Centre Slama d'assistance psychologique et sociale

19/02/2026

Ramadan Mubarak 🌙
Merci de bien vouloir respecter les horaires de vos rendez-vous et merci pour votre compréhension 🥰

27/10/2025

07/09/2025

⭐️ Nos services 💓
📞 98 114 497
📍 Imm. El-Baraka , station louage jammel

04/09/2025

التلفاز يعطي صور وحكايات جاهزة يخلي المخ تاع الطفل يتفرج برك مايفكرش مايتفاعلش مايسقسيش ماينميش الخيال بالعكس يقتل فيه الحركية والفضول واللغة
الام بالعكس هي المدرسة الاولى بالكلام تاعها بالقصص البسيطة تاعها بالضحكة وبالحضن وباللعب هي اللي تعلم الطفل يهدر وتغرس فيه الامان وتخليه يتعلم كيفاه يتعامل مع الناس ويعبر على روحو ويطور اللغة والانتباه وحتى الذكاء العاطفي
الام كي تهدر مع ولدها وتجاوب على اسئلته وتخليه يجرب ويغلط وتعاود توريه راهي تبني شبكات عصبية قوية في مخو وتخلي المهارات تتفتح وحدة بوحدة
والطفل اللي يتربى مع امه يسمعها ويتفاعل معاها يكون عندو ثقة في روحو اكتر وذكاء اجتماعي احسن من اللي مخليين حياتو كلها قدام التلفاز

11/05/2025

نهار جديد و وجيعة جديدة في غرفة الأسرار 😶‍🌫️💬
"نحس روحي تاعبة و مخي يوجع ... مشتتة يخمم في ألف حاجة ..."
هكا قالت " هكا علاش جيت ... صعيب برشا إنو نِتْفَهْمو و إنو يحسو بينا و يقولو عندك حق نعرفو الضغط اللي تعيش فيه مش ساهل...."
العينين محوقة أما مغطية بالزينة و المكياج كانت حريصة إنها تلبس أحسن معندها ... تحب تقول أني لباس أما عينيها تقول و تحكي كلام عكس اللي خارج من فمها ....
" نحس في روحي وحدي و مخنوقة كل شيء يضغط عليا ..."

في أوقات معينة في حياة كل عبد يتعدى بأوقات صعيبة و يستنى يتفهم منغير ما يتكلم، الإنسان اللي يعبر على مشاعرو في أوقات معينة و بعد يلقى فما إجابة عكسية للاحتياجات النفسية معادش يعبر .... الإنسان كي يبدى يعيش في حالة حزن مش لازم يكون مش لاهي بروحو أو جابد روحو أو ميضحكش بالعكس ساعات يضحك أما غزرتو و ضحكتو المركبة تخبي برشا دموع ...

الإنسان هذا يهرب من إنو يقعد وحدو مع مخو خاطر القعاد وحدو يتعبو " نحس روحي حزينة و تاعبة من الدنيا ... تقول عليا في صندوق و قاعد يتسكر عليا من الأربع جهات.... الأيام رزان "

هو كي يجي يحكيلك حاشم تاعب يحس في روحو مهزوم و ضعيف كون معاه مش عليه و إتفكر كان تبعد و تخليه هاكي اللي يعيش فيها فترة و توفى أما إنت بعد تخسر صديق ،خو أخت ، علاقة على عاصفة كانت ماشية ...

كون معه متخليوش و حتى كان سكت خليه يعبر قلو إيجا أحكيلي بش ميسكرش على روحو ... مدلو إيدك و وسع بالك معاه قول سملا عليك و اني معاك و نعرف اللي تعيش فيه مش ساهل و نقدر مجهودك و المحاولات متاعك بش تقاوم....
إتمسك بالإنسانية متاعك و متخليشي ...
أميمة سلامة 🌸✍️🏻

20/04/2025

في غرفة الأسرار نهار جديد و حكاية جديدة.... 😶‍🌫️💬
"تعرف نحس روحي نجم نفرح كان كيف يجيني صغير ..."
هي فقدت بوها و أربعة صغار قبل ما يجيو للدنيا عندها زوز أما مخترتش إنهم يجيو من رجل ما يمثللها شيء ...
هي اليوم تحس روحها وحدها و معادش عينها في شيء تحب ترقد كهو معادش عينتها تخدم و تاكل " كل شيء إختارتهولي أمي... أني مخترت شيء .... بابا كنت عندو البنت المدللة وين هوا توا خــلاّنِـــي ...."
هي حزينة و تلوج على حاجة تفرحها الحاجة هذه بالنسبة ليها الصغير ... هو قبل ما يجي للدنيا بش يلقى روحو يستناو منو في دور معين في حياة كل شخص ... هو إجابة لوجيعة غطِّيناها من أمو بوه ... هو بش يكون تعويض الخسارة . الحِـداد ، العلاقات المقطوعة ، الحزن ، الفراغ و الوجيعة اللِّــي الكلمات مش كافية بش تعبر عليها..... هو صغير يتسمى "Enfant pansement "
مش جاء على خاطر هو نحبوه و إلا يجي بش يكون كيما يحب هو و الدور اللي يختارو هو يلعبو لا ! هو هنا بش يصلّح اللي فسدتو الدنيا في حياة أمو و بوه ... بالوقت شخصيتو تموت و يولّــي مجبور يعيش في بلاصة ناس أخرى ...
بالنسبة للوالدين هوما معندهمش نيّة خايبة بالعكس مع الصغير هذا برشا محبة تجي كان يلعِب الدور متاعو بالصحيح أما كي نحكيو عليه هو شنوا يحس و شنوا يعيش ... يحس روحو مقيد و مش منجم يكون على طبيعتو و شخصيتو الحقيقية تذوب في وسط الإنتظارات اللّي ما توفاش ، و تحت ضغط بش يلعب الدور اللي هو جاء للدنيا بش يلعبو و كان ملعبوش بالصحيح فشل كبير و إنهيار.
شنوا نعملو تقولو ؟
منجيبوش صغير بش يلم جروح معندوش فيها دخل...أخ مات أو تعويض حنان و فقْــدان ... نجيبوه بش يكون كيما هو بروحو هو ... طريق الوعي بالحكاية هذه للعائلة فيه حِـــدَاد بش يفهمو اللّــي صغيــرهُمْ مِشْ بِشْ ينجِــم يصلح جروحهم أما فيه برشا محاولة بش نحبوه كيف ما هو حب يكون و يكون مش مشروط.
و على خاطر حتى اللِّــي ما يتقالش بالكلام يتعدّى بطريقة غير واعية نقولو كُلّ صغير يستحق يتحب كيما هو و حتى كانو مش كيما نُرْسمُوه في الخيال متاعنا... مشاعر صغيرنا مهمّة و إنو أحنا نكون متوازنين زادا مهم برشا بش نستقبلوه بمحبة ❤️🤱🏻
أميمة سلامة 🌸✍️🏻