07/07/2025
📌كانك مالناس لي قاعدين يحكيو في مشاكلهم و يطلبوا فالنصيحة من عند ChatGPT : لازمك تقرأ هذا !
كيف تستعمل ChatGPT في حاجات كيما إنك تحكيلوا مشاكلك و القلق متاعك، لازمك تعرف و إنوا هو من جيهتو مبرمج إنوا يتعاطف و it validates مشاعرك الكل مهما كانو (يعني ما ينجمش ينقد أو يحلل أو يناقش بموضوعية مشاكلك).
فالحقيقة هو مبرمج كان باش يساندك و حتى ولو إنتي ساعات مستحق شكون يقلك راك غالط و يوريك الثنية الصحيحة فباقي باش يعطيك الحق، و الحاجة هاذي تنجم تغلطك في أفكارك و قراراتك من مبعد.
غير هذا، قد ماك باش تسأل ChatGPT و تحكيلوا، قد ما هو باش يزيد يقترح عليك إنك تزيد تتعمّق فالموضوع أكثر (لأنو مرة أخرى هو مبرمج بالطريقة هاذي). الشيء هذا كيما ينجم يعاون لحد معيّن كيما ينجم يتسبب في برشة حالات مالتخمام المفرط عند الناس لي عندها الشغف و ممكن ساعات الإدمان على فهم الذات.
فالأخير، مانيش باش نقلكم معادش تستعملوه للغرض هذا (لأنو كل إنسان مسؤول و يعرف شنوة يصلح بيه) أما باش نقلكم :
تفكروا ديما راهو Algorithm ماهوش أنسان !
