14/10/2024
ဩကာသရှင်းတမ်း
ဩကာသ ဩကာသ ဩကာသ
ကာယကံ၊ ၀စီကံ၊ မနောကံ သဗ္ဗဒေါသ
ခပ်သိမ်းသော အပြစ်တို့ကို ပျောက်ပါစေခြင်း အကျိုးငှာ
(တနည်းကာယကံ၊၀စီကံ၊မနောကံတည်းဟူသော သုံးပါးသော ကံတို့တွင် တစ်ပါး ပါးသော ကံကို ပြစ်မှားမိသည်ရှိသော် ပျောက်ပါစေခြင်း အကျိုးငှာ )
ပထမ, ဒုတိယ, တတိယ
တစ်ကြိမ် နှစ်ကြိမ် သုံးကြိမ်မြောက်အောင်
ဘုရားရတနာ တရားရတနာ သံဃာရတနာ
ရတနာမြတ်သုံးပါး တို့ကို ရိုသေမြတ်နိုး လက်အုပ်မိုး၍ ရှိခိုးပူဇော် ဖူးမြော်မာန်လျှော့ ကန်တော့ပါ၏။
◉◡ကန်တော့ရသော အကျိုးအားကြောင့်
အပါယ်လေးပါး၊ ကပ်သုံးပါး၊ ရပ်ပြစ် ရှစ်ပါး၊ ရန်သူမျိုးငါးပါး၊
၀ိပတ္တိတရားလေးပါး၊ ဗျသနတရားငါးပါးတို့မှ
အခါခပ်သိမ်း ကင်းလွတ်ငြိမ်းသည် ဖြစ်၍
မဂ်တရား, ဖိုလ်တရား နိဗ္ဗာန်တရား တော်မြတ်ကို
လျင်မြန်စွာ ရပါလို၏ အရှင်ဘုရား …… ။
သြကာသ
••••••••••••
◉◡ရှိခိုးပါရစေ … ကန်တော့ပါရစေ … ဟု
အခွင့်တောင်းခြင်းကို … သြကာသ ဟု ခေါ်သည်။
လေးနက် စေလိုသောကြောင့်လည်းကောင်း၊
ထင်ရှားပျံ့နှံ့ စေလိုသောကြောင့် လည်းကောင်း၊
သြကာသ ကို သုံးကြိမ် ဆိုရပါသည် … ။
ကံသုံးပါး
•••••••••••
◉◡ကိုယ်ဖြင့်ပြုသောအမှုကို ကာယကံ၊
နှုတ်ဖြင့်ပြောသောအမှုကို ၀စီကံ၊
စိတ်ဖြင့်ကြံသော အမှုကို မနောကံ ဟု ခေါ်သည်။
ရတနာ
•••••••••
◉ နှစ်သက်မြတ်နိုးအပ်သောကြောင့်
ရတနာ ဟု ခေါ်ပါသည် … ။
ဘုရား ရတနာ
•••••••••••••••••
◉◡တရားဥဿုံ အလုံးစုံကို အကုန်အစင် သိမြင်တော်မူသောကြောင့် ဘုရား ဟု ခေါ်ပါသည် … ။
တရား ရတနာ
•••••••••••••••••
◉◡အပါယ်ဆင်းရဲ သံသရာ၀ဋ်ဆင်းရဲသို့
မကျရောက်အောင် ဆွဲဆောင်တတ် သောကြောင့်
တရား ဟု ခေါ်ပါသည် … ။
သံဃာ ရတနာ
•••••••••••••••••
◉◡အယူသီလ တူမျှခြင်းဖြင့်
ပေါင်းစုဖွဲ့စည်းထားသောကြောင့်
သံဃာ ဟု ခေါ်ပါသည် … ။
အရိုအသေ
•••••••••••••
◉◡ကိုယ်, နှုတ်, စိတ်သုံးပါးတို့ဖြင့်
ညွတ်တွားကိုင်းရှိုင်းခြင်း၊ အလေးအမြတ်
တကယ်အဟုတ် စိတ်ပါပါနှင့် လေးစားမြတ်နိုးခြင်း … ။
ရှိခိုး
••••
◉◡ရှိခိုးခြင်းမှာ ကိုယ်ဖြင့်ရှိခိုးခြင်း၊ နှုတ်ဖြင့်ရှိခိုးခြင်း၊ စိတ်ဖြင့်ရှိခိုးခြင်း ဟူ၍ သုံးမျိုးရှိသည်။
ကိုယ်ဖြင့် ရှိခိုးခြင်းဆိုသည်မှာ …
ရတနာသုံးပါး၊ မိဘ ဘိုးဘွား၊ ဆရာသမားတို့၏
ဂုဏ်ကျေးဇူးကို အာရုံပြု၍
ထိခြင်းငါးပါး (ခြေ, လက်, နဖူး,တံတောင်, ဒူး) ဖြင့်
ရှိခိုးခြင်းကိုခေါ်သည်။
နှုတ်ဖြင့်ရှိခိုးခြင်းဆိုသည်မှာ …
ရတနာသုံးပါး၏ ဂုဏ်ပုဒ်များကို …
နှုတ်ဖြင့် ထုတ်ဖော်၍ ရွတ်ဆိုခြင်းကို ခေါ်ပါသည်။
စိတ်ဖြင့် ရှိခိုးခြင်းဆိုသည်မှာ …
ရတနာသုံးပါးတို့၏ ဂုဏ်ကျေးဇူးကို …
စိတ်ထဲမှ အဖန်တလဲလဲ အောက်မေ့ခြင်းကို ခေါ်ပါသည်။
ပူဇော်
•••••••
◉◡ပစ္စည်းဖြင့် ပူဇော်ခြင်း၊
တရားဖြင့် ပူဇော်ခြင်း နှစ်မျိုးရှိသည် … ။
ဖူးမြော်
••••••••
◉◡ပကတိမျက်စိဖြင့် ဖူးမြော်ခြင်း၊
အသိဉာဏ်မျက်စိဖြင့် ဖူးမြော်ခြင်း … ။
မာန်လျှော့
••••••••••••
◉◡မိမိသန္တာန်ရှိသော …
မာန်မာနတရားများကို လျှော့ချဖယ်ရှားခြင်း၊
(ရတနာ သုံးပါးကို မြင့်မြတ်ရာ၌ ထားခြင်း) ကို
မာန်လျှော့သည် ဟု ခေါ်ပါသည်။
မာန်လျှော့ခြင်းကို … နိဝါတမင်္ဂလာ ဟု မှတ်ပါ … ။
ကန်တော့
••••••••••••
◉◡အပြစ်ရှိက ခွင့်လွှတ်တော်မူပါဟု …
၀န်ချတောင်းပန်ခြင်းကို ကန်တော့သည်ဟု ခေါ်သည်။ အပြစ်ရှိ၍ကန်တော့ခြင်း၊
ကုသိုလ်ရလို၍ ကန်တော့ခြင်းဟု နှစ်မျိုးရှိသည် … ။
(ကန်တော့ ဆိုသည်မှာ အကုသိုလ်ကို ကန်, ကျောက်၍
ကုသိုလ်ကို တော့ , ယူခြင်းကို ဆိုလိုသည်)
အပါယ်
•••••••••
◉◡ချမ်းသာကင်း၍ ကုသိုလ်ကောင်းမှု
ပြုခွင့်မရသောအရပ်ကို အပါယ်ဟု ခေါ်သည်။
(အပါယ = အပ + အယ၊ အယ = ချမ်းသာ + အပ = ကင်းခြင်း)
အပါယ်လေးပါးရှိသည်။ ၎င်းတို့မှာ ……
(၁) ငရဲ = ချမ်းသာသုခ ဝေးကွာ၍၊
ဒုက္ခအတိပြီးသော ဘုံဌာန၊
(၂) တိရစ္ဆာန် = မဂ်, ဖိုလ်မကပ်၊ ထောင့်ဖြတ်ဖီလာ
သွားတတ်သော သတ္တဝါ။
(၃) ပြိတ္တာ = ချမ်းသာအပေါင်းမှ
ဝေးကွာသော သတ္တဝါ။
(၄) အသုရကာယ် = နတ်များကဲ့သို့ မရဲရင့် မတင့်တယ်
မတောက်ပသော သတ္တဝါ။
* လောဘစိတ်နှင့်၊ သေခဲ့လျှင် ပြိတ္တာဘုံသို့၀င်၊
* ဒေါသကြီးလျှင်၊ ပါယ်ငရဲ၊ ဖြစ်ရအမှန်ပဲ၊
* မောဟစိတ်နဲ့၊ သေခဲ့ပြန်၊ ဖြစ်ရတိရစ္ဆာန်၊
* ဆိုးသွမ်းလေဟန်၊ စိတ်သုံးမျိုး၊ စွန့်ခွာပယ်လို့ချိုး။
ကပ်
•••••
◉◡ငတ်မွတ်ဘေး၊ လက်နက်ဘေး၊ ရောဂါဘေးတို့ကြောင့် ပျက်စီးခြင်းကို ကပ်ဟု ခေါ်သည်။
(ကပ္ပ = ပျက်စီးခြင်း)
ကပ်သုံးပါးရှိသည်။ ၎င်းတို့မှာ ……
(၁) ဒုဗ္ဘိက္ခန္တရကပ် = ငတ်မွတ်ဘေးကြောင့် ပျက်စီးခြင်း။
(၂) သတ္ထန္တရကပ် = လက်နက်ဘေးကြောင့် ပျက်စီးခြင်း။
(၃) ရောဂန္တရကပ် = ရောဂါဘေးကြောင့် ပျက်စီးခြင်း။
* လောဘကြီးက၊ ငတ်မွတ်ရ၊ ဒုက္ခကပ်ကြီးဆိုက်။
* ဒေါသကြီးက၊ သတ်ဖြတ်ကြ၊ သတ္ထကပ်ကြီးဆိုက်။
* မောဟကြီးက၊ ရောဂါထ၊ နာရကပ်ကြီးဆိုက်။
ရပ်ပြစ် ရှစ်ပါး
•••••••••••••••
◉◡မဂ်, ဖိုလ် နိဗ္ဗာန် မရနိုင်သည်ကိုစွဲ၍ …
ရပ်ပြစ်ဟု ခေါ်သည်။ အပြစ်ရှိသော အရပ်ကို
မြန်မာတို့က … [ရပ် - ပြစ်] ဟု ခေါ်ကြသည်။
အပြစ်ဆိုသော်လည်း ထူးထူးခြားခြား ဆိုးဝါးသောအပြစ်မဟုတ်။
ထိုအရပ်သို့ ရောက်နေလျှင် … မဂ်, ဖိုလ်ရောက်အောင် တရားအားထုတ်ခွင့် မရသောကြောင့် …
မဂ်ဖိုလ်ရခွင့်မရှိခြင်းကို …
[ အပြစ် ]ဟု မိန့်တော်မူသည် … ။
ရပ်ပြစ်ရှစ်ပါးရှိသည်။ ၎င်းတို့မှာ ……
(၁, ၂, ၃) ဘုရားဖြစ်ခါ, ပါယ်သုံးရွာနှင့် …
ဘုရားပွင့်နေဆဲအခါ ငရဲ၊တိရစ္ဆာန်၊ ပြိတ္တာ
အပါယ်သုံးဘုံ၌ ဖြစ်ရသူများ။
(အသူရကာယ်ကို ပြိတ္တာမျိုး၌ သွင်းယူ။)
(၄) ဒီဃာယုနတ် …
အသက်ရှည်သော နတ်ဗြဟ္မာကို …
[ ဒီဃာယုနတ် ] ဟု ဆိုသည်။
ဘုရားပွင့်ဆဲအခါ လွန်စွာအသက်ရှည်၍ …
ဘုရားရှင်ကို မဖူးတွေ့နိုင်သော …
အသညသတ်ဗြဟ္မာများနှင့်
အရူပဗြဟ္မာများတည်း … ။
(အသညတတ်ဗြဟ္မာ များသည် ခန္ဓာကိုယ်သာရှိ၍
စိတ်ဝိညာဉ်မရှိ၊ အရူပဗြဟ္မာများကား …
စိတ်ဝိညာဉ်သာရှိ၍ ခန္ဓာကိုယ်မရှိ။
ထို့ကြောင့် ထိုဗြဟ္မာနှစ်မျိုးသည်
ဘုရားပွင့်သော်လည်း တရားမနာနိုင်ရှာကြပေ။)
(၅) ဖြစ်လတ်ပစ္စန် …
ဘုရားရှင်နှင့် ရဟန်းတော်များမရောက်နိုင်ရာ
အစွန်အဖျား တောတောင်အကြား (ပစ္စန္တရာဇ်သား)
လူရိုင်းများကို ဆိုသည်။
(ယခုအခါ၌ကား မြန်မာနိုင်ငံသည် ပစ္စန္တရာဇ်မဟုတ်။)
(၆) မိစ္ဆာဉာဏ်ရှိ …
ဘုရားပွင့်ဆဲအခါ မိစ္ဆာဒိဋ္ဌိဉာဏ်ရှိသူများ။
(၇) ဉာဏ်မရှိသား …
ဘုရားပွင့်ဆဲအခါ တရားကို
နည်းလည်လောက်သော ဉာဏ်မရှိသူများ။
(ဤဆိုခဲ့သော ၇မျိုးသည် ဘုရားပွင့်ဆဲအခါ၌
ဖြစ်သူများတည်း။)
(၈) ဉာဏ်ရှိငြားလည်း, ဘုရားမဖြစ် …
တတ်သိနားလည်လောက်သော
ဉာဏ်ရှိသော်ငြားလည်း …
ဘုရားမပွင့်သောအခါ လူဖြစ်သူများ … ။
ရန်သူ
••••••
◉◡ရန်သူမျိုးငါးပါးရှိသည်။ ၎င်းတို့မှာ ……
(၁) ရေ၊
(၂) မီး၊
(၃) ခိုးသူ၊
(၄) အမွေခံ သားသမီးဆိုး၊
(၅) မင်းဆိုး
မချစ်အပ်သောသူကို ရန်သူမျိုးငါးပါး၌ သွင်းမှားကြ၏။ မိမိက မုန်းနေရုံဖြင့် ရန်သူမဟုတ်နိုင်။
အမွေခံသားဆိုး သမီးဆိုးသာလျှင် (မိဘကို မကြာခဏ ဒုက္ခပေးတတ်၊ စုဆောင်းထားသော ပစ္စည်းများကို ဖြုန်းသုံးပစ်တတ် သောကြောင့် ရန်သူအစစ်သာ ဖြစ်သည်။)
* ရေ မီး သူခိုး, မွေခံဆိုးနှင့် မင်းဆိုးအပြား, ရန်မျိုးငါး,
မှတ်သားလေကွဲ့ အမှန်တဲ့ … ။
၀ိပတ်တိ
••••••
◉◡ဖောက်ပြန်ချွတ်ယွင်းခြင်းကို ဝိပတ္တိဟု ခေါ်သည်။
၀ိပတ္တိတရား (၄)ပါးရှိသည်။ ၎င်းတို့မှာ …
(၁) ကာလဝိပတ္တိ။ ။မင်းဆိုး၊မင်းယုတ် အုပ်စိုးသောအခါ။
(၂) ဂတိဝိပတ္တိ။ ။ အပါယ်လေးပါးတို့၌ ဖြစ်ရခြင်းကို၊
မကောင်းသော ဂတိ ဖြစ်၍ [ဂတိဝိပတ္တိ]ဟု ဆိုသည်။
(၃) ဥပဓိဝိပတ္တိ။ ။ရုပ်အဆင်းအင်္ဂါကို [ဥပဓိ]ဟုခေါ်သည်။
အင်္ဂါချို့တဲ့ခြင်းကို [ဥပဓိဝိပတ္တိ]ဟု ဆိုသည်။
(၄) ပယောဂဝိပတ္တိ။ ။ ကိုယ်မှု နှုတ်မှုကို [ပယောဂ]
ဟု ဆို၏။ အသိအလိမ္မာမရှိ၊ သတိ ဝီရိယလည်းမရှိဘဲ
ပြုမှု ပြောမှု ကြံစည်မှုကို [ပယောဂဝိပတ္တိ]ဟု ဆိုသည်။
* ဖောက်ပြန်ချွတ်ယွင်း, ပျက်စီးခြင်း, ခေါ်လျှင်း ဝိပတ္တိ။
ကာလ ဂတိ,ဥပဓိမှ, ပယောဂ, လေး၀ မှတ်လေဘိ။
ဗျသနတရား
•••••••••••••••
◉◡ပျက်စီးခြင်း၊ ဆုံးပါးခြင်းကို ပါဠိလို "ဗျသန"ဟု ခေါ်၏။
ဗျသနတရားငါးပါးရှိသည်။ ၎င်းတို့မှာ …
၁။ ဥာတိဗျာသန = ဆွေမျိုးများ ပျက်စီးခြင်း။
၂။ ဘောဂဗျသန = စည်းစိမ်ဥစ္စာ ပျက်စီးခြင်း။
၃။ ရောဂဗျသန = အနာရောဂါ ဖြစ်ခြင်း။
၄။ ဒိဋ္ဌိဗျသန = မိစ္ဆာအယူကို ယူခြင်း။
၅။ သီလဗျသန = သီလပျက်ခြင်း။
ဆုံးရှုံး ပျက်ပြား, ပြစ်မှုများ, ခေါ်ငြား ဗျသန။
ဘောဂ, ရောဂ-ဒိဋ္ဌိ , သီလထည့်, ငါးရှိ သရုပ်ပြ။
အခါခပျသိမျး ... ရပါလို၏။
◉◉◡ဤမကောင်းသော တရားတို့မှ …
အခါခပ်သိမ်း ဘ၀တိုင်း ကင်းလွတ်ငြိမ်းသည်ဖြစ်၍ ...
"သံသရာ၌ ကြာရှည် မကျင်လည်ရဘဲ …
မဂ်ဖိုလ်နိဗ္ဗာန်ကို အမြန်ရပါလို၏" ဟု … ဆုတောင်းသည်။
★ မင်းကွန်းဆရာတော်ဘုရားကြီး★ ★ ဦးဝိစိတ်တသာရဘိဝံသ★
#တရားဓမ္မအသိတိုးပွားကြပါစေ #မေတ္တာဖြင့်ပြန်လည်မျှဝေလိုက်ပါသည် #မူရင်းPostတင်သူကိုကျေးဇူးတင်စွာဖြင့်ဂါရဝပြုပါသည်
