19/11/2019
ً
الرياضة مو بس نقص و زيادة وزن رجاء أعطوها حقها الرياضة علاج و وقاية .........
رح احكي بهالبوست عن اكتر من حالة طبياً كيف استلمتهن و شو تغير بحالتهن المرضية ...........
١ - انسانة مصابة بكسر أسفل العضد ((والدتي )) بعد العمل الجراحي و التثبيت بصفيحة و ٧ براغي .. عانت من تحدد حركة بالذراع بحركة العطف و الثني والكب والاستلقاء بسبب التثبيت المديد .... عملنا جلسات علاج منزلية و بعد تقريب ال ٣ أشهر صارت الحركة ممتازة و رجعت متل قبل و أفضل (( باعتبار عطول بتقلي ليك في بهي الايد صفيحة معدن دير بالك تاكل كف منها )) الله يخلي أمهاتكن جميعا
٢ - انسانة مصابة بكسر متبدل بالترقوة مع كسر متبدل بالعضد مع خلع بالكتف بعد
التعرض لحادث سير قوي لجأت للعمل الجراحي وبعد الجراحات اصيب العصب الكعبري نتيجة رض ممكن من الحادث ممكن خلال العمل الجراحي ما منعرف
(( صار عندها شي منسميه بالطب هبوط يد ))
وبهالحالة انا استلمتها و الحمدلله بعد ٦ اشهر من التدريبات المركزة و الدقيقة قدرت تحرك ايدها بالطريقة يلي بتحب و بكل الاتجاهات و قدرت تمسك الاشيا بقوة
٣ - صبية معها داء المبيض متعدد الكيسات و خربطة بالهرمونات و زيادة وزن كمان اشتغلنا رياضة تقريب السنة بالاضافة للعلاج الدوائي للمرض من قبل طبيبة نسائية (( أستاذتي بالمشفى وهي جدا شاطرة وانسانية لأبعد حد )) وقدرنا نرجع الهرمونات طبيعية و تتحسن حالة المرض وأعراضو كتير
٤ - انسانة مصابة ب الداء الرثياني مع فتق نواة لبية قطنية ورقبية ومعالجة بعلاج الروماتيزم الدوائي مدة طويلة و الما بيعرف >> علاج الروماتيزم الطويل وبدون ما تكون رياضي هاد أمر متعب جدا للعظام جدا
استلمت الحالة بتوجيه من طبيب رثوية وكانت جدا متألمة و اشتغلنا ع تقوية العضلات والاربطة و الاوتار و حاولنا نحرك المفاصل بهدوء مع مدى واسع نسبيا بس بشكل تدريجي وببطئ وحذر شديدين و الحمدلله قدرنا نوصل لنتيجة كتير منيحة خفت الآلام الشديدة و تحسنت اليبوسة بالمفاصل و آلام العمود الفقري شبه انتهت
٥ - شخص اجا لعندي بتوجيه من طبيب القلبية واجاني بهالجملة حرفيا ... قلي الدكتور اذا ما التزمت بالرياضة و بالغذاء الصحي انت بمرحلة حدية فحتنصاب بمرض الضغط و مرض السكري
طبعا طلبنا تحاليل و شفناهن فعلا كان الشخص على أعتاب المرضين بعد ضبط التغذية و الالتزام بالرياضة لمدة ٣ اشهر متواصلة و الالتزاام بالأدوية الي وصفها الطبيب الأخصائي عدنا التحاليل بشكل كامل و كانت كلها ضمن الطبيعي
...................... يتبع !!
طبعا هدول جزء من كتير أمراض ممكن تشفى و ممكن تتحسن بالرياضة و بالتغذية فبتمنى من الكل يغير نظرتو للنادي بانو هو مكان بس للنحف او العضلات ابدا مانو هيك و كلمة رياضة مداها واسع جدا الي ما عرفان كيف يلعب او ما عندو وقت او او ماااااا تتحجج احكي معي و عطيني برنامجك وانا بقلك كيف تلعب رياضة ولو منزلية و حتستفيد بس ما تقلل مروة وتتكاسل
منتمنى الشفاء من القلب لكل المرضى ❤
