عيادة الدكتورة لودي سكرية لطب الأطفال_Dr loudy sukaria paediatric clinic, حمص_ فيروزة _الطريق العام

15/07/2023

مسالخير أطفالي الغاليين ...اشتقتلكن😍😍
رح كون معكن بكرا ضمن فعالية مركز فيروزة الصحي بمناسبة عيد مار الياس من الساعة 9 صباحآ حتى 12 ظهرآ
تضلو بخير أطفالي ...

15/03/2023

مسالخير لأطفالي الغاليين 😍😍
بعتزر منكن بسبب غيابي عن العيادة هالفترة بسبب ولادة طفلي ...نشالله برجع عن قريب
بتمنى السلامة لكل أطفالي
د.لودي سكرية

18/02/2023

مسالخير
بداية بنطلب من ربنا الرحمة لأرواح جميع الناس بزلزال شباط ..والشفاء العاجل للجرحى..والصبر والمعونة لجميع العائلات المنكوبة
بدي خبركن اني جاهزة للمساعدة بعيادتي لجميع الأطفال المتضررين بالزلزال بأي وقت..
التواصل عالأرقام عصفحة العيادة

02/02/2023

بونجوركن أطفالنا الحلوين بهالبردات 🌨🌨 بتمنى من كل الماميات ينتبهو عأطفالن بهالمنخفض البارد ...وانا موجودة معكن بعيادتي...السلامة والشفاء لكل أطفالنا 😍😍

02/01/2023

صباح الخير لكل الأطفال والماميات الحلوين😍😍
نشالله أعياد مباركة وسنة حلوة عالجميع😍😍
رح نكمل اليوم موضوع التغذية عند الأطفال ونحكي عن 🌿🌿

لازم تعرفي يا ماما أنو الحليب لحالو بهاد العمر ما عاد يكفي احتياجات جسم طفلك ولازم تبدي تدخليلو الأكل بالتدريج

#أولآ: النصائح المهمة لإدخال الأكل عند الطفل:

** نفذي قاعدة 1×3: يعني جربي نوع واحد من الأكل فقط لمدة 3 أيام وإذا صار عندو حساسية من هالنوع لازم توقفي فورآ وتراجعي الطبيب.
طبعآ أعراض الحساسية طفح جلدي_ إسهال_ إقياء_ امساك

** قدمي وجبة أكل واحدة باليوم ثم نزيد تدريجيآ وجبتين ثم ثلاث وجبات ... والوجبة بالبداية ما لازم تتعدى 3 ملاعق طعام صغيرة.

** الأكل لازم يكون مسلوق ومهروس جيدآ وممدد بالماء أو الحليب الصناعي أو حليب الأم.

** مسموح تشربي طفلك مابين 60_120 مل من الماء باليوم حتى نساعد على البلع و عملية الهضم.

** إذا رفض ابنك نوع معين من الطعام وقفي وقدميلو ياه بعد فترة.

** كل طفل مختلف عن الثاني فلا تقارني طفلك بغيرو المهم يكون نشاطو ومعدل زيادة وزنو جيد حسب عمرو.

** طعمي ابنك وهوي جالس حتى مايصير عندو شردقة.

** لا تلهي ابنك بالموبايل أو التلفزيون أثناء الأكل لأن هالقصة رح تصرف انتباهو عن الأكل نهائيآ.

** مع إدخال الأكل رح تقل الرضاعة عند طفلك لكن مافيكي توقفيها نهائيآ وفيكي ترضعي 3_4 رضعات باليوم.

#ثانيآ: أنواع وجبات الطعام اللي فينا نقدمها للطفل:

👦الحبوب: مثل الأرز_ الشوفان_ القمح_ السيريلاك_ البسكويت السادة.
👦الخضار: بطاطا مسلوقة_ جزر_ كوسا_ بروكلي_ بازلاء_ فاصولياء_ قرع .. طبعآ كلها مسلوقة ومهروسة جيدآ بالخلاط
👦الفواكه: تفاح_ موز_ إجاص_ خوخ_ برتقال_ جوافه
👦 اللبن الرائب ومنتجاته مهمة جدآ لأنها بتساعد على عملية الهضم وتعويض البكتيريا النافعة للأمعاء.
👦اللحوم: بعد إكمال 6 أشهر ولازم تكون مسلوقة ومهروسة جيدآ بالخلاط.
👦صفار البيض: 3 مرات أسبوعيآ.

#ثالثآ: الأكل الممنوع إدخاله لطفلك بهالعمر:

💥 ممنوع تقديم حليب البقر قبل عمر السنة لاحتوائه على بروتينات يصعب على الجهاز الهضمي للطفل هضمها بهالعمر.
💥 ممنوع تقديم العسل للطفل قبل عمر السنة لاحتمال تلوثه بجراثيم المطثية الوشيقية التي يمكن أن تسبب تسمم للطفل وتشنجات عضلية قد تؤدي للوفاة.
💥 ممنوع إضافة السكر للطعام لأن:
١- عملية تصنيع السكر تحوي على مواد كيميائية ضارة للطفل
٢- السكر بيخلي الطفل يرفض باقي الأطعمة
٣- يسبب تسوس الأسنان
٤- يسبب السمنة عند الأطفال
💥 ممنوع إضافة الملح للطعام لأن:
١- الكلية بهذا العمر لا تستطيع التخلص منه
٢- يسبب اضطرابات شاردية قد تودي بحياة الطفل
💥 ممنوع إدخال عصير الفواكه للطفل قبل عمر السنة لاحتوائه على كمية كبيرة من الماء والسكر التي تقلل من شهية الطفل وتسبب إسهالات وتسوس أسنان
💥 ممنوع إدخال بياض البيض قبل عمر السنة بسبب احتوائه على البروتين اللي بيسبب حساسية للطفل

وهيك منكون خلصنا موضوع التغذية عند الأطفال...

دمتم بخير أطفالي الحلوين😍😍
د. لودي سكرية

31/12/2022

لكل أطفالي الغاليين بتمنى عام جديد مليئ بالصحة والسعادة...ونشالله 2023 بتكون سنة خير عالجميع يارب😍😍😍

24/12/2022

صباحكن خير أطفالي الغاليين😍😍
كل عام وأنتو بالف خير بمناسبة عيد الميلاد المجيد🌲🌲
رح تعطل العيادة يوم الأحد بمناسبة الميلاد🌲🌲
بتمنى لكل الأطفال عيد سعيد 🌲😍🌲
دمتم بخير أطفالي الحلوين😍😍
د.لودي سكرية

12/12/2022

بونجوركن أطفالي الغاليين😍😍
اليوم رح نحكي عن موضوع # .. رح نحاول نجاوب بهالبوست عن جميع التساؤلات عند الأمهات حول هالموضوع...ورح نقسم موضوع التغذية لقسمين نظرآ لطول الموضوع...
#أولآ: التغذية عند الأطفال قبل عمر 6 أشهر
#ثانيآ: التغذية عند الأطفال بعد عمر 6 أشهر

:

👦 لا يحتاج طفلك في هذا العمر سوى الحليب وممنوع إدخال أي طعام أو ماء أو سوائل أخرى قبل عمر 6 أشهر.

👦 يعتبر حليب الأم هو الغذاء المثالي للمواليد الجدد إلا في حالات خاصة لا تكون فيها الرضاعة الطبيعية ممكنة(رح نحكي عن هالحالات ببوست لاحق) هنا نستخدم الحليب الصناعي.

👦يوصى بالبدء بالرضاعة خلال الساعات الأولى بعد الولادة والاستمرار بها حتى عمر سنة ونصف لسنتين إن أمكن.. وكلما زاد مقدار الحليب الذي يرضعه الطفل زاد مقدار الحليب الذي يقوم الثدي بتكوينه.

👦 يوصى بإرضاع الطفل حديث الولادة خلال الشهر الأول بشكل عشوائي (يعني كل ما بكي ياماما لازم ترضعي) ويبلغ عدد الرضعات بهالعمر تقريبآ من 10_12 رضعة خلال اليوم.
👦بالشهر الثاني والثالث: 8_10 رضعات خلال اليوم.
👦بالشهر الرابع حتى الشهر السادس: 6_8 رضعات خلال اليوم..
💥💥ويمكن بعد الشهر الرابع البدء بالتغذية التكميلية إضافة للحليب لكن ضمن شروط معينة ( رح نحكي عنا بالبوست القادم).

🌿مدة الإرضاع🌿
يستغرق الإرضاع من 10 حتى 25 دقيقة أو حتى يظهر الطفل علامات الشبع مثل الانفصال عن الثدي أو بطء مص الثدي.
ويجب وضع الطفل على الثدي من 10_15 دقيقة قبل الانتقال للثدي الآخر حتى يحصل الطفل على كل أنواع الحليب المفيدة خلال الرضعة الواحدة ( يعني يا ماما مالازم تشيلي طفلك عن الثدي قبل 10 دقايق لأنو الحليب بتتغير مواصفاتو خلال الرضعة الواحدة).

👦يفضل التناوب بالإرضاع بين الثديين والحرص على تنظيف الحلمة قبل الإرضاع بالماء الفاتر.

🌿الأوضاع الصحيحة للرضاعة🌿
يكون الطفل بوضعية نصف الجلوس ويجب أن يحيط فم الطفل بالحلمة ونصف الهالة عند الرضاعة.

🌿 فوائد حليب الأم🌿

* يحتوي على جميع العناصر الغذائية للطفل خلال 6 أشهر الأولى.
* يحتوي على الأضداد المناعية التي تحمي الطفل من الإصابة بكثير من الأمراض.
* يقوي العلاقة الروحية بين الأم والطفل.
* حرارته مناسبة لطفلك.
* اقتصادي ووفير مقارنة مع الحليب الصناعي.
* يقلل من خطر السمنة على المدى البعيد.
* الأطفال الذين تلقوا رضاعة طبيعية يحققون نتائج أفضل في اختبارات الذكاء من الأطفال الذين تلقوا الحليب الصناعي.

💥 مساوئ حليب الأم 💥
* يعتبر فقير بالفيتامين د لذلك يجب تعويض الفيتامين د فمويآ للأطفال من الولادة حتى عمر السنتين بجرعة يومية 400 وحدة دولية.
* يعتبر فقير بالفيتامين ك لذلك يجب إعطاء الفيتامين ك عضليآ لجميع الأطفال حديثي الولادة بجرعة 1 ملغ.

💥💥 السؤال المهم لكثير من الأمهات هو كيف نستطيع معرفة كفاية الطفل من الحليب
👦 المعيار الأهم هو زيادة وزن الطفل.
👦 هدوء الطفل بعد الرضاعة.
👦 عملية التبرز 4 مرات أو أكثر ( سؤال لكثير من الأمهات أنو طفلي عم يتبرز 4_5 مرات باليوم ويعتبر هاد الشي طبيعي طالما رضاعة طفلك جيدة).
👦 عملية التبول 5 مرات أو أكثر.

دمتم بخير أطفالي الحلوين😍😍
د. لودي سكرية

03/12/2022

بونجوركن أطفالي الغاليين😍
بحلول شهر الميلاد رح تكون المعاينات مجانية ليوم الأحد.. لكل أم بتحب تطمن على أطفالا أنا موجودة بعيادتي من الساعة 10 صباحآ حتى الساعة 2 ظهرآ.

دمتم بخير أطفالي الحلوين😍😍
د. لودي سكرية

29/11/2022

بونجوركن أطفالي الغاليين😍😍😍
متل ما وعدتكن بالبوست السابق رح أحكيلكن عن الحالات اللي بيكون فيا السعال خطير عند الأطفال ويستدعي مراجعة الطبيب فورآ:

🌿 صعوبة تنفس أو تسرع تنفس.
🌿 زرقة شفاه أو وجه أو لسان.
🌿 ترفع حروري شديد.
🌿 العمر أقل من 3 أشهر.
🌿 إذا ترافق السعال مع دم.
🌿 إذا أصدر الطفل صوت ديكي عند التنفس.
🌿 إذا كان التنفس مصحوب بصرير أو صفير.

💥💥فقط بهالحالات بتراجعي الطبيب فورآ لفحص الطفل وتقييمه.

😷😷 أمهاتنا الغاليين لا تقلقلو إذا طالت فترة السعال أو الرشح عند الأطفال السبب هوي النكس المستمر و العدوى المتكررة.
لذلك بتمنى من كل أمهاتنا الغاليين عدم إرسال الأطفال للمدرسة حتى الشفاء💥💥💥 لأنو الطفل عم يتعرض للهواء البارد ويصير عندو نكس مستمر.

دمتم بخير أطفالي الحلوين😍😍
د. لودي سكرية

23/11/2022

كلنا مرشحين وعم نسعل😷😷
اوووف من السعلة اللي ابتدت وما كانت تنتهي😷😷
اليوم رح خبركن عن #
#

🌿 تعريف السعال🌿
هو رد فعل صحي يساعد الطفل على التخلص من المواد الغريبة والميكروبات من الطرق الهوائية.
👦 قد يكون السعال جاف أو منتج لقشع... أما القشع أو البلغم فهو مزيج من المخاط والفضلات والمواد المطروحة من الرئتين.

🌿أسباب السعال🌿

* السعال التالي للأمراض التنفسية الفيروسية أو الجرثومية مثل: التهابات الجيوب الأنفية_التهاب البلعوم_ التهاب القصبات والقصيبات_ ذات الرئة_ الربو _ التوسع القصبي.
* السعال التالي لاستنشاق الأجسام الغريبة.
* السعال التالي للقلس المعدي المريئي.
* السعال التالي للتعرض للمهيجات مثل الدخان والعطور والغبار والروائح المخرشة.
* السعال التحسسي التخريشي التالي للرشح وللأسف قد يستمر أسبوعين او أكثر والمهم هنا فحص الصدر لنفي وجود إصابة قصبية أو رئوية مرافقة.

🌿 علاج السعال🌿

👦 الأدوية: مثل بخاخات الأنف وشرابات السعال وجلسات الارذاذ وكلها تحت إشراف طبي.
💥💥 وهون لازم أحكي عن النقطة المهمة اللي هي خطورة الشرابات المقشعة والمثبطة للسعال بسبب تثبيط نزح البلغم من الطرق الهوائية... يعني يا ماما انتي لما بتعطي الطفل شراب مثبط للسعال أو مقشع صح رح تساعدي بعملية التقشع لكنك ماعم تطردي البلغم من الرئتين وبالتالي رح يسبب هالشي ذات رئة أو خطورة باستنشاق المفرزات. لذلك يوصى بشدة بعدم إعطاء الشرابات المقشعة والمثبطة للسعال تحت عمر 12 سنة.
✋ يستثنى من الشرابات ما هو نباتي المصدر مثل شراب اللبلاب والزنجبيل والزعتر البري.

👦 السوائل الدافئة: بتساعد بمقاومة المرض وترطيب الطرق الهوائيةوتخفيف الاحتقان... مثل شراب العسل مع الليمون وشراب العسل مع الزنجبيل وشراب الزعتر البري....✋✋لكن يمنع العسل للاطفال تحت عمر السنة.

👦 القطرات الأنفية: تساعد قطرات الأنف الملحية بتنظيف الممرات الأنفية وبقاؤها مفتوحة.

👦 التدليك بالمنثول أو زيت النعناع: يمكن تدليك زيت النعناع على الصدر والوجه الأمامي من الرقبة للأطفال الأكبر من سنتين حيث يساعد استنشاق رائحة الزيت على تحسين تدفق الهواء عبر الممرات الأنفية والتخفيف من حدة السعال.

🌿 الوقاية من السعال🌿
تكون بالابتعاد عن المهيجات مثل العطور والدخان والغبار والصوف والوبر والعث وزيوت القلي والرطوبة والهواء البارد..إضافة لعلاج الأمراض المسببة للسعال..

وهيك بكون حكيتلكن عن السعال وأسبابه وعلاجه والوقاية منه✌✌ انطروني بالبوست القادم للحديث عن الحالات اللي بيكون فيا السعال خطير.

دمتم بخير أطفالي الحلوين😍😍
د. لودي سكرية

18/11/2022

🌿كيف أحول طفلي لشام؟🌿
أكيد كلنا سمعنا وشفنا قصة الطفلة المعجزة شام✌✌😍😍 وأكيد كل أم بتتمنى يصير ابنها متل شام وأكتر📖✌
لكن السؤال ليس كيف أحول طفلي لشام إنما كيف أبحث عما بداخل طفلي واستثمره 📖✌
كل طفل بيملك بداخلو جوهرة مخبأة إذا خرجت رح تنور العالم أجمع لهيك بتمنى من كل أم تبحث عن هالجوهرة وما تتركها تنطفي📖✌
حبيت بهالبوست قدملكن بعض النصائح والارشادات

👦 #أولآ: تدريب دماغ الطفل: عن طريق اللجوء لألعاب تستهدف أداء الدماغ هاد الشي بيعزز التركيز ومهارات التحليل لدى الطفل وبيساعد على تحسين الذاكرة ومنها: ألعاب الذاكرة_الصور المتقطعة_الكلمات المتقطعة_تلوين الصور.

👦 #ثانيآ: النوم لساعات كافية: لازم ينام طفلك 7_9ساعات على الأقل لأن اضطراب النوم يسبب اختلال بالوظائف المعرفية عند الطفل مثل الانتباه والتركيز والذاكرة إضافة لتأثيره على المزاج والسلوك اليومي لدى الطفل.

👦 #ثالثآ: تجنب التعب والجوع: لأن تقديم الغذاء الصحي للطفل يساعد على تعزيز القدرات الجسدية والعقلية لديه..ومن الأطعمة الصحية الحليب ومشتقاته واللحوم ومنتجات القمح وتجنب السكريات والدهون الضارة.

👦 #رابعآ: التقليل من الألعاب الالكترونية ومشاهدة التلفاز: لأنها بتبعد الطفل عن القيام بالأنشطة الأكثر استخدامآ للحواس إضافة لأن التغيرات المتكررة والمفاجئة بالصور بتقلل من فترة انتباه وتركيز الطفل بالأحداث المحيطة.

👦 #خامسآ: تقليل فترة الدراسة: ينصح الأهل بتنظيم فترات الدراسة ليكون على فترات زمنية قصيرة لمساعدة الطفل على حفظ المعلومات إضافة لطلب مهمة واحدة من الطفل في كل مرة وعدم تشتيته بطلب عدة مهمات دفعة واحدة.

👦 #سادسآ: تحفيز السلوك الإيجابي لدى الطفل: إما معنويآ بالكلام الإيجابي أو الاحتضان مثلآ، أو ماديآ بتقديم المكافآت للطفل لأن كلمات المدح والحب بتقوي ثقة الطفل بنفسه.

👦 #سابعآ: تجنب التعنيف والصوت المرتفع والمقارنات بين الأطفال: لأنها بتزيد السلوك العدواني ورفض الأوامر لدى الطفل.

👦 #ثامنآ: تشجيع الطفل على ممارسة الرياضة: إما بالحركة خارج المنزل أو داخله لأن الحركة بتساعد الطفل على تفريغ طاقاته.

👦 #تاسعآ: النظر مباشرة للطفل أثناء توجيه التعليمات: وتوجيه الكلام بطريقة واضحة وباستخدام جمل قصيرة إضافة لسؤال الطفل لتكرار الكلام الموجه إليه لأن هذه الممارسات بتساعد بتعزيز مهارة الاستماع لدى الطفل.

👦 #عاشرآ: تكرار المعلومات الدراسية أكثر من مرة لتثبيت المعلومات وحفظها وتجنب التلقين الجاهز للمعلومات لأنه يزيد تشتت الطفل وعدم تركيزه ويقلل من اعتماده على نفسه.

بتمنى لكل طفل مستقبل مشرق وحياة ناجحة😍😍

دمتم بخير أطفالي الحلوين😍😍
د. لودي سكرية

عيادة الدكتورة لودي سكرية لطب الأطفال_Dr loudy sukaria paediatric clinic

15/07/2023

15/03/2023

18/02/2023

02/02/2023

02/01/2023

31/12/2022

24/12/2022

12/12/2022

03/12/2022

29/11/2022

23/11/2022

18/11/2022

Address

Telephone

Website

Alerts

Contact The Practice

Shortcuts

Share

Category