

Mahadsanidiin

13/12/2025

Masraxa Shariif Salax ee Jaamacadda Ummadda Soomaaliyeed.