18/08/2025
مبارح فاتت لعندي سيدة باين عليها التوتر وقالتلي: "زكاتك، فيكي تقليلي لشو هالأدوية؟" وناولَتني الوصفة اللي كان فيها:
🔹 جينكوتان Ginkotan (هيومن)
🔹 يونيسيتام Unicetam (يونيفارما) تركيبته Piracetam
ولأن الصيدلية كانت معجوقة، جاوبتها بسرعة: الأول متمم غذائي (فيتامينات + جينكو + جينسينغ)، والتاني غالباً يُستخدم لمشاكل الذاكرة والزهايمر وبعض الحالات النفسية…
وفجأة، السيدة صارت تصرخ بخوف:
💔😢 "ما بدي أدوية نفسية ماني مريضة نفسية
بهاللحظة حسّيت اديش كلمة وحدة "مو بمحلها" ممكن تزرع خوف بقلب المريض.
⬅️أخدت نفس وقلتلا خبريني شو صاير معك فقالتلي طلع عندي ضعف بسيط بالسمع والدكتور وصفلي هالدوا
✅طبعاً هون عرفنا السبب لأن حسب عدة دراسات تم اقتراح البيراسيتام كعلاج لبعض حالات نقص السمع الحسي العصبي وطنين الأذن، إذ وُجد أنه يزيد من تدفق الدم واستهلاك الأوكسجين في الدماغ، وهيك الاستطباب اختلف تماماً ..
⭕️ملاحظة سريعة : الاستطباب هاد لسا عم يندرس لهلا ولم يتم إثباته 100%
المهم الحمد لله المريضة ارتاحت وقت سمعت الشرح واخدت أدويتها وطلعت 💚
بس بعد هالموقف تعلمت انو عنجد أحياناً المريض ما بيكون ناطر تحاكيه بمصطلحات معقدة ليعرف إنك فهمان وإنما قد يكون ببساطة بحاجة لكلمة وحدة تطمنو
بالإضافة إلى انو السرعة بالإجابة وارد جداً تعمل خوف بدل ما تزرع ثقة
—————————-
