08/09/2025
Fuqia e Bashkëpunimit për Fëmijët me Aftësi të Kufizuar
Në Qendrën e Kujdesit Ditor PEMA në Ferizaj, çdo ditë kujdesemi që hapësira e përkujdesjes e krijuar ndër vite të mbetet e sigurt, dhe programet gjithëpërfshirëse të mbështetjes profesionale të avancohen tutje për fëmijët me aftësi të kufizuara. Ky mision bëhet i mundur edhe falë partnerëve që ndajnë me ne vlerat e solidaritetit dhe përkushtimit.
Falë bashkëpunimit me Trust Circle Foundation dhe mbështetjes së donatorëve, ne po vazhdojmë të ofrojmë shërbime të personalizuara psikosociale, edukative dhe terapeutike për fëmijët tanë, duke u dhënë atyre mundësinë të ndihen të pranuar, të zhvillojnë aftësitë e tyre dhe të ndërtojnë një të ardhme më të denjë.
Ky bashkëpunim forcon programet tona të përditshme dhe mban gjallë shpresën për një shoqëri gjithëpërfshirëse, duke theksuar njëkohësisht edhe përgjegjësinë e institucioneve për të garantuar qëndrueshmërinë e shërbimeve sociale dhe familjare për grupet e cenuara të popullatës.
Ne i jemi thellësisht mirënjohës Trust Circle Foundation për besimin, përkrahjen dhe vizionin e përbashkët. Së bashku, po dëshmojmë se kur forcat bashkohen, ndryshimi bëhet i prekshëm dhe jeta e fëmijëve tanë ndriçohet me më shumë mundësi e dashuri.
