23/05/2026
လူတိုင်းမှာ ကိုယ်ပိုင် “စိတ်လုံခြုံမှုနယ်ပယ်” လေးတစ်ခုလိုအပ်ပါတယ်။
အဲဒီနေရာလေးဟာ ကိုယ်စိတ်ပင်ပန်းနေချိန် နားခိုလို့ရတဲ့နေရာ၊ ကိုယ့်အနာတရတွေကို တိတ်တိတ်လေးကုစားလို့ရတဲ့နေရာ၊ ကိုယ့်ကိုယ်ကို ပြန်တွေ့နိုင်တဲ့နေရာလေးဖြစ်ပါတယ်။
ဒါပေမယ့် စိတ်လုံခြုံမှုဆိုတာ လူတွေကို အကုန်ကြောက်လန့်ပြီး မတွေ့မဆုံဘဲ နေလိုက်တာမျိုးမဟုတ်သလို “ငါပဲအရေးကြီးတယ်” ဆိုတဲ့စိတ်နဲ့ တခြားသူတွေကို နာကျင်စေတာမျိုးလည်း မဟုတ်ပါဘူး။
စိတ်လုံခြုံမှုနယ်ပယ်က ကိုယ့်စိတ်ကို ကာကွယ်ရင်း တခြားသူတွေရဲ့ စိတ်ကိုလည်း မထိခိုက်စေဘဲ အေးအေးချမ်းချမ်း နေထိုင်နိုင်တဲ့ balance(ညီညွတ်မျှတတဲ့ အလေ့အထ)တစ်ခုပါ။
ဒီတော့ ကိုယ့်ရဲ့ စိတ်လုံခြုံမှုနယ်ပယ်ကို တည်ဆောက်ချင်ရင် …
ကိုယ်အဆင်မပြေတာတွေကို “အဆင်မပြေဘူး” လို့ ပြောတတ်ဖို့လိုပါတယ်။ အမြဲတမ်း သည်းခံပေးနေရတာက ကောင်းမွန်ခြင်းမဟုတ်ပါဘူး။ ကိုယ်ပင်ပန်းနေတာကို ဖုံးကွယ်ထားရင်း နောက်ဆုံး ကိုယ့်စိတ်ပဲ ကျိုးပဲ့ပျက်စီးသွားတတ်ပါတယ်။
လူတိုင်းကို အမြဲရှင်းပြပေးဖို့ မလိုပါဘူး။ တချို့လူတွေက အပြစ်တင်ဖို့သက်သက်လာတာပါ။ ကိုယ့်ကို စိတ်ချမ်းသာစေတဲ့ relationship တွေကိုရွေးပြီး၊ စိတ်ကုန်စေတဲ့နေရာတွေကနေ တဖြည်းဖြည်းဝေးလာဖို့ လိုပါတယ်။
တခြားသူတွေရဲ့ boundaries ကိုလည်း လေးစားဖို့လိုပါတယ်။ ကိုယ်မကြိုက်တဲ့အရာကို သူများအပေါ် မလုပ်သင့်ပါဘူး။ မတောင်းပန်ဘဲ စကားနာထိုးပြောတာ၊ အတင်းဝင်စွက်ဖက်တာ၊ reply မရတာနဲ့ ဖိအားပေးတာတွေက သူများရဲ့ စိတ်လုံခြုံမှုကို ထိခိုက်စေတတ်ပါတယ်။
စိတ်တ်အေးချမ်းဖို့ဆိုတာ အမြဲတမ်း positive ဖြစ်နေရမယ်ဆိုတာမျိုး မဟုတ်ပါဘူး။ ဝမ်းနည်းရင် ဝမ်းနည်းခွင့်ပေးပါ။ ပင်ပန်းရင် နားခွင့်ပေးပါ။ ကိုယ့်ခံစားချက်ကို ကိုယ်တိုင် မငြင်းပယ်ဖို့ အရေးကြီးပါတယ်။
လူတိုင်းကို ကယ်တင်ပေးဖို့ ကိုယ့်တာဝန်မဟုတ်ပါဘူး။ တချို့ relationship တွေမှာ ကိုယ်ပေးနေတာများပြီး ကိုယ်လိုအပ်တဲ့အခါ တယောက်တည်း ဖြစ်နေရတတ်ပါတယ်။ Compassion ရှိတာက ကောင်းပါတယ်။ ဒါပေမယ့် self-respect မပျောက်သွားဖို့လည်း လိုပါတယ်။ ကျမကိုယ်တိုင် ဒီအလ့အကျင့်ဆိုးကို နှစ်နဲ့ချီ ရုန်းထွက်ခဲ့ရတာပါ။ ငါတတ်နိုင်တာတော့ ဒီလောက်ပဲဆိုတာမျိုး ပြောဖို့ဝန်မလေးပါနဲ့။ တချိန်က ကျမက အဲဒီလိုပြောလိုက်ရင် ငါ့ကို မချစ်တော့ဘဲနေမလားနဲ့ စိုးရိမ်ဖူးပါတယ်။ ဒါပေမဲ့ ကိုယ့်ဘက်က အပေးရှိမှ ပြန်ရမယ့် အချစ်မျိုးက စစ်မှန်တဲ့အရာ မဟုတ်ပါဘူး။ ကိုယ့်ကိုယ်ကို လေးစားစိတ်လေးနဲ့ နေတတ်သွားရင် ပိုစိတ်ချမ်းသာရပါတယ်။
ကိုယ့်စိတ်ကို လုံခြုံစေတဲ့ routine လေးတွေ ဖန်တီးပါ။ မနက်ခင်းမှာ စာဖတ်တာ၊ meditation လုပ်တာ၊ ညဘက်ဖုန်းပိတ်ပြီး နားတာ၊ music နားထောင်တာ၊ ဆိတ်ဆိတ်ငြိမ်ငြိမ်လေး coffee သောက်တာကအစ ကိုယ့် energy ကို ပြန်ဖြည့်ပေးနိုင်ပါတယ်။ ကျမက ကော်ဖီမသောက်တော့ herbal tea လေးတွေသောက်တယ်၊ ပန်းပင်လေးတွေ ရေလောင်းတယ်၊ ကိုယ်စားချင်တာလေးတွေ ချက်ပါတယ်။
တစ်ခါတလေ “No” လို့ ပြောနိုင်တာက ကိုယ့်ကိုယ်ကို ကာကွယ်နေခြင်းပါ။ အဲဒါဟာ မာနကြီးတာမဟုတ်သလို၊ လူဆိုးဖြစ်သွားတာလည်း မဟုတ်ပါဘူး။
နောက်ဆုံးမှာ စိတ်လုံခြုံမှုနယ်ပယ်ဆိုတာ လူတွေအားလုံးကို မထိတွေ့ရအောင် ကာဆီးထားတဲ့ နံရံကြီးတစ်ခုမဟုတ်ပါဘူး။ ကိုယ့်စိတ်ကို ချစ်ပေးနိုင်ဖို့၊ ကိုယ့်ကိုယ်ကို မဆုံးရှုံးသွားဖို့၊ နူးညံ့ပြီး တည်ငြိမ်တဲ့နေရာလေးတစ်ခုပါပဲ။
ချစ်ရတဲ့သူတွေအားလုံး ပူလောင်သောကတို့ ကင်းဝေးပြီး ကျန်းမားချမ်းသာကြပါစေ 🧜♀️🤍
Witchy Candy 🍭
