22/02/2023
كلما إكتشفنا الإصابة بالتوحد مبكرا و بدأنا بالعلاج كلما كانت النتيجة أفضل هذاك علاه حبيت نعرف بأعراض التوحد من سن مبكرة
(وجود عرض أو إثنان لا يعني وجوبا إصابة طفلك بالتوحد )
الأعراض:
1/تجنب الإتصال البصري 👀 حتى و إنت تتكلم معه ولا قاعد تلعب معاه و تحكي معاه ما يغزلكش في عينيك و لا حتى كان غزر مدة بعض الثواني 🕙
2/عدم الإستجابة لنداء إسمه يتصرف كاينو مش يسمع فيك 👂
3/يحب يدور برشا، و يقوم بتدوير الألعاب و حتى الطعام .. تعطيه كرهبة لعبة 🚗 يسيبها و يبقى مركز في تدوير العجلات 🛞
4/ما يشاركش الأطفال في اللعب🪅🎊 ، ما يتفاعلش مع الأشخاص في المحيط لا يكلمهم لا يلعب معاهم لا يمشي بحذاهم 🙅ما يضحكلهمش 😃...
5/حركات متكررة كيف الرفرفة باليدين، الدوران حول نفسه، أحيانا ضرب الرأس، التأرجح
طفل التوحد لاهو مريض و لا هو عنيف، بش تفهم طفل التوحد تخيل روحك عمرك كامل تعيش في تونس نهار تفيق الصباح تلقى روحك في اليابان لا تتكلم لوغتهم لا تعرف قوانينهم تنجم إنت تجي بش تقص الكياس تلقى الحاكم يوقف فيك خاطر ما مشيتش فوق الخطوط البيضاء في الكياس لي هي في تونس حاجة عادية عللخر تجي تحكي معاه تقللو راو ما فيباليش تلقاه مش يفهم فيك و تلقاه يحكي في كلام إنت ما تفهموش و تتلفت تلقى ناس كل تغزرلك و باهتة شنوة إحساسك في الموقف أذاكة ؟؟
مش تحس روحك داخل بعضك خايف مش فاهم شي ...
ساعات طفل التوحد يلقى روحو في مواقف كيف هكا خاطر طريقة تفكيرو مختلفة على معظم البشر ، و يدخل بعضو و يخاف و ينجم وقتها يعمل ردة فعل مش خاطرو عنيف لااا خاطرو خاف منك ولا تفجع ولا ما فهمش لي داير بيه.....
طفل التوحد يحتاج للتفهم ...
Par Orthophoniste Mourouj Hend Gdoura
