Dr laila jafar

21/05/2026

بمناسبة بداية موسم الجوزاء 🌝
حابين ننزل بوست بتشكيلة أطفال برج الثور اللي نورونا بوصولهن خلال الشهر اللي مرق ♉

بترتيب الوصول عنا:
🩷ليمار
💙علي
💙ابراهيم
🩷تاليا
🩷غزل
🩷فرح
فازوا البنات عالصبيان هالشهر 🙂‍↕️🤣
والكل الكل اجوا بقيصريات 🙄 ما بعرف ليش كل الماميات بفضلوا القيصرية وما عم نقدر نقنعهن بالطبيعي 😪

الحمدلله ع سلامة الماميات والبيبيات جميعاً وان شاءالله يارب العمر الطويل السعيد الهني بصحة و أمان 🙏🏻🤍

19/05/2026

✨️ كيف منتجنب المخاض الباكر؟ ✨️

👆🏻أولاً .. شو قصدنا بالمخاض الباكر؟؟
المخاض الباكر يعني وقت تصير تقلصات منتظمة ومؤلمة قبل الأسبوع 37 من الحمل وما يأثر فيها المسكنات🤰🏻
ممكن تترافق مع انبثاق الاغشية (طقت مية الراس) وممكن لا

✌🏻ثانياً .. مهم نعرف إنو كل ما كانت الولادة أبكر كل ما احتاج البيبي رعاية ومتابعة أكتر بعد الولادة 👩🏻‍🍼
لهيك مهم نعرف عوامل الخطر وننتبه عليها و نبعد عن كلشي ممكن يسبب مخاض باكر 👩🏻‍⚕️

❔️ مين أكتر عرضة للمخاض الباكر؟
• الحمل بتوأم أو أكتر
• وجود ولادة مبكرة سابقة
• التهابات بولية أو مهبلية متكررة
• مشاكل بعنق الرحم أو الرحم
• السكري أو الضغط
• الجهد الزائد وقلة الراحة
• التوتر الشديد
⭕ والأهم… التدخين والأركيلة!⭕

للأسف كتير ناس لسا بيعتبروا الأركيلة “أخف” من الدخان…🚬
‼️ ولكن الأركيلة والدخان ممكن يزيدوا خطر:
⚠️ المخاض الباكر
⚠️ ضعف نمو الجنين
⚠️ نقص وزن البيبي عند الولادة
⚠️ مشاكل بالمشيمة والأوكسجين الواصل للجنين

✔️ حتى التدخين السلبي (وجود الحامل بمكان فيه دخان) ممكن يأثر كمان!

❔️ كيف بنقلل خطر المخاض الباكر؟
✅ المتابعة الدورية للحمل
✅ علاج أي التهاب بسرعة
✅ شرب كمية كافية من الماء
✅ التغذية الجيدة والراحة
✅ تخفيف التوتر قدر الإمكان
✅ الابتعاد عن التدخين والأركيلة بشكل كامل

🚨 ولازم تراجعي طبيبتك فوراً إذا صار عندك:
• تقلصات منتظمة
• ألم بأسفل الظهر
• نزول ماء
• إفرازات غير طبيعية
• ضغط أو ثقل بالحوض

🪻 رسالتنا: وقت نقلك بعدي عن الدخان والأركيلة و معلش اتنازلي واستغني عنهن لبينما ولدتي ما بكون الهدف نبعدك عن كل ما هو لذيذ و نعيشك حرمان.. كل نصيحة من دكتورتك هيي لصحتك و لصحة البيبي
فالرجاء الالتزام .. وإذا ما التزمتوا ما دخلني بالنتائج 🙂 فقد أُعذِرَ من أَنذَرَ


#الحمل #التدخين #الأركيلة

04/05/2026

اليوم رح نشارك ترحيب متأخر ببنوتة وصلت مستعجلة 🙂‍↕️

شمس كان المفروض تجي 15•5 ولكن هيي إنسانة مستقلة من أول خلقتها وماحدا بقرر أمورها عنها .. ف عملت مفاجأة و اجت ب 30•4 🥳
مامتها اسمها قمر 🌝
ولأن كانت كتير متحمسة ع جية بنتا و ناطرتها نطارة وما مصدقة تشوفها سمتها شمس ☀️
ومتل ما كلنا بنعرف القمر بيستمد نورو من الشمس 🙄
ف يعني هيي مصدر النور والدفا والحب لكل العيلة صارت 😌🤱🏻

ان شاءالله العمر الهني بالصحة والعافية لشمس و أهلا و جميع الأطافيل🙏🏻🤍

03/05/2026

كل الدعم والحب 🫂👏🏻👏🏻
تابعوا نرمين و اتعلموا كيف تأسسوا لحياة صحية خطوة خطوة 👣
نمط الأكل الصحي بحسن كل جوانب الحياة 🙌🏻
سواء صحية ولا نفسية ولا هرمونية ...

بدك:
• تنزل وزنك بدون حرمان؟
• تضبط نظامك الغذائي؟
• تحسن نمط حياتك؟
• تتعاملي مع متلازمة المبيض الأيضية متعدد الغدد الصماء (PMOS)؟ 💗
• تخفف من مقاومة الإنسولين؟

أنا نرمين صالح
أخصائية تغذية 🍏

بآمن إنو النتائج الحقيقية ما بتجي من الدايت القاسي…
ولا من حرمانك من الأكل يلي بتحبه ❌

الأساس هو نظام بسيط، متوازن،
ومناسب لنمط حياتك… لتقدر تستمر عليه 👌

هون رح تلاقي:
• أفكار أكل مشبعة وسهلة
• نصائح عملية قابلة للتطبيق
• تصحيح مفاهيم غذائية شائعة

إذا تعبت من محاولات ما بتكمل…
هاد المكان المناسب لتبلش بطريقة صح 💚

📩 تواصل معي لنبلش سوا

💬 شو أكتر هدف حابب تشتغل عليه بهالفترة؟



https://www.instagram.com/dt.narmen?igsh=MW5lNXlpdHp5Z21jbQ==

30/04/2026

طبعاً متل ما كلنا بنعرف
البنات زينة الحياة 😌
و بقول المثل: " يا بنات يا بنات يا بنات اللي ما خلفش بنات ما شبعش من الحنية ولا داقش الحلويات"

مناسبة هي المقدمة الجميلة هيي للترحيب ب روزا الأمورة 🩷😍
هالزهرة الحلوة وصلتنا يوم التنين بعد صبيين 🙄 يعني النطرة كانت طويلة و صبورة لمدة سنين ما بس ٩ شهور😁

معلش استحملونا نحنا بننحاز للبنات شوي 😪

الله يبعت لروزا و أهلا واخواتا و جميع البيبيات والأطافيل أحلا و أهنأ الأيام والمستقبل الآمن السعيد 🙏🏻🤍🤍🤍

27/04/2026

✨️ حالة من عيادتنا ✨️
راجعتنا سيدة عمرها 70 سنة 🌸
(ولود 4 ولادات طبيعية)
شكواها كانت بسيطة: ألم خفيف بأسفل البطن
ما كان في نزف أو أعراض مقلقة…
بس بعد فحص الإيكو كانت المفاجأة
🔹 وجود كيسة على المبيض الأيسر بحجم تقريباً 8 سم
🔹 وكيسة تانية على المبيض الأيمن بحجم حوالي 6.5 سم
🔹 مع سماكة خفيفة ببطانة الرحم
👩🏻‍⚕️ بهيك حالات، في نقطة مهمة كتير لازم نوضحها:
أي كيسة أو كتلة مبيضية بعد سن اليأس ما فينا نعتبرها “بسيطة” ونطنشها
ودايماً بتحتاج تقييم دقيق واستقصاءات إضافية ⚠️
بعد دراسة الحالة ومناقشة الخيارات مع المريضة،
تقرر إجراء العمل الجراحي المناسب للتشخيص والعلاج بنفس الوقت
والحمد لله 🙏🏻
تمت العملية بنجاح، والمريضة بحالة عامة جيدة وعم تتعافى بشكل ممتاز 🤍
💬 رسالتنا من هالحالة:
مو كل ألم بسيط يعني موضوع بسيط!
خصوصاً بعد سن اليأس…
أي عرض جديد، حتى لو خفيف، بيستحق نوقف عنده ونفحصه منيح
🪻 الكشف المبكر والتشخيص الدقيق
ممكن يغيّر كل القصة لصالحك

19/04/2026

اليوم يصادف تاريخ مميز جداً بالنسبة إلي 💜
لسببين ✌🏻
الأول طبعاً هوي إنو عيد ميلاد ماميتي😍 الله يخليها و يديم عليها الصحة والسلامة هيي و كل أمهاتكن يارب 🙏🏻✨️

والتاني هوي إنو ذكرى مرور سنة ع افتتاح العيادة 😌🙂‍↕️
ان شاءالله ع قبال سنين طويلة و سعيدة من الاستمراية والعطاء والصحة 🙌🏻

كل عام ونحنا وانتوا بألف خير 🎊🫂

15/04/2026

بيبي اليوم إجا بعد قصة نضال مو سهلة و صبر طويل

هالأمير الصغير هوي أول حمل بعد عقم بدئي استمر ٤ سنين
و طبعاً بعد كل هالنطرة مفكرين رح يهني إمو بحمل سهل؟؟ أكيد لأ 🙄
من بداية الحمل قاعد يعذب فينا و بإمو بدايةً بالاقياءات الحملية المعندة
وبعدين بالسابع قرر إنو خلص بكفي نطرة رح يجي بمخاض باكر
نحنا طبعاً ما اتفاجأنا وكنا متوقعين هالحركة وناطرينها منو 🤣
كنا عاطيين الأم صادات و كورس إبر رئة و مجهزينها عال24 🙂‍↕️
ف لما ولد بالسابع صرخ بشكل طبيعي و وزنو كان ما أحلاه

ولللككنن احتاج أوكسجين وحاضنة لمدة أسبوع لأن الأم كان عندا انتانات بولية أثرت فيه رغم العلاج 😪
هلا طبعاً اتخرج بخير و سلامة و صحة وان شاءالله الحياة السعيدة الهنية إلو و لأهلو يارب 😍🙏🏻

طبعاً الخلاصة هون إنو المتابعة المستمرة مع دكتورتك كتير مهمة .. كتير كتير مهمة
و إنك تسمعي منها شو تعطيكي أدوية وتاخدي الكورسات اللي بتقلك عليهن 👩🏻‍⚕️✨️

14/04/2026

دايما الارضاع الوالدي هو الافضل 💜

13/04/2026

✨ إشيا بتصير بعد الولادة وما حدا بخبرك عنها! ✨
إذا كنتي أم جديدة
طبيعي تحسي إنو في تغيّرات عم تصير بجسمك
هالتغيرات لأن بتصير فجأة ممكن تسبب خوف لأنها غير مفهومة…

هلا أنا رح فهمك ياها 👩🏻‍⚕️

🪆 تقلصات الرحم (آلام الخوالف)
بعد الولادة، الرحم ببلّش يرجع لحجمه الطبيعي، وهاد الشي ممكن يسبب آلام تشبه الدورة.
أحياناً بتكون الآلام أقوى مع الرضاعة وهالشي طبيعي جداً و متوقع

🍼 نزول الحليب (الدُّرّة)
• بالولادة الطبيعية: غالباً بين اليوم 2–4
• بالقيصرية: ممكن تتأخر شوي (3–5 أيام)
ممكن تحسي بشد أو ألم بالثدي، وأحياناً حرارة خفيفة…
⚠️ بس انتبهي إذا الحرارة عالية أو الألم شديد ضروري كتير تحاكي طبيبتك ولا تطنشي القصة

🩸 نزيف النفاس
بيستمر عادةً من 4 لـ 6 أسابيع، وبخف تدريجياً
⚠️ لازم تنتبهي إذا:
• كان النزف غزير جداً
• رجع زاد بعد ما خف
• صار في ريحة كريهة أو تغيّر باللون
• ترافق مع حرارة
هون ضروري تراجعي طبيبتك فوراً ❗

💭 التغيرات الهرمونية والمزاج
تقلب المزاج، البكاء بدون سبب، أو القلق… كلها شائعة بهالفترة
بسبب الهرمونات + التعب + قلة النوم
⭕ بس إذا استمرت أو أثرت على يومك وحياتك لا تهملي الموضوع.. اطلبي المساعدة واحكي مع حدا يفهمك و يخفف عنك 🫂

🪻 الخلاصة:
الولادة مانها شي سهل .. انتي حرفياً جسمك خلق طفل و طلعتيه ع هالدنيا
هي العملية بتاخد كتير جهد نفسي و جسدي و عقلي و كلي و متعبة بشكل بيستحق تقدير أكتر من اللي عم ينعطاه 🫩
كل هالتغيرات طبيعية اعطي نفسك وجسمك فرصة يتعافوا خطوة خطوة ❤️
وإنتي مو لوحدك بهالرحلة.. أنا معك بكل خطوة 🙂‍↕️😌🩷

05/04/2026

مبارح كان 4\4 تاريخ مميز متل الأمير اللي وصلنا فيه
حيدرة إجا بعملية قيصرية روتينية سلسة
هوي الولد التاني بالعائلة الجميلة 👨‍👩‍👦‍👦
الله يبعتلو أيام حلوة وكلها هناء وسعادة هوي و أهلو و يخليهن لبعض 💙🙏🏻