11/09/2024
انشالله كل عام و انتوما بألف خير و صحة و عافية ..
العصيدة بيضاء و زقوقو و بوفريوة و الفزدق و الجلجلان و كل قدير و قدرو و كل عبد و ميزانيتو و الشهوة متاعو .....
المهم انشالله ديما ملمومين بالخير و الصحة
كل عصيدة و كيفاش تتعمل حسب طريقتكم لي متعودين بيها و تحبوها ...
فما ناس إختارو يعملو العصيدة revisité كي يبداو رادين بالهم و يحبو حاجة مطلعهمش السكر ...
و فما ناس يعملو العصيدة كيما اماتهم و جداتهم وفما لي يقلك اتو نقص في السكر و بره ...
لذلك العصيدة حسب المكونات لي فيها تنجم تكون ذات سعرات حرارية كبيرة و هي حتى كي نقصو و نبدلو فيها مجموعة مكونات راهو مجهود باهي خاصة لمرضى السكري....
شنحاول نعطيكم فكرة عامة للتخفيض في نسبة السكر و الحريرات شنوة تنجم تستفيدو منهم هالتغييرات للناس بالطبيعة لي تحب تبدل ...
-لي يبدلو الفارينة البيضاء بفارينة القمح او الشوفان هكاكة تكون أقل مؤشر قليسمي لهنا أقل صناعة انسولين و أقل stockage de graisse ...
-لي يستعملو في عوض السكر : العسل هوني نفس الحريرات لكن مؤشر القليسيمي أقل شوية بركة مش حاجة كبيرة...
-لي يستعملو المحلي الصناعي (القطر) او succralose ذو 0 حريرة او stevia هوني ينقص المؤشر و الحريرات لهنا لي جماعة لي تعمل في رجيم والا لي مالقاوش سكر و الا لي مايحبوش السكر فكرة باهية (اقراو حساب الكميات حسب الإرشادات على العلبة بش المطعم مايجيش مر)
-لي يستعملو في العصيدة البيضاء يحطو فيها الزبدة في عوض الزيت الحريرات هوما بيدهم اما القيمة الغذائية مش هي بيدها (دهون نباتية vs دهون حيوانية)
الحاصل لي حبيت نقولو العصيدة حاجة يحبوها التوانسة و من عاداتنا و لي يحب ياكل ميسالش مافيها بأس خاصة الناس لي ديما منضمين في ماكلتهم و طايبوها كيما تحبو و تشتهيو حسب صحتكم و قدرتكم الشرائية
التوقيت المناسب
-نعوضو بيها فطور الصباح
-بعد الغداء نحطها dessert
نصيحة أخرى اعملو كميات قليلة و في صحافي صغار
و ردو بالكم من الاستهلاك بكثرة
و ربي يشدكم في صحيحة بدنكم و انشالله ديما ملمومين في الخير و كل عام و انتوما بخير ...
