05/05/2025
كوتش هاجر ♥️♥️
لما روحت اشترك في الجيم كنت بمر بأسوء فترة مرت عليا في حياتي كنت تايهة، ضعيفة، كان معنديش اي ثقة في حد ولا حتي في نفسي دماغي مش بتبطل تفكير من كتر المشاكل اللي كنت فيها كنت في بداية اكتئاب حرفيا واشتراكي في الجيم كان محاولة اخيره بحاول أخرج بيها نفسي من دوامة المشاكل اللي كنت بمر بيها
روحت الجيم اسال عن الحاجات اللي ممكن تتعمل واخترت يوجا قلت يمكن اعرف أهدى وارتب أفكاري كويس
وبعدين قابلتك اول حاجة لفتت نظري هو ضحكتك اللي بجد من القلب مش افتعال قولتلك أنا أول مرة أمارس رياضة قوليلي مش مشكله قولتلك عندى أمراض مزمنة ومشاكل في المفاصل قولتيلي ماتقلقيش حناخد بالنا واحنا شغالين
اول مرة اسمع جملة (انتي مهمة انسي كل العالم وركزى مع نفسك بس انتي لو اهتميتي بنفسك حتعرفي تهتمي بكل حاجة تانيه )
اول مرة اسمع جملة( افصلي نفسك عن العالم استرخي لسه في حاجات كويسة في الدنيا) واشتغلنا مع بعض اول سيشين يوجا وكنتي صبورة معايا جدااااااا واخر السيشين دلعتيني بمساج للرقبة وفروة الرأس يوميها قلتيلي انتي شايلة مشاكل كتير
علي كتافك وراسك كلها عقد من كتر التفكير هوني علي نفسك ارمي مشاكلك علي ربنا وهو قادر يحل كل حاجة
قولتيلي لو عايزة حد يسمعك أنا موجودة أنا زى اختك بالرغم من انك كنتي لسه عرفاني من ساعة واحدة بس
رجعت البيت وانا حاسة اني احسن كتير ولأول مرة من اسابيع كتييييييير انام بعمق انام وانا مطمئنة وقررت ساعتها اني مش حسيب اليوجا ابدا
في الحصص اللي بعد كدة كل مرة كنتي بتستقبليني بابتسامتك القمر وتفضلي تنكشيني اني اتكلم أو افضفض شوية لحد ما مرة قولتلك اني كنت اكتر واحدة بتدعم اللي معاها وتساعد وتدى طاقة إيجابية للناس ولما حصلتلي مشاكل وكنت محتاجة الناس تساعدني ملاقيتش حد خااالص وان شعور الخذلان وحش قوى ساعتها انتي رديتي بتلقائية قوتيلي وانا روحت فين أنا هنا موجودة علشان اساعدك وادعمك
الجملة دى بجد فرقت معايا قوى وبدأت احس أن في ناس لسه كويسة وبتساعد من غير مصالح بعد ما كنت فقدت الثقة في كل الناس
واحدة واحدة بدأنا نشتغل علي التوازن ،علي النفس، علي ازاي استرخي واهدى نفسي ازاي افصل عن العالم واعيد ترتيب أفكاري من اول وجديد
بدأنا نشتغل علي الجسم كله من اول يوجا الوش لكل حتة في الجسم
ودلوقتي بعد حوالي سنتين من اول سيشين يوجا انا الحمد لله صحيا احسن كتير ورجعت اصلي تاني علي الارض بعد ما كنت عشر سنين بصلي علي كرسي بقيت بعرف أفصل شوية واقول أنا كمان مهمة بقيت نفسيا أهدى كتييييييير
فعلا برجع من كل سيشين بمود حلو اوي وبيبقي احلي بداية لليوم
بجد أنا بشكر الظروف الصعبة اللي كنت بمر بيها اللي عرفتني علي احسن واشطر واجدع كوتش في الدنيا كوتش هاجر حبيبتي ♥️♥️♥️
