Dr. Maria Lynn (2025)

18/05/2023

ဓာတ်ရောင်ခြည်ကုသမှုခံယူစဥ် ဆောင်ရန်/ရှောင်ရန် အချက်များ (၃)

အရေပြား

ဓာတ်ရောင်ခြည်နှင့်ကုသသောအခါ အရေပြားတွင် ကုသမှုစတင်ပြီး နှစ်ပတ်အကြာတွင် အနည်းငယ်နီရဲလာခြင်း၊ အရောင်ရင့်လာခြင်း ဖြစ်လာတတ်ပါသည်။ နေလောင်ခြင်းနှင့် ဆင်တူပါသည်။ ဓာတ်ရောင်ခြည် ကုသမှု၏ အရေပြားအပေါ် အကျိုးသက်ရောက်မှုသည် ကုသမှုအပြီး နှစ်ပတ်အကြာတွင် တဖြည်းဖြည်း သက်သာလာပြီး ပုံမှန် ပြန်ဖြစ်လာပါသည်။

ဓာတ်ရောင်ခြည်ကုသစဥ် နေ့စဥ် ရေချိုးနိုင်ပါသည်။ ကလေးသုံး ဆပ်ပြာကို အသုံးပြုနိုင်ပါသည်။ ရေချိုးပြီးပါက နူးညံ့သော တဘက်နှင့် ဖွဖွလေးသုတ်ရပါမည်။ အမျိုးသားများ မျက်နှာနှင့်လည်ပင်းကို ဓာတ်ရောင်ခြည်ကုသမှု ခံယူနေစဥ်တွင် မုတ်ဆိတ်ရိတ်ရာ၌ အခြောက်ရိတ်နိုင်ပါသည်။ မုတ်ဆိတ်ရိတ်စက်ကို အသုံးပြုနိုင်ပါသည်။

ရေချိုးရာတွင် ရေမွှေးပါသောဆပ်ပြာနှင့် လူကြီးသုံးဆပ်ပြာတို့ကို အသုံးမပြုရပါ။ ရေချိုးပြီးပါက တဘက်ဖြင့် ကြမ်းတမ်းစွာသုတ်ခြင်းကို ရှောင်ကြဥ်ရပါမည်။ ဓာတ်ရောင်ခြည်နှင့် ထိတွေ့သော အရေပြားကို သနပ်ခါး၊ ပေါင်ဒါ၊ ရေမွှေး၊ ဂျိုင်းချွေးနံ့ ပျောက်ဆေးနှင့် ဆရာဝန်ညွှန်ကြားမှု မရှိသော လိမ်းဆေးများမသုံးရပါ။ မုတ်ဆိတ်ရိတ် ရာတွင်လည်း Shaving Cream နှင့် အစိုရိတ်ခြင်းကို ရှောင်ကြဥ်ရမည်။

ဓာတ်ရောင်ခြည်ကုသမှုခံယူနေစဥ်နှင့် ကုသမှုပြီးဆုံးသွားပြီးသည့် ကာလများတွင်လည်း နေရောင်ထဲသို့ သွားလာသည့် အခါ၌ လက်၊ မျက်နှာနှင့်လည်ပင်းတို့ကို လုံခြုံစွာကာပေးနိုင်သော ထီး၊ ဦးထုပ်ကြီးကြီး စသည်တို့ကို အသုံးပြုရမည်။

အဝတ်အစား

လည်ပင်း၊ ရင်သားနှင့်ရင်ဘတ်ကို ဓာတ်ရောင်ခြည် ကုသမှု ခံယူမည့် လူနာများသည် ကော်လာမပါသော လည်ပင်းကျယ်ကျယ်၊ ချိုင်းပွပွ ချည်သားင်္အကျီပွပွများကိုသာ ဝတ်ဆင်သင့်ပါသည်။ သားအိမ်ကင်ဆာ၊ အူမကြီးကင်ဆာ စသည့် ချက်အောက်ပိုင်းနေရာကို ဓာတ်ရောင်ခြည်ကုသမည့် လူနာများသည် ချည်သားလုံချည်များကိုသာ ဝတ်ဆင်ရမည်။

လူနာများသည် ဓာတ်ရောင်ခြည်ကုသစဥ်နှင့် ကုသမှုပြီးဆုံးပြီး (၄)ပတ် ကြာသည်အထိ ကုသမှုခံယူထားသည့် နေရာအလိုက် ဘော်လီ၊ ဘရာစီယာ၊ အတွင်းခံဘောင်းဘီများ ဝတ်ဆင်ခြင်းကို ရှောင်ကြဥ်ရပါမည်။

#ဒေါက်တာမာရီယာလင်း

13/05/2023

ဓာတ်ရောင်ခြည်ကုသမှုခံယူစဥ် ဆောင်ရန်/ရှောင်ရန် အချက်များ (၂)

သားအိမ်ခေါင်း ကင်ဆာနှင့် အူမကြီး ကင်ဆာလူနာများ ဝမ်းဗိုက်ကို ဓာတ်ရောင်ခြည် ပေးသည့်အခါ လိုက်နာရန်

သားအိမ်ခေါင်းကင်ဆာနှင့် အူမကြီးကင်ဆာလူနာများကဲ့သို့ ဝမ်းဗိုက်ကို ဓာတ်ရောင်ခြည် ကုသမှုပေးရသည့် လူနာအချို့တွင် ဝမ်းလျောခြင်း၊ ဆီးကျဥ်ခြင်းများ ဖြစ်တတ်ပါသည်။ ဓာတ်ရောင်ခြည် ကုသမှုပေးသော ဧရိယာပမာဏနှင့် ဓာတ်ရောင်ခြည် ကုသမှု ပြုရာတွင် အသုံးပြုသော နည်းစနစ်ပေါ် မူတည်ပါသည်။ ဓာတ်ရောင်ခြည်ကုသမှု စတင်ပြီးနှစ်ပတ်အကြာတွင် စတင်ဖြစ်ပေါ်တတ်ပြီး ကုသမှုပြီးဆုံး၍ နှစ်ပတ် ကျော်လွန် လာလျှင် သက်သာ ကောင်းမွန်လာပါသည်။ ဓာတ်ရောင်ခြည် ကုသမှု ခံယူစဥ် ဝမ်းလျောခြင်း၊ ဆီးကျဥ်ခြင်းများ ဖြစ်ပေါ်လာပါက ဓာတ်ရောင်ခြည် အထူးကု ဆရာဝန်ထံ ချက်ခြင်း သတင်းပို့ရန် အရေးကြီးပါသည်။ ဆရာဝန်မှ လိုအပ်သော ဆေးဝါးများဖြင့် စနစ်တကျ ကုသမှု ပေးပါလိမ့်မည်။ နူးညံ့ပြီး အစာကြေလွယ်သော အစားအစာများကိုစားသုံးပါ။ ရေများများသောက်ပါ။ သစ်သီးဖျော်ရည်၊ အသီးအနှံ၊ ဟင်းသီးဟင်းရွက်၊ အမျှင် များသော အစားအစာများ၊ ဝမ်းနူးစာများစားခြင်း၊ အပူ၊ အစပ်၊ ကော်ဖီပူပူ၊ လက်ဖက်ရည်ပူပူ၊ အရက်၊ ဘီယာ၊ ဆေးလိပ်၊ ကွမ်းတို့ကို ဓာတ်ရောင်ခြည် ကုသနေစဥ်နှင့် ဓာတ်ရောင်ခြည် ကုသမှုပြီးဆုံးပြီး နှစ်ပတ်အကြာထိ ရှောင်ကြဥ်ရပါမည်။

ဦးရေပြား

ဆံပင်ရှိသောနေရာကို ဓာတ်ရောင်ခြည် ကုသမှုပေးခဲ့လျှင် ဆံပင်ကျွတ်ခြင်း ဖြစ်ပေါ်စေနိုင်ပါသည်။လည်ပင်း ရင်သားနှင့် ဝမ်းဗိုက်တို့ကို ဓာတ်ရောင်ခြည် ကုသမှု ပေးခဲ့လျှင် ဆံပင်ကျွတ်ခြင်း မဖြစ်ပါ။ ဓာတ်ရောင်ခြည် ကုသမှုပြီးဆုံးပြီး ရက် သတ္တပတ် အနည်းငယ် ကြာလျှင် ဆံပင်ပြန်လည် ပေါက်လာပါမည်။ သို့သော် နဂိုထက် အနည်းငယ် ပါးတတ်ပါသည်။

ဦးခေါင်းကို ဓာတ်ရောင်ခြည် ကုသမှုပေးစဥ် ခေါင်းလျှော်နိုင်ပါသည်။ ဦးရေပြားကို အနာတရ မဖြစ်စေဖို့အတွက် ဂရုစိုက်ရန်လိုအပ်ပါသည်။ အနည်းငယ် နွေးသော ရေနွေး (သို့မဟုတ်) ရေအေးကို သုံးနိုင်ပါသည်။

ရေမွှေးပါသော ခေါင်းလျှော်ရည်၊ လူကြီးသုံး ခေါင်းလျှော်ရည်များ၊ ဗောက်ပျောက်ဆေး အစရှိသော ခေါင်းလျှော်ရည်များနှင့် အခြားသော Chemical ပါသော ခေါင်းလျှော်ရည်များ အသုံးပြုရန်မသင့်ပါ။
ကလေးသုံးခေါင်းလျှော်ရည်များကိုသာ အသုံးပြုသင့်ပါသည်။ ဆံပင်အခြောက်ခံရာတွင်လည်း လေပူမဟုတ်ပဲ လေအေးထုတ်ပေးနိုင်သော Hair Dryer ကိုသာ အသုံးပြုသင့်ပါသည်။ ကြမ်းတမ်းသော တဘက်ဖြင့် သုတ်ခြင်းမျိုးကိုလည်း ရှောင်ကြဉ်သင့်ပါသည်။ အပူ ထုတ်သော Hair Dryer ကို အသုံး မပြုရပါ။ ကြမ်းတမ်းသော တဘက်ဖြင့် သုတ်ခြင်းမျိုးကို ရှောင်ကြဥ်သင့်ပါသည်။

#ဒေါက်တာမာရီယာလင်း

11/05/2023

ဓာတ်ရောင်ခြည်ကုသမှုခံယူစဥ် ဆောင်ရန်/ရှောင်ရန် အချက်များ

ပါးစပ်နှင့် ခံတွင်းကျန်းမာရေး

ပါးစပ်၊ခံတွင်း၊ လည်ပင်းကင်ဆာများ၌ ဓာတ်ရောင်ခြည် ကုသမှု စတင်ပြီး (၂)ပတ် အကြာတွင် ပါးစပ်၊ လျှာနှင့်အာခံတွင်းများ ရောင်ပြီး နာကျင်ခြင်း၊ အရသာခံစားမှုမရှိခြင်းများ စတင်ဖြစ်ပေါ်လာပြီး ဓာတ်ရောင် ခြည် ကုသမှုပြီးဆုံး၍ (၄)ပတ်အကြာတွင် သက်သာကာ တဖြည်းဖြည်း ပျောက်ကင်း လာမည်ဖြစ်ပါသည်။

ခံတွင်းသန့်ရှင်းရေးကို အထူးဂရုစိုက် ရပါမည်။အစာ စားပြီးတိုင်း ပလုတ် ကျင်းရပါမည်။

အာဟာရပြည့်ဝသော နူးညံ့ပြီး အစာကြေလွယ်သော အစာများကို စားသောက်ရပါမည်။ ရေများများ သောက်ရပါမည်။ ပါးစပ်၊ လျှာ၊ အာခံတွင်းများ နာနေစဥ် ကာလ အတွင်း အပူအစပ် (ဥပမာ - ကော်ဖီပူပူ၊ လက်ဖက်ရည်ပူပူ၊ ထမင်းပူပူ)၊ မာသော အစားအစာများ၊ အကြော်၊ အရက်၊ ဆေးလိပ်နှင့် ကွမ်းစားခြင်းတို့ ရှောင်ကြဥ်ရပါမည်။

ဓာတ်ရောင်ခြည်ကုသမှုပေးသော ဧရိယာအတွင်း တံတွေးထုတ် ဂလင်းကြီး များကို လွတ်ကင်းအောင် မရှောင်နိုင်ခဲ့လျှင် တံတွေးထုတ်လုပ်မှု ပမာဏနည်းသွားပြီး အာခံတွင်း ခြောက်ခြင်းများ ဖြစ်လာနိုင်ပြီး အစာဝါးရာနှင့် မျိုချရာတွင်လည်း အခက်အခဲဖြစ်လာတတ်ပါသည်။ ဓာတ်ရောင်ခြည် ကုသမှုပြီးဆုံး၍ အနည်းဆုံး (၆) လကျော်မှသာ ပြန်လည်ကောင်းမွန်လာပါသည်။ အချို့လူနာများတွင် ပြန်လည်ကောင်းမွန်ခြင်း မရှိသည်လည်း ဖြစ်နိုင်ပါသည်။

အာခံတွင်းခြောက်ပါက ခံတွင်းကို အမြဲတစေ စိုစွတ်စေရန် ရေမကြာခဏ သောက်ပေးခြင်း၊ ပူတင်း၊ ရေခဲမုန့်များစားပေးခြင်း၊ ပီကေ ဝါးခြင်းဖြင့်လည်းတံတွေးထွက်စေနိုင်ပါသည်။ ထမင်းစားလျှင် မျိုချရ လွယ်စေရန် ဟင်းရည် အနှစ်များများနှင့် စားရပါမည်။ တံတွေးတုများကိုလည်း အသုံးပြုနိုင်ပါသည်။ နှုတ်ခမ်း ခြောက်လျှင် အပြင်နှုတ်ခမ်းကို ဗယ်စလင်းအလှဆီ လိမ်းနိုင်ပါသည်။ နှုတ်ခမ်းအတွင်းဘက်သို့ စားသုံးနိုင်သော သံလွင်ဆီ လူးပေးနိုင်ပါသည်။ မက်ခရု အဖြူစက်များ လျှာပေါ်တွင် ဖြစ်ပေါ်လာလျှင် ဆရာဝန်ညွှန်ကြားမှုပေးသော ဆေးကို အသုံးပြုသင့်ပါသည်။

ခံတွင်းခြောက်စေမည့် အစားအစာများဖြစ်သည့် ကောက်ညှင်းပေါင်း၊ ချောကလက်တို့ကို ရှောင်ရပါမည်။ အရက်၊ ဆေးလိပ် သောက်သုံး ခြင်း၊ ကွမ်းစားခြင်း များကို ရှောင်ကြဥ်ရပါမည်။

သွားနှင့်ခံတွင်း ကျန်းမာရေးအတွက် ဓာတ်ရောင်ခြည် ကုသမှုမစတင်မီ သွားခံတွင်း ဆရာဝန်များနှင့်ကြိုတင်ပြသရန် လိုအပ်ပါသည်။ ဓာတ်ရောင်ခြည်ကုသမှု ခံယူနေစဥ် သွားတုများကို ဖြုတ်ထားရပါမည်။ ဓာတ်ရောင်ခြည် ကုသမှုပေးပြီး အာခံတွင်း များရောင်ခြင်း ၊နာကျင်ခြင်းများ ပျောက်ပြီဆိုမှသာ ပြန်လည်တပ်ဆင် အသုံးပြု ရပါမည်။

အသံအိုးကင်ဆာ ရောဂါလူနာများသည် ရောဂါကြောင့်သော် လည်းကောင်း၊ ဓာတ်ရောင်ခြည် ကြောင့်သော် လည်းကောင်း၊ အသံ ပြောင်းလဲခြင်း အသံဝင်ခြင်းများ ဖြစ်တတ်ပါသည်။ ဓာတ်ရောင်ခြည် ကုသမှုပြီးဆုံးပြီး ရက်သတ္တပတ် အနည်းငယ် ကြာလျှင် ပြန်လည် ကောင်းမွန် လာပါသည်။ သို့သော် ပုံမှန်အသံကို ရာနှုန်းပြည့် ပြန်မရတတ်ပါ။

#ဒေါက်တာမာရီယာလင်း

05/11/2022

ရာသီတုပ်ကွေး သို့မဟုတ် Influenza

ရာသီတုပ်ကွေးဆိုတာကတော့ နှာခေါင်း၊ လည်ချောင်းနဲ့ အဆုတ်မှာ ရောဂါပိုးဝင်ခြင်းပဲဖြစ်ပါတယ်။ နှစ်စဉ်နှစ်တိုင်း တစ်ကြိမ် သို့မဟုတ် နှစ်ကြိမ်ခန့်ဖြစ်တတ်တဲ့သဘောရှိပါတယ်။ မိုးဦးစ၊ မိုးအကုန် ဆောင်းအကူးစတဲ့အချိန်တွေမှာ အဖြစ်များကြတယ်။

အကြမ်းဖျင်းအားဖြင့် ရာသီတုပ်ကွေးဖြစ်တဲ့အကောင်ဟာ အမြဲတစေတူညီနေတာတော့မဟုတ်ပါဘူး။ အသစ်အသစ်သောအကောင်တွေက အမြဲကူးစက်နေတတ်ပါသေးတယ်။ ဒီနှစ်မှာ ဒီအကောင်ကူးစက်ခံထားရလို့ နောက်နှစ်မှာပေါ်တဲ့ရောဂါပိုးဟာ ဒီအကောင်ကြောင့်ပဲဆိုရင်တော့ anti bodyပေါ်ပြီးသားဖြစ်တဲ့အတွက် ရောဂါကိုအလိုလိုတိုက်ဖျက်သွားပါလိမ့်မယ်။ ဒီနှစ်မှာပေါ်တဲ့အကောင်ဟာ အသစ်ဖြစ်နေမယ်ဆိုရင်တော့ ခန္ဓာကိုယ်ထဲမှာ anti bodyမရှိသေးတဲ့အတွက် ရောဂါလက္ခဏာတွေထပ်ပြီးခံစားရတတ်ပါတယ်။

ရောဂါလက္ခဏာတွေအနေနဲ့ကတော့ သာမာန်နှာစေးချောင်းဆိုးဖြစ်မယ်။ ခေါင်းကိုက်မယ်။ အသားတွေနာမယ်။ ကိုက်ခဲမယ်။ ဒီလောက်ပဲအဖြစ်များပါတယ်။ တခါတရံမှာတော့ လည်ချောင်းနာတာ၊ အသက်ရှူရခက်တာ၊ မောတာတွေဖြစ်လာနိုင်ပြီး ဆေးရုံဆေးခန်းသွားရ ဆရာဝန်နဲ့ပြရတာမျိုးတွေလိုအပ်နိုင်ပါတယ်။

သတိထားရမယ့် လက္ခဏာတွေကတော့ ရင်ဘတ်အောင့်တာ၊ မူးတာ၊ အသက်ရှူရခက်တာ၊ အရမ်းအားနည်းတာတွေဖြစ်ပြီး ဒီလက္ခဏာတွေပေါ်လာရင်တော့ နီးစပ်ရာဆရာဝန်နဲ့ပြသဖို့လိုပါလိမ့်မယ်။

လက်ပုံမှန်ဆေးတာ၊ mask တပ်တာ၊ သန့်ရှင်းစွာနေထိုင်တာ၊ လူထူထပ်တဲ့နေရာတွေကိုရှောင်တာ တွေက ရာသီတုပ်ကွေးဖြစ်ပွါးမှုကို ကာကွယ်နိုင်ပါတယ်။ Covid ရောဂါတွေဖြစ်ပွါးနေဆဲဖြစ်ပြီး အထက်ပါအချက်များကိုတော့အမြဲတစေလိုက်နာနေခြင်းက ပတ်ဝန်းကျင်ကိုရော မိမိကိုယ်ကိုပါ ရောဂါဖြစ်ပွါးခြင်းကနေကာကွယ်နိုင်မှာဖြစ်ပါတယ်။

ရောဂါလက္ခဏာစတင်ခံစားရပြီဆိုတာနဲ့ အကိုက်အခဲပျောက်ဆေးအနည်းငယ်သောက်တာ၊ အနားယူတာ၊ ရေများများသောက်တာတွေကို စတင်လုပ်ဆောင်သင့်ပါတယ်။ ရာသီတုတ်ကွေးရောဂါဟာ အိပ်ရေးဝဝအိပ်ရုံ၊ အားရှိအောင်စားသောက်နေထိုင်ရုံနဲ့အလွယ်တကူ ပျောက်ကင်းစေနိုင်ပေမယ့် ပေါ့ဆသင့်တဲ့ရောဂါမျိုးတော့မဟုတ်ပါဘူး။ ရောဂါလက္ခဏာတွေခံစားရတာက တစ်ပတ်ကျော်လာပြီး မပျောက်သေးဘူးဆိုရင်တော့ ဆရာဝန်နဲ့ဆွေးနွေးတိုင်ပင်ပြီး လိုအပ်တဲ့ ပိုးသတ်ဆေးသောက်တာမျိုး ဆောင်ရွက်သင့်ပါတယ်။

အသက်ကိုဥာဏ်စောင့်တာမို့ ဘဝကိုကျန်းမာစွာ ဖြတ်သန်းနိုင်ကြပါစေ။

#ဒေါက်တာမာရီယာလင်း
MariaLynn

31/10/2022

သကြားနဲ့ကင်ဆာ သို့မဟုတ် အသိအမှား

သကြားစားရင်ကင်ဆာဆဲလ်တွေပွါးလာတယ်တဲ့

ဘယ်သူကစပြီး ဘယ်လိုဖြန့်လိုက်လည်း မသိပေမယ့် အတော်ရှင်းရခက်သော ပြဿနာတစ်ခုပင်။ ယုံကြည်မှုအမှားတွေကတဆင့် လူနာတွေဒုက္ခရောက်ကြရသည်မှာမနည်းတော့။

Carcinogenicဆိုသည်မှာ ကင်ဆာဖြစ်စေနိုင်သော အရာများကို ဆိုလိုချင်းဖြစ်သည်။ ဥပမာ-ဆေးလိပ်သောက်ခြင်းသည် Carcinogenic ။ အရက်သောက်ခြင်းသည် Carcinogenic ။ ကွမ်းစားခြင်းသည် Carcinogenic ။ဒါစားရင်ကင်ဆာဖြစ်မည်။ ရှောင်ရင် ကင်ဆာဖြစ်နိုင်ချေနည်းမည်။ ဒီသဘောတရား။

သို့သော် သကြားသည် Carcinogenic မဟုတ်ပေ။ ရှောင်ရှောင် စားစား ကင်ဆာဖြစ်နိုင်ချေနည်းသွားမည်မဟုတ်။ သို့သော်….။

ကင်ဆာဆဲလ်ပွါးသည်ဟူသောအသိဖြင့် အချိုတွေရှောင်၊ သွေးထဲအချိုဓါတ်တွေနည်း၊ မူးလဲ၊ အားမရှိ စသည်စသည်ဖြင့်ကြုံတွေ့ရသော နောက်ဆက်တွဲပြဿနာတွေကများမှများပင်။ အချို့မှာ အသက်ပင်ဆုံးပါးသွားသည့်အထိ။ ကြောက်စရာအသိအမှားများ။ အန္တရာယ်ရှိသော ဖြန့်ဝေခြင်းအမှားများ။

စနစ်တကျပြုလုပ်ထားသော သုတေသနဆိုင်ရာ လေ့လာချက်များအရ သကြားနှင့်ကင်ဆာသည် လုံးလုံးမျှမသက်ဆိုင်ပေ။ မပတ်သက် ပတ်သက်အောင် စပ်ဆက်လို့ရသည်တွေကတော့ရှိသည်ပေါ့။ သို့ပေသော်ငြားဝေးလွန်းလှပါသည်။

အချုပ်ဆိုရသော်။
ကင်ဆာဖြစ်နေသော်ငြားလည်း သကြားရှောင်စရာမလို။ ပုံမှန်စားနိုင်သည်။ အလွန်အကျွံစားခြင်းကိုမှုရှောင်သင့်သည်။ ကင်ဆာကြောင့်မဟုတ်။ သွေးတိုးဆီးချို စသောရောဂါများကိုပိုဆိုးနိုင်စေသောကြောင့်ဖြစ်ပေသည်။

ကင်ဆာနှင့်သကြားလားလားမျှမဆိုင်ပေ။ ထို့ပြင် သကြားရှောင်သော ကင်ဆာလူနာ များကို ဆရာဝန်များသိပ်စိတ်ဆိုးကြသည်။

#ဒေါက်တာမာရီယာလင်း
.MariaLynn

16/10/2022

သားအိမ်ခေါင်းကင်ဆာဟာ အဖြစ်များတဲ့ရောဂါတစ်ခုအနေနဲ့ရပ်တည်လာခဲ့တာတော်တော်ကြာပါပြီ။ တစ်ကမ္ဘာလုံးအနေအထားနဲ့ကြည့်ရင် အမျိုးသမီးတွေမှာ ဖြစ်တတ်တဲ့ ကင်ဆာရောဂါတွေရဲ့ အဆင့် လေး နေရာမှာရှိနေပြီး မြန်မာနိူင်ငံအနေအထားနဲ့ကြည့်ရင် အမျိုးသမီးတွေမှာဖြစ်တဲ့ကင်ဆာတွေထဲမှာ အဆင့် နှစ် နေရာမှာရှိနေပါတယ်။

ဒီpostမှာတော့ ဘယ်အရာတွေကသားအိမ်ခေါင်းကင်ဆာကိုဖြစ်စေနိူင်လဲဆိုတာကိုပဲ ဦးစားပေးပြောပြပါမယ်။

၁။ Human papilloma Virus(HPV)

လိင်ဆက်ဆံရာကတစ်ဆင့်ကူးစက်တတ်တဲ့ ရောဂါပိုးတစ်မျိုးက သားအိမ်ခေါင်းကင်ဆာဖြစ်ပွါးခြင်းမှာ အဓိကတာဝန်ရှိသူဖြစ်နေပါတယ်။ သားအိမ်ခေါင်းကင်ဆာရောဂါဖြစ်နေတဲ့လူနာအယောက်တစ်ရာမှာ(၇၀)လောက်က ဒီဗိုင်းရပ်စ်ကြောင့်ဖြစ်တာလို့ တွေ့ရှိရပါတယ်။HPVအနေနဲ့ မျိုးကွဲပေါင်း ၁၀၀ကျော်ရှိပေမယ့် ကင်ဆာဖြစ်စေနိူင်တဲ့ အဓိကမျိုးစိတ်ကတော့ HPV 16နဲ့ HPV 18ဆိုတဲ့နှစ်မျိုးပဲဖြစ်ပါတယ်။ အခုနိူင်ငံတော်ကထိုးပေးနေတဲ့ သားအိမ်ခေါင်းကင်ဆာကာကွယ်ဆေးဆိုတာ အဲဒီမျိုးစိတ်နှစ်ခုကို ကာကွယ်တဲ့ဆေးပါပဲ။ နောက်အနာဂါတ်မှာ မြန်မာနိူင်ငံမှာ သားအိမ်ခေါင်းကင်ဆာ ဖြစ်ပွါးမှုနူန်းအများကြီးလျော့သွားမှာတော့ အသေအချာပါပဲ။

၂။ကိုယ်ခံအားကျဆင်းစေသောအနေအထားများရှိခြင်း

HIV/AIDSကဲ့သို့ရောဂါရှိသောသူများသာမက steroids ကဲ့သို့ဆေးများကြာရှည်အသုံးပြုရသောအနေအထားများ၊ ကိုယ်တွင်းအင်္ဂါအစားထိုးထားသူများဟာလည်း ခုခံအားကျဆင်းစေတဲ့အတွက် သားအိမ်ခေါင်းကင်ဆာဖြစ်နိူင်ပါတယ်။

၃။ဆေးလိပ်သောက်ခြင်း

ဆေးလိပ်သောက်တဲ့အမျိုးသမီးဟာ ဆေးလိပ်မသောက်တဲ့အမျိုးသမီးထက် သားအိမ်ခေါင်းကင်ဆာဖြစ်နိူင်ချေ နှစ်ဆပိုများပါတယ်။

၄။အသက်အရွယ်

အသက်၂၀အောက်မှာ သားအိမ်ခေါင်းကင်ဆာဖြစ်နိူင်ချေဟာ အရမ်းနည်းပါတယ်။ ဒါပေမယ့် အသက်၂၀ကျော်လာတဲ့အခါမှာတော့ သားအိမ်ခေါင်းကင်ဆာဖြစ်နိူင်ချေဟာ တဖြည်းဖြည်းပိုပိုများလာတာကို တွေ့ရပါတယ်။

၅။သန္ဓေတားဆေးများသောက်သုံးခြင်း

ကာလကြာရှည် သန္ဓေတားဆေးတွေသောက်သုံးတာကလည်း သားအိမ်ခေါင်းကင်ဆာကိုဖြစ်စေတယ်လို့သက်မှတ်ထားကြပါတယ်။

၆။ စီးပွါးရေးအခြေအနေ

ဆင်းရဲတာအပြစ်တစ်ခုတော့မဟုတ်ပေမယ့် ဆင်းရဲတဲ့နိူင်ငံ မိသားစုတွေမှာ ပိုပြီးသားအိမ်ခေါင်းကင်ဆာအဖြစ်များတာကို တွေ့ရှိရပါတယ်။ အဓိကကတော့ သားအိမ်ခေါင်းကင်ဆာကိုကြိုတင်ကာကွယ်တာမျိုး ကြိုတင်စစ်ဆေးမှုတွေမလုပ်နိူင်တာမျိုးကြောင့် သားအိမ်ခေါင်းကင်ဆာဖြစ်ပွါးမှုနူန်း ပိုမိုများပြားလာတာပဲဖြစ်ပါတယ်။

၇။ အိမ်ထောင်ပြုသောအရွယ်စောခြင်း/လိင်ဆက်ဆံဖော်များခြင်း

လိင်ဆက်ဆံဖော်များလေလေ အပေါ်မှာပြောခဲ့တဲ့ HPVပိုးကူးစက်ခံရနိူင်ခြေများလေလေပါပဲ။ ဒီရောဂါကိုစတင်လေ့လာခဲ့သူက သီလရှင်တွေမှာ ဒီရောဂါမတွေ့ပဲ ပြည့်တန်ဆာအမျိုးသမီးတွေဆီမှာဒီရောဂါအဖြစ်များတာကိုစသတိထားမိရာကနေ ဒီအချက်က သားအိမ်ခေါင်းကင်ဆာကိုဖြစ်စေနိူင်တယ်ဆိုတာကိုသိလာခဲ့တာပဲဖြစ်ပါတယ်။

ဒါကတော့အဓိကအချက်တွေကိုရှင်းပြတာပါ။ အဲဒီအချက်တွေအပြင်အခြားဖြစ်စေနိူင်တဲ့အခြေအနေ(risk factor)တွေလည်း အများကြီးကျန်ပါသေးတယ်။

ကြိုတင်စစ်ဆေးခြင်း(Screening)
ရောဂါလက္ခဏာများ
ကာကွယ်ဆေး(vaccine) တွေအကြောင်းကို အလျင်းသင့်သလို့ရေးသားသွားပေးပါမယ်။

Dr.Maria Lynn
ဒေါက်တာမာရီယာလင်း

13/02/2022

ရောဂါတကယ် သက်သာအောင်ဆေးဘယ်လိုသောက်ရမလဲ

ပထမဆုံးဆေးသောက်တဲ့ပုံစံနှစ်မျိုးရှိတာလေးပထမဆုံးပြောချင်ပါတယ်။
ပထမတချက်က အချိန်မှန်သောက်ရတဲ့ဆေးတွေရှိပါတယ်။ တနေ့တကြိမ် တနေ့နှစ်ကြိမ် တနေ့သုံးကြိမ် စသည်ဖြင့် ပေါ့။
နောက်တစ်ကြိမ်ကတော့ Prn (Pro Re Nata) လို့ခေါ်တဲ့ အခြေအနေပေါ်မူတည်ပြီး သောက်ရတဲ့ဆေးမျိုးပါ။ အထူးသဖြင့် အကိုက်အခဲပျောက်ဆေးတွေကိုပုမှန်သောက်စရာမလိုပဲ ဖြစ်မှသောက်တာမျိုးကို ဆိုလိုပါတယ်။

ဆေးတွေကို ဆရာဝန်ကညွှန်ကြားတဲ့အခါမှာ သင့်တော်မယ့် သောက်နည်းနဲ့ညွှန်ပြရပါတယ်။ အထူးသဖြင့် ပိုးသတ်ဆေးတွေဟာ တနေ့ဘယ်နှကြိမ် ဘယ်နှရက် သောက်ရမယ်ဆိုတဲ့ အတိအကျညွန်ကြားချက်တွေရှိပြီးသားပါ။ ကူးစက်ခံထားတဲ့ပိုးအပေါ်မူတည်ပြီး အဲဒီပိုးအတွက်ထိရောက်တဲ့ဆေးကို သက်မှတ်ထားတဲ့ သောက်နည်းနဲ့တကွ ညွှန်ကြားရပါတယ်။ ဒါမှသာ ဒီပိုးကိုသတ်နိူင်မှာဖြစ်ပါတယ်။

အဲဒီလိုမဟုတ်ပဲ တစ်ရက်နှစ်ရက်လောက်သောက်ပြီး သက်သာလို့ဆက်မသောက်တဲ့အခါ ရောဂါပိုးကခဏငုတ်သွားပြီး အခွင့်အရေးရတာနဲ့ပြန်ပေါ်လာတတ်ပါတယ်။ အမြစ်ပြတ်ဖို့မလွယ်တဲ့သဘောပေါ့။ ဒါ့အပြင် နောက်ထပ်ကြောက်စရာကောင်းတာတခုက Drug Resistance လို့ခေါ်တဲ့ဆေးယဉ်ပါးခြင်းပြသနာပါပဲ။ ရောဂါဖြစ်လိုက် ဆေးလေးတစ်ရက်နှစ်ရက်လောက်သောက်လိုက် သက်သာသွားရင် ဆက်မသောက်ပဲရပ်လိုက်နဲ့နေခြင်းအားဖြင့် ဒီရောဂါပိုးဟာ ဒီဆေးကိုမကြောက်တော့ပဲယဉ်ပါးလာပါတယ်။ ဆေးမတိုးတော့ဘူးလို့ပြောပြောနေကြတဲ့သဘောပါပဲ။

ပိုးသတ်ဆေးတွေရဲ့သဘောတရားအရ ဒီဆေးနဲ့မတိုးတော့ရင် ဒီထက်တဆင့်မြင့်တဲ့ ဆေးကို ပြောင်းပေးရပါတယ်။ ငွေကုန်ကြေးကျပိုများသလို လူလည်းဆေးဒဏ်ပိုခံရပါတယ်။ အချို့သောလူနာတွေမှာ ပိုးသတ်ဆေးအပြင်းတွေပေးတာတောင် မသက်သာတဲ့အနေအထားမျိုးတွေ မကြာခဏတွေ့ရပါတယ်။ အဓိကကတော့ အပေါ်မှာပြောခဲ့တဲ့အနေအထားတွေကြောင့်ပါပဲ။ ဆေးကိုပုံမှန်မသောက်တာ။ ရက်ပြည့်အောင်မသောက်တာ စတဲ့ အကြောင်းတွေကြောင့်ပါပဲ။

အထူးသဖြင့် ပိုးသတ်ဆေးတွေကို Prnအနေနဲ့မပေးကြပါဘူး။ ဒါကြောင့်ပိုးသတ်ဆေးတခုစသောက်တော့မယ်ဆိုတာနဲ့ သတ်မှတ်ထားတဲ့ရက်ပြည့်အောင်အတိအကျသောက်စေချင်ပါတယ်။

အကိုက်အခဲပျောက်ဆေးတွေကိုတော့prnအနေနဲ့သောက်လို့ရပါတယ်။ ဒါပေမယ့် ဒါကတော်ရုံမပြင်းထန်တဲ့အနေအထားမျိုးအတွက်ပါပဲ။ အရက်နာကျလို့ မနက်မှာအကိုက်အခဲပျောက်ဆေးသောက်တာမျိုး။ အိပ်မပျော်လို့အိပ်ဆေးသောက်တာမျိုး စတာတွေဟာပြသနာမရှိပေမယ့် ညတိုင်းအိပ်မပျော်တာ အမြဲကိုက်ခဲနေတဲ့အခါမျိုးကြရင်တော့ ဆရာဝန်နဲ့ဆွေးနွေးပြီး စွဲသောက်ရမယ့်ဆေးမျိုး အကြံဥာဏ်တောင်းခံနိူင်ပါတယ်။

ဒီခေတ်ကြီးထဲမှာ အများကြီးလေ့လာရလွယ်ကူနေပါပြီ။ Googleလည်းခေါက်ပါ။ တတ်သိနားလည်တဲ့သူနဲ့လည်းဆွေးနွေးပါ။ စောစောသိရင်စောစောကုလို့ရပါတယ်။

ကျန်းမာပျော်ရွှင်နိူင်ကြပါစေ။

#ဒေါက်တာမာရီယာလင်း
.MariaLynn

04/02/2022

အစာအိမ်ယောင်ခြင်း (Gastritis) နှင့် နောက်ဆက်တွဲများ

ဘဝမှာ တခါတော့ ဗိုက်အောင့်ဖူးတတ်ကြမှာပါပဲ။ လေထိုးလို့အောင့်တာ အစာအိမ်ယောင်လို့အောင့်တာ အူအတက်ယောင်လို့အောင့်တာ စသည်စသည်ဖြင့်ပေါ့။ ဒီထဲကမှအဖြစ်များတဲ့ အစာအိမ်ယောင်တဲ့အကြောင်းလေး ပြောပြပါမယ်။

အစာအိမ်ယောင်တယ်ဆိုတာ?

အစာအိမ်ယောင်တယ်ဆိုတာ အစာအိမ်ရဲ့အတွင်းဘက်နံရံအလွှာ ယောင်တာပါပဲ။ အဖြစ်များတဲ့ရောဂါမို့ အခြေခံကျန်းမာရေးအသိတော့ရှိပြီးသားနေမှာပါပဲ။ သိပ်မသိဘူးထင်လောက်တဲ့ အကြောင်းအရာလေးတွေကို ဦးစားပေးပြောပြသွားပါမယ်။

ဘာတွေကြောင့်အစာအိမ်ကယောင်ရတာလဲ?

ပထမဆုံးအစာအိမ်ယောင်စေတဲ့အကြောင်းအရာကတော့ Helicobacter Pylori(H pylori) လို့ ခေါ်တဲ့ပိုးကြောင့်ပါပဲ။ ဒါကြောင့်အစာအိမ်ယောင်ပြီးဆေးရုံတက်တဲ့အခါ ဒီပိုးရှိ/မရှိ ကိုစစ်ရပါတယ်။ တကယ်လို့ ဒီပိုးကြောင့်အစာအိမ်ယောင်တာလို့သတ်မှတ်ရင် လိုအပ်တဲ့ပိုးသက်ဆေးကို သောက်ဖို့လိုပါတယ်။

နောက်တချက်ကတော့ အကိုက်အခဲပျောက်ဆေးတွေအများကြီးသောက်တာ စွဲသောက်တာမျိုးပါ။

Stressများခြင်းကလည်း အစာအိမ်ယောင်စေတတ်ပါတယ်။

အစာမရှိပဲအရက်သောက်မိတာ အရက်အလွန်အကျွံသောက်မိတာကလည်း အစာအိမ်ယောင်ခြင်းကို ဖြစ်စေတာပါပဲ။

အစပ်တွေအလွန်အကျွံစားတာမျိုးကနေတဆင့်လည်းအစာအိမ်အတွင်းပိုင်းနံရံတွေကို ယောင်စေနိူင်ပါတယ်။

အခြားအစာအိမ်ရောဂါတွေ အလုံးအကျိတ်တွေကလည်းအစာအိမ်ယောင်တာကိုဖြစ်စေ ပိုဆိုးစေနိူင်ပါတယ်။

ရောဂါလက္ခဏာတွေကရော?

အဓိကကတော့ဗိုက်အောင့်တာပါပဲ
အထူးသဖြင့်အစာစားပြီးကာစမှအောင့်တာ/အောင့်နေတာကအစာစားလိုက်မှသက်သာတာ စတဲ့အစာနဲ့ဆက်စပ်နေတာမျိုးဖြစ်နိူင်ပါတယ်
ပျို့အန်တာ ချွေးစေးတွေပြန်တာမျိုးလည်း ဖြစ်နိူင်ပါတယ်

စစ်ဆေးမှုတွေက ဘာတွေရှိလဲ?

X ray ရိုက်တာ
H pyloriစစ်တာ
မှန်ပြောင်းကြည့်တာ တွေ လိုအပ်ရင်လုပ်ရနိူင်ပါတယ်

ကုသမှုတွေကရော?

ဆေးပညာမှာတသမတ်ထဲကုသမှုတွေမရှိတဲ့အတွက် နီးစပ်ရာဆရာဝန်နဲ့တိုင်ပင်ဆွေးနွေးသင့်ပါတယ်
အကြောင်းအရာအမျိုးမျိုးကြောင့် ဆေးခန်းမသွားနိူင်ရင်တော့
Omeprazole 40mg
Cimetidineစတဲ့ဆေးတွေသောက်တာ
အစာကိုပျော့ပျော့ပဲစားတာ
အပူအစပ်ရှောင်တာလေးတွေ လုပ်ကြည့်လို့ရပါတယ်

အစာအိမ်ခဏခဏယောင်ရင်ဘာတွေဖြစ်နိူင်လဲ?

အစာအိမ်အနာဖြစ်တာ
အစာအိမ်ပေါက်တာ
အစာအိမ်သွေးကြောပေါက်တာ
အစာအိမ်ကင်ဆာ ဖြစ်တာမျိုးတွေအထိဖြစ်လာနိူင်ပါတယ်။

ဘယ်လိုသတိထားလို့ရလဲ?

အစပ်လျော့စားသင့်ပါတယ်
အစားကိုပုံမှန်စားသင့်ပါတယ်။ အချိန်ရောက်ကျမှစားတာမျိုးမလုပ်သင့်ပါဘူး။
အရက်/ဆေးလိပ်လျော့သောက်သင့်ပါတယ်
အစာကိုတခါတည်းအများကြီးစားတာထက် နည်းနည်းနဲ့ခဏခဏစားတာမျိုးလုပ်သင့်ပါတယ်

အစာအိမ်ယောင်တာနဲ့ပတ်သတ်လို့ကတော့ ဒီလောက်သိထားရင်လုံလောက်ပါတယ်။

ကျန်းမာရေးဂရုစိုက်ကြပါ

#ဒေါက်တာမာရီယာလင်း
.MariaLynn

03/02/2022

အိုမီခရွန် ( Omicron)ရောဂါပိုးဟာ ပြည်တွင်းကူးစက်မှုစတင်နေပြီဖြစ်ပါတယ်။ တိတိကျကျရောဂါလက္ခာအနေနဲ့မရှိပေမဲ့ သာမာန်အအေးမိ တုတ်ကွေးလိုရောဂါလက္ခဏာတွေအနေနဲ့ပဲ လာမှာဖြစ်ပါတယ်။ နူန်းမယ် နှာချေမယ် ချောင်းဆိုးမယ် ခေါင်းကိုက်မယ် တကိုယ်လုံးကိုက်ခဲနေတာမျိုးဖြစ်မယ် စတဲ့လက္ခဏာတွေအနေနဲ့ပဲလာပါတယ်။

အကြမ်းဖျင်းအားဖြင့် ပိုမိုကူးစက်လွယ်မယ်လို့သိထားရပြီး လက်ရှိမျိုးကွဲ Deltaထက် ပိုဆိုး/မဆိုးကတော့ မသိရသေးပါဘူး။ လက်ရှိဖြစ်ပွါးနေတဲ့ Covid 19ရောဂါဟာ မျိုးရိုးဗီဇပြောင်းလဲမှုတွေဆက်တိုက်ဖြစ်ပေါ်နေပြီး ဘယ်အချိန်အထိဆက်ဖြစ်နေမလဲဆိုတာ ပြောရခက်နေပါသေးတယ်။

ကြိုတင်ကာကွယ်မှုတွေအနေနဲ့တော့သိထားပြီးသားအကြောင်းအရာတွေပါပဲ။
Mask တပ်ပါ
လက်ဆေးပါ
Social distancing အတက်နိူင်ဆုံးနေပါ
တစ်ခုခုသံသယရှိရင် နီးစပ်ရာ Fever Clinicတွေနဲ့ဆက်သွယ်ပါ
လိုအပ်တဲ့ကုသမှုကိုအတက်နိူင်ဆုံးခံယူပါ

မြန်မာနိူင်ငံကြီးဟာ ဒီထက်ပိုဆိုးစရာလည်းမရှိတော့လို့ အားတင်းထားရုံပါပဲ။

#ဒေါက်တာမာရီယာလင်း
.MariaLynn

20/07/2021

Covidမကူးအောင်ရှောင်ဖို့ထက်
ကူးလာရင်ဘယ်လိုခံနိူင်ရည်ရှိအောင်နေထိုင်မလဲဆိုတာပိုပြီးအရေးကြီးနေပါပြီ

သန်းခေါင်ထက်နက်တဲ့ညတွေဆိုတာ တကယ်ရှိပါတယ်

30/01/2021

ရင်သားကင်ဆာရဲ့ ရောဂါလက္ခဏာများ

ရင်သားကင်ဆာဟာ အဖြစ်များတဲ့ကင်ဆာရောဂါတစ်ခုဖြစ်ပါတယ်။ ဘယ်လိုလက္ခဏာတွေက ရင်သားကင်ဆာရဲ့ လက္ခဏာတွေဖြစ်မလဲ။ ကြည့်ရအောင်။

၁။ ရင်သားအရွယ်အစားပြောင်းလဲလာခြင်း။

ရက်တိုတိုအတွင်းမှာ ရင်သားက ကြီးသွားတာ သေးသွားတာ သတိထားမိတယ်ဆိုရင် ဂရုစိုက်ဖို့လိုပါတယ်။

၂။ အလုံးအကျိတ်စမ်းမိခြင်း။

မိမိရဲ့ရင်သားမှာ အလုံးအကျိတ်တွေစမ်းမိတယ်ဆိုရင် ချက်ခြင်းဆရာဝန်နဲ့ပြသပြီး လိုအပ်တဲ့စစ်ဆေးမှုတွေပြုလုပ်ဖို့လိုပါတယ်။ ပုံမှန် မစိုးရိမ်ရတဲ့ ကင်ဆာမဟုတ်တဲ့ အလုံးအကျိတ်တွေဖြစ်နိူင်ပေမယ့် ကင်ဆာအကျိတ်တွေကိုလည်း မေ့ထားလို့မရပါဘူး။ စောစောသိပြီးစောစောကုသမှုခံယူတာထက်ကောင်းတဲ့ အကျိုးကျေးဇူးဆိုတာမရှိပါဘူး။

၃။ ရင်သားအပေါ်ရှိအရေပြားပြောင်းလဲလာခြင်း။

ရင်သားရဲ့အပေါ်မှာရှိတဲ့အရေပြားဟာ ရောင်ရမ်းလာတယ် ပုံမှန်မဟုတ်တော့ဘူးလို့ထင်ရင်လည်း နီးစပ်ရာဆရာဝန်နဲ့ပြသပြီး ဘာဆက်လုပ်ရမလဲဆိုတာ တိုင်ပင်သင့်ပါတယ်။ ရင်သားပေါ်ကအရေပြားကိုစမ်းကြည့်တဲ့အခါ လိမ္မော်ခွံကိုစမ်းရသလိုခံစားချက်မျိုးရတဲ့အပြင် လိမ္မော်ခွံလိုမျိုး အပေါက်သေးသေးလေးတွေရှိနေရင် သေချာစစ်ဆေးဖို့လိုပါတယ်။

၄။ နို့သီးခေါင်း အနေအထားပြောင်းလဲလာခြင်း။

ရင်သားထိပ်ဟာ အတွင်းကိုချိုင့်ဝင်သွားတာမျိုး ရောင်လာပြီး အထိမခံနိူင်အောင် နာလာတာမျိုးဟာ ရင်သားကင်ဆာရဲ့ အတွေ့များတဲ့လက္ခဏာတစ်ခုဖြစ်ပါတယ်။ ဒါအပြင့် နိူ့သီးခေါင်းကနေ နို့မဟုတ်ပဲ အရည်ကြည်တွေထွက်နေတာ သွေးအရောင်လိုမျိုးတွေထွက်နေတာမျိုးဆိုရင် သေချာပေါက် ဆရာဝန်နဲ့ ပြသသင့်ပါတယ်။

၅။ ရင်သားနာခြင်း

ပုံမှန် ပိုးကြောင့်ရင်သားနာတာ ထိခိုက်မိတာကြောင့်နာတာ menstruationကြောင့်နာတာမျိုးတွေက ပိုအဖြစ်များပေမယ့် ရင်သားနာတာရက်ကြာလာပြီး မပျောက်ဘူးဆိုရင် ရင်သားကင်ဆာဟုတ်မဟုတ် စစ်ဆေးဖို့လိုပါတယ်။

ဒီအချက်တွေရှိတိုင်းရင်သားကင်ဆာဖြစ်နေပြီလို့သေချာပေါက်ပြောလို့မရသလို ဒီအချက်တွေမရှိပဲနဲ့လည်း ရင်သားကင်ဆာဖြစ်နိူင်ပါတယ်။ မသိထားတာထက်စာရင် သိထားတဲ့အခါ ပိုပြီး ဂရုစိုက်ဖြစ်မယ်လို့မျှော်လင့်ရပါတယ်။

ကာကွယ်ခြင်းဟာကုသခြင်းထက်ကောင်းပါတယ်
ကာကွယ်လို့မရနိူင်တော့ဘူးဆိုရင်တော့ စောစောသိပြီး စောစောကုသမှုခံနိူင်တာထက်ကောင်းတဲ့အရာမရှိနိူင်တော့တာတော့အသေအချာပါပဲ။

ဂရုစိုက်ပါ။ နေကောင်းအောင်နေပါ။

#ဒေါက်တာမာရီယာလင်း
.MariaLynn

ရင်သားကင်ဆာမဖြစ်အောင် ဘာတွေသတိထားရမလဲ

https://www.facebook.com/100671945316949/posts/109357637781713/

27/01/2021

ပိန်အောင်ဘယ်လိုနေထိုင်သင့်တယ်ဘာညာရေးတဲ့အခါကျတော့ ဝ အောင်ရော ဘယ်လိုလုပ်ရမလဲတဲ့။ ဟုတ်ပြီ။ ဒီတစ်ခါမှာတော့ ဝ အောင် ဘယ်လိုနေထိုင်စားသောက်သင့်လဲပြောပြပေးပါမယ်။ သတိပြုရမှာက ဘယ်လောက်စားစား အလေးချိန်တက်မလာတဲ့သူတွေဆိုတာ တကယ်ရှိပါတယ်။ အဲဒီတော့ ဒီအချက်လေးတွေကို သိထားရင် တစ်ထောင့်တစ်နေရာမှာ အသုံးဝင်နိူင်မယ် မျှော်လင့်ရပါတယ်။

၁။ အစားမစားခင် ရေသောက်တာကိုရှောင်ပါ

ရေသောက်ထားတဲ့အခါ အစာအိမ်ဟာ လုံလောက်တဲ့ ကယ်လိုရီပမာဏကို စုပ်ယူနိူင်ဖို့ခက်ပါတယ်။ ဒါကြောင့် အစာမစားခင်ရေသောက်တတ်တဲ့အကျင့်ကို ရှောင်ကျဉ်သင့်ပါတယ်။

၂။ ခဏခဏစားပါ

တစ်ခါတည်းအများကြီးစားလိုက်တာထက် ခဏခဏစားတာက ပိုပြီး ကိုယ်အလေးချိန်ကိုတက်စေပါတယ်။

၃။ နိူ့သောက်ပါ

နွားနိူ့အပါအဝင်နိူ့အမျိုးမျိုးဟာ ပရိုတင်းနဲ့ ကယ်လိုရီ ကြွယ်ဝစွာပါဝင်တဲ့အတွက် ကိုယ်အလေးချိန်ကို ပိုပြီး တက်စေလာနိူင်ပါတယ်။

၄။ weight gainer shakeတွေသောက်ပါ

ဝိတ်တက်အောင်သက်သက်စီမံထားတဲ့ weight gainer shakeတွေကိုသောက်သုံးလို့ရပါတယ်။ အဲဒီအရာတွေမှာ ကယ်လိုရီ၊ ပရိုတင်းနဲ့ ကာဗွန်ဟိုက်ဒရိတ်တွေ အလုံအလောက်ပါဝင်ပါတယ်။

၅။ ပန်းကန်ကြီးကြီးနဲ့စားပါ

ပန်းကန်ကြီးကြီးနဲ့စားတဲ့အခါ ပိုများများစားမိတယ်လို့ လေ့လာတွေ့ရှိချက်တွေကပြောပါတယ်။ များများစားရင် ကိုယ်အလေးချိန်ပိုတက်လာမှာပါပဲ။

၆။ ထမင်းစားတဲ့အခါ အသီးအရွက်ကို နောက်ဆုံးမှစားပါ

ထမင်းနဲ့အသား ဒါမှမဟုတ် ပရိုတင်းပါတာတွေကိုအရင်စားပြီး အသီးအရွက်ကိုနောက်ဆုံးမှစားပါ။ ဒီအလေ့အကျင့်ဟာ ကိုယ်အလေးချိန်တက်လာဖို့ကို အများကြီးအထောက်အကူဖြစ်စေပါတယ်။

၇။ အိပ်ရေးဝဝအိပ်ပါ

အိပ်ရေးဝဝအိပ်တဲ့အကျင့်ကို ကျန်းမာရေးကိုလည်းပိုကောင်းစေပြီး ကိုယ်အလေးချိန်လည်း တက်စေမှာဖြစ်ပါတယ်။

သတိထားရမှာတစ်ချက်ကတော့ ကိုယ်အလေးချိန်တက်လာတာနဲ့အမျှ ကျန်းမာရေးအတွက်ဆိုးကျိုးတွေရှိလာတာကိုပါပဲ။ ရှိသင့်တဲ့ BMIထက်များလာပြီဆိုရင် နှလုံးရောဂါ ဆီးချိုရောဂါစတဲ့ပြဿနာတွေဟာ ဖြစ်လာနိူင်ပါတယ်။ ဒါကြောင့် ထိုက်သင့်တဲ့ကိုယ်အလေးချိန်မှာထိန်းထားနိူင်ဖို့လိုပါတယ်။

ကျန်းမာလှပနိူင်ကြပါစေ...။

#ဒေါက်တာမာရီယာလင်း
.MariaLynn

26/01/2021

အရင်postရဲ့အဆက်ပါ။ ဘယ်လိုအလေ့အကျင့်တွေက ကိုယ်အလေးချိန်တက်တာကို တားဆီးနိူင်မှာလဲ ဆက်ပြီး ကြည့်ရအောင်။ အပိုင်း တစ်ရဲ့ linkလေးကို အောက်မှာထည့်ပေးထားပါတယ်။

၁။ အသီးအရွက်များများစားပါ။

အသီးအရွက်များများစားတာက ကိုယ်အလေးချိန်ကိုတက်တာကို အများကြီးတားဆီးနိူင်ပါတယ်။ ဗိုက်ဆာတဲ့အခါ အဆီများတဲ့အစာတွေစားတာမျိုးက အလွယ်တကူ ကိုယ်အလေးချိန်ကိုတက်စေပါတယ်။ ဒါကြောင့်အသီးအရွက်များများစားတဲ့အကျင့်ကို လုပ်ပါ။

၂။ ကြိုက်လို့ဆိုပြီး စွတ်စားတဲ့အကျင့်ကိုရှောင်ပါ။

ဘယ်အရာမဆို ထိုက်သင့်သလောက်စားတာကပဲ ပိုပြီးကျန်းမာရေးနဲ့ညီညွတ်စေပါတယ်။ တစ်ခုခုကိုကြိုက်လို့ဆိုပြီး အများကြီးစားတဲ့အကျင့်ဟာလည်း ကိုယ်အလေးချိန်ကိုအများကြီး တက်စေတာမို့ ရှောင်သင့်ပါတယ်။

၃။ လေ့ကျင့်ခန်းတစ်ခုခုလုပ်တဲ့အကျင့်ကိုထားပါ။

ကိုယ့်မှာလေ့ကျင့်ခန်းပုံမှန်လုပ်ဖို့ အချိန်မရှိဘူးဆိုရင်တောင် အနည်းဆုံးတော့လမ်းများများလျောက်တဲ့အကျင့်လောက်တော့လုပ်ပါ။ ကိုယ်က stressများတဲ့အလုပ်တွေလုပ်ရတာများတယ်ဆိုရင် ဒီအလေ့အကျင့်လေးဟာ ပိုလိုပါတယ်။

၄။ ကိုယ်ကထမင်းအများကြီးစားတတ်တယ်ဆိုရင် ပန်းကန်သေးသေးနဲ့စားပါ။

ထမင်းတစ်ပန်းကန်စားတတ်တဲ့အကျင့်ရှိတဲ့သူဟာ ပန်းကန်သေးသေး ကြီးကြီး တစ်ပန်ကန်ဆို ဗိုက်ဝတယ်လို့ခံစားရပါတယ်တဲ့။ ဒါကြောင့် အများကြီးမစားမိအောင်သတိထားတဲ့အနေနဲ့ ထမင်းပန်းကန်ခပ်သေးသေးနဲ့ စားတာက ကိုယ်အလေးချိန်တက်ဖို့ကို ကာကွယ်ပေးနိူင်ပါတယ်။

၅။ အပူအစပ်လေးတွေ စားပေးပါ။

အပူအစပ်တွေမှာပါတဲ့ capsaicin ဆိုတဲ့ ဓါတ်တစ်မျိုးဟာ အစာစားချင်စိတ်ကို အနည်းငယ်လျော့စေပါတယ်။ စားချင်စိတ်လျော့သွားတဲ့အခါ အများကြီးမစားမိတော့တာမို့ ကိုယ်အလေးချိန်အများကြီးတက်တာကို ကာကွယ်ပြီးသားလည်းဖြစ်ပါတယ်။

၆။ ကာဗွန်ဟိုက်ဒရိတ် (Carbohydrates)တွေအတက်နိူင်ဆုံးရှောင်ပါ။

ကိုယ်အလေးချိန်ကိုတက်စေတဲ့အစားအစာတွေထဲမှာ Carbohydrates ကအဓိကပါတာမို့ ရှောင်နိူင်လေအကျိုးရှိလေပါပဲ။

ဒါကတော့ ဘယ်အရာတွေကကိုယ်အလေးချိန်ကိုတက်စေပြီး ဘယ်အရာတွေဟာ ကိုယ်အလေးချိန်တက်မှာကိုတားဆီးနိူင်သလဲဆိုတဲ့ factsလေးတွေပဲဖြစ်ပါတယ်။ သိထားတဲ့အတွက် အထောက်အကူဖြစ်လိမ့်မယ်လို့မျှော်လင့်ရပါတယ်။

ကျန်းကျန်းမာမာနဲ့ လှပနိူင်ကြပါစေဗျာ...။

#ဒေါက်တာမာရီယာလင်း
.MariaLynn

အပိုင်း (၁)ကို ဒီမှာဖတ်ပါ။

https://www.facebook.com/100671945316949/posts/112578964126247/

24/01/2021

ပိန်ချင်တယ် ပိန်ချင်တယ်လို့အော်နေပေမယ့် တကယ်ရော weightချဖို့ကြိုးစားကြရဲ့လား။ အဖြေကတော့ Noပဲများပါမယ်။ မင်းသမီးတစ်ယောက်မဟုတ်ဘူး ပိန်ပိန်မပိန်ပိန် မိမိရဲ့ personal life/professional ကို မထိခိုက်ဘူးဆိုရင် ပိန်ချင်ပေမယ့် weightမချဖြစ်ကြတာများပါတယ်။ များစွာသော weightချနည်းတွေရှိပါတယ်။ Diet planတွေ keto dietတွေ exerciseတွေ စသည်ဖြင့်ပေါ့။ ဘယ်နည်းမဆို ကြာရှည်ဇွဲမလျော့ပဲ လုပ်ကြဖို့တော့လိုပါတယ်။

ဒီpostမှာတော့ ဘယ်လိုနည်းလမ်းလေးတွေက နေ့စဉ်နေထိုင်မှုဘဝမှာ ပိန်ဖို့အထောက်အကူပြုလဲဆိုတာလေးတွေပြောပေးပါမယ်။

၁။ အစာမစားခင်ရေသောက်ပါ။

အစာမစားခင်တစ်နာရီခွဲလောက်အလိုမှ ရေတစ်လီတာရဲ့ ဘူးတစ်ဝက်လောက်သောက်တဲ့အကျင့်လေးလုပ်ပါ။ ဒါက ကယ်လိုရီတွေအများကြီးလောင်ကျွမ်းစေပါတယ်။ အစာမစားခင်ရေသောက်တဲ့အကျင့်ရှိသူဟာ ရေသောက်တဲ့အကျင့်မရှိသူထက်အများကြီး Body weightကို ကျစေပါတယ်။

၂။ မနက်စာကို ကြက်ဥ/ proteinစားတဲ့အကျင့်လုပ်ပါ။

ကြက်ဥ ဒါမှမဟုတ် protein ပါတဲ့ Dietတစ်ခုခုစားတဲ့အကျင့်လုပ်ပါ။မနက်စာအများကြီးစားတဲ့အကျင့်ဟာ သိသိသာသာကို အလေးချိန်တိုးစေပါတယ်။

၃။ ဘလက်ကော်ဖီ/ Green teaသောက်ပါ။

သကြား/နိူ့မပါတဲ့ကော်ဖီဟာလည်း Calories တွေကိုလောင်ကျွမ်းစေတဲ့အတွက် ပိန်ဖို့အထောက်အကူပြုပါတယ်။ Green teaဟာလည်း အကျိုးကျေးဇူးတွေအများကြီးရှိပြီး အဲဒီထဲကတစ်ခုကတော့ Calories တွေလောင်ကျွမ်းစေပါတယ်။

၄။ သကြားကိုအတက်နိူင်ဆုံးရှောင်ပါ။

သကြားအများကြီးစားတဲ့အကျင့်ဟာ Weightကိုသိသိသာသာတက်စေပြီး နှလုံးရောဂါ ဆီးချိုရောဂါတွေကိုလည်း ဖြစ်စေနိူင်ပါတယ်။ ဒါကြောင့်အတက်နိူင်ဆုံးသကြားကိုရှောင်တာကပိုကောင်းပါတယ်။

၅။ အနီးအနားလက်တစ်ကမ်းမှာ အသီးအနှံ များကိုသာထားပါ။

ဗိုက်ဆာလို့ယူစားမိရင်တောင် Weightမတက်စေတော့ဘူးပေါ့။

၆။ လမ်းများများလျောက်ပါ။

သိပ်အဝေးကြီးလည်းမဟုတ်ဘူး။ အလျင်လည်းမလိုဘူးဆိုရင် လမ်းပဲလျောက်ပါ။ Exerciseလုပ်ပြီးသားလည်းဖြစ်တာမို့ အကျိုးကျေးဇူးတွေအများကြီးရှိပါတယ်။

၇။ အိပ်ရေးဝဝအိပ်ပါ။

အိပ်ရေးမဝသူတွေဟာ ပိုပြီးဝ တတ်ကြပါသတဲ့။ အိပ်ရေးဝဝအိပ်ပြီး စောစောထတဲ့အကျင့်ကိုလုပ်ပါ။ တနေကုန်အိပ်ယာထဲလှဲနေတာမျိုးတွေကိုတော့ ရှောင်သင့်ပါတယ်။

Postရှည်မှာ စိုးလို့ နှစ်ပိုင်းခွဲတင်ပေးပါမယ်။ နောက်တစ်ပိုင်းမှာလည်း weightမတက်အောင် အလွယ်တကူလုပ်လို့ရတဲ့နည်းလမ်းတွေဆက်လက်ပြောပေးမှာမို့ စောင့်ဖတ်ပေးကြပါခင်ဗျာ...။

#ဒေါက်တာမာရီယာလင်း
.MariaLynn

22/01/2021

လူတော်တော်များများကသီချင်းနားထောင်ရတာကိုကြိုက်ကျပါတယ်။ နားကြပ်ကိုနားထဲထည့်ရင်း ကိုယ့်ကမ္ဘာလေး ကိုယ်ဖန်တီးရတာလည်း ကောင်းတဲ့အရာပဲလို့ ယူဆထားတဲ့သူတွေအများကြီးရှိကြတယ်မဟုတ်လား။ လေ့လာတွေရှိချက်တွေအရ သီချင်းနားထောင်ခြင်းဖြင့် ဘာအကျိုးကျေးဇူးတွေရနိူင်မလဲ။ ကြည့်ရအောင်...။

၁။ နှလုံးကျန်းမာရေးကောင်းမွန်စေပါတယ်။

လေ့လာစစ်ဆေးချက်တွေအရ ခန္ဓာကိုယ်အတွင်းသွေးစီးဆင်းမှုတွေဟာ သီချင်းနားထောင်နေတဲ့အချိန်မှာ ပိုပြီးတည်ငြိမ်ပါတယ်တဲ့။ ဒါအပြင် နှလုံးခုန်နူန်းကိုနှေးစေပြီး သွေးပေါင်ကိုလည်း တည်ငြိမ်စေပါတယ်။ ဒါကြောင့် နှလုံးရဲ့အလုပ်လုပ်နူန်းဟာ ပုံမှန်အနေအထားကိုရောက်စေပြီး နှလုံးကျန်းမာရေးကို ကောင်းမွန်စေနိူင်ပါတယ်။ musicအမျိုးအစားအလိုက်တော့အနည်းငယ်ကွာခြားနိူင်မှာပါ။ သိပ်ဆူညံတဲ့musicတွေနဲ့ Baseသံများတဲ့musicတွေကတော့ ဒီလိုဖြစ်စေဖို့မသေချာပါဘူး။

၂။ စိတ်ခံစားမှုကိုကောင်းမွန်စေပါတယ်။

သီချင်းနားထောင်တဲ့အခါ ဦးနှောက်မှာရှိတဲ့ Cellအချို့ကနေ ဒိုပါမင်း( dopamine)တွေထွက်စေပါတယ်။ Dopamineတွေဟာ စိတ်ပူပန်တာ စိတ်ကျတာစတဲ့ အနေအထားတွေကနေ အများကြီးသက်သာရာရစေပါတယ်။

၃။ အမှတ်တရများဆီကိုခေါ်ဆောင်နိူင်ပါတယ်။

သူနဲ့အတူတူနားထောင်ခဲ့ဖူးတဲ့သီချင်းတွေ ဘာညာပေါ့။ စတာပါ။ အတိတ်မေ့တာမျိုး သတိမေ့တတ်တာမျိုး စိတ်ပုံမှန်မဟုတ်တာမျိုးခံစားနေရတဲ့ လူနာတွေမှာ Music Therapyပေးတဲ့ကုထုံးဆိုတာရှိပါတယ်။ စစ်တမ်းတွေအရ အထက်ပါအနေအထားတွေကိုအများကြီးတိုးတက်သက်သာစေပါသတဲ့။

၄။ နာကျင်မှုကိုသက်သာစေနိုင်ပါတယ်။

နာကျင်မှုခံစားနေရတဲ့လူနာတွေကို ကုတဲ့ကုထုံးများစွာထဲမှာ Music Therapyဆိုတာ ပါပါသေးတယ်။

၅။ အစာနည်းနည်းပဲစားချင်စိတ်ကိုဖြစ်စေပါတယ်။

လေ့လာတွေ့ရှိချက်တွေအရ ခပ်အေးအေးသီချင်းတစ်ပုဒ်ကိုဖွင့်ပြီး အစာစားတဲ့အခါ ခပ်နည်းနည်းနဲ့ဗိုက်ဝစေတက်ပါတယ်တဲ့။ အချို့သော weight ကျစေတဲ့လေ့ကျင့်မှုအပြုအမူအချို့မှာတော့ ဒီအချက်ကပါပြီးသားဖြစ်မှာပါ။ Hot pot buffet ဆိုင်တွေမှာ သီချင်းအေးအေးလေးတွေဖွင့်ထားတတ်တာဒါကြောင့်များလားလို့ တွေးစရာပါပဲ။

ဒါကတော့အဓိကကောင်းကျိုးတွေပါပဲ။ သီချင်းအမျိုးအစားအလိုက်ကွာခြားမှုတွေတော့ရှိနေဦးမှာပါ။ ဘာပဲဖြစ်ဖြစ် ကျွန်တော်ကိုယ်တိုင်ကလည်း သီချင်းနားထောင်ရတာကြိုက်သူမို့ ဝေမျှပေးတာပါ။

Sharing is Caringပဲမဟုတ်ပါလား....။

ဒေါက်တာမာရီယာလင်း

17/01/2021

Stressတွေလျော့နည်းအောင် ဘယ်လိုအလေ့အကျင့်တွေလိုမှာလဲ?

နေ့စဉ်နေထိုင်မှုဘဝမှာ stressတွေကို မရိုးနိူင်အောင်ကြုံတွေ့ရမှာပါပဲ။ အလုပ်ရဲ့စိတ်ပင်ပန်းမှုတွေ၊ deadlineတွေ၊ အမျိုးမျိုးသောအခက်အခဲတွေ ၊Relationship အဆင်မပြေမှုတွေ၊ ငွေရေးကြေးရေးအခက်အခဲတွေ စသည်ဖြစ်ပေါ့။

အချို့သောstressတွေကရှောင်လွဲလို့မရပါဘူး။ ပြီးတော့ stressတွေက လုပ်ငန်းတိုးတက်အောင်မြင်ဖို့ကိုလည်း အခန်းအစိတ်အပိုင်းတစ်ခုအနေနဲ့ရှိနေပြန်ပါသေးတယ်။

အဲဒီတော့ Stressတွေပိလာတဲ့အခါ ဘယ်လိုရုန်းထွက်ကြမလဲ။

၁။အိပ်ရေးဝဝအိပ်ပါ

အိပ်ရေးဝဝအိပ်ခြင်းဖြင့် စိတ်ကြည်လင်စေပြီး အသစ်အသစ်သောအတွေးများကို ရစေမှာဖြစ်ပါတယ်။ သိပ်ပင်ပန်းလာတဲ့အခါ အရာအားလုံးကိုလွတ်ချပြီး စိတ်ချလက်ချအိပ်လိုက်ခြင်းဟာ အများကြီးအထောက်အကူပြုပါတယ်။

၂။ ကျန်းမာရေးနဲ့ညီညွတ်အောင်စားပါ

အချိုများတဲ့အစားအသောက်တွေဟာStressကိုပိုများစေပါတယ်။ ကျန်းမာရေးနဲ့ညီညွတ်အောင်အသီးအရွက်နဲ့ အသားကိုအချိုးအစားမျှတအောင်စားခြင်းဖြင့် စိတ်ရောလူပါ လန်းဆန်းနိူင်ပါတယ်။

၃။ သီချင်းနားထောင်ပါ

သီချင်းနားထောင်ရတာကြိုက်တဲ့သူတွေအဖို့တော့ ဒီနည်းလမ်းကတော်တော်အလုပ်ဖြစ်ပါတယ်။ နားကြပ်ကိုတပ်ထားပြီး ပြင်ပလောကနဲ့အဆက်အသွယ်ဖြတ်ထားပြီး တစ်ယောက်တည်းနေရတာလည်း stressတွေကိုအများကြီးလျော့စေပါတယ်။

၄။ တရားထိုင်ပါ

တရားထိုင်တယ်ဆိုပေမယ့် အိပ်ယာပေါ်မှာငြိမ်ငြိမ်လေးနေပြီး အသက်ကိုပုံမှန်ရှူသွင်း ရှုထုတ်နေတာမျိုးလေးလည်းရပါတယ်။ အဓိကက စိတ်တည်ငြိမ်မှုကို ပြန်တည်ဆောက်ယူတဲ့သဘောပါပဲ။

၅။ သူငယ်ချင်းတစ်ယောက်ယောက်နဲ့တိုင်ပင်ဆွေးနွေးပါ။

ကိုယ့်ရဲ့အခက်အခဲ(stressဖြစ်စေတဲ့အကြောင်းအရာ)ဟာ ကိုယ့်အတွက်ဖြေရှင်းဖို့ခက်ခဲတယ်ဆိုပေမယ် အခြားတစ်ယောက်ရဲ့viewကကြည့်တဲ့အခါ ဖြေရှင်းနည်းကို အလွယ်တကူတွေ့ရှိနိူင်ပါတယ်။ ဒါကြောင့် ပြောပြတိုင်ပင်ဆွေးနွေးသင့်ပါတယ်။

၆။ ကော်ဖီလျော့သောက်ပါ။

ကော်ဖီကလည်း stressကိုလျော့စေတယ်ထင်ရပေမယ့် တကယ်တမ်းကတော့ stressကိုမသက်သာစေတဲ့အပြင် အိပ်မပျော်တတ်လို့ stressကိုပိုများစေပါတယ်။

၇။ အရက်/ဘီယာ ရှောင်ပါ

တော်တော်များများကစိတ်ညစ်ရင်အရပ်သောက်တတ်ပါတယ်။ မူးနေတုန်းခဏတော့ စိတ်ညစ်ပြေစေတယ်ဆိုပေမယ့် နိူးလာတဲ့အခါ ခေါင်းကိုက်ပြီး stressကို ပိုများစေပါတယ်။ ပြီးတော့မူးနေတဲ့အချိန်မှာ ပြဿနာကိုဖြေရှင်းလိုက်မိရင် ရှင်းရပိုခက်တတ်ပါတယ်။

Stressအမျိုးမျိုးဟာပုံစံအမျိုးမျိုးနဲ့စောင့်ကြိုနေဦးမှာပါပဲ။ အဲဒီတော့ရင်ဆိုင်ပါ။ အခက်အခဲတိုင်းဟာ ဖြေရှင်းဖို့လိုပါတယ်။

အကောင်းဆုံးကျော်လွှားနိူင်ကြပါစေ...။

ဒေါက်တာမာရီယာလင်း

13/01/2021

ရင်သားကင်ဆာဟာ အမျိုးသမီးတွေမှာ တော်တော်အဖြစ်များတဲ့ ကင်ဆာရောဂါတစ်မျိုးဖြစ်ပါတယ်။ နောက်ဆုံးရရှိထားတဲ့အချက်အလက်တွေအရ အမျိုးသမီးလေးယောက်မှာ တစ်ယောက်ဟာ ရင်သားကင်ဆာဖြစ်နေကြောင်း စစ်‌ဆေးတွေ့ရှိ ရပါတယ်။ တော်တော်များတဲ့ပမာဏပါပဲ။ ဒီတော့ ရင်သားကင်ဆာဟာ ဘယ်အရာတွေကြောင့်ဖြစ်နိုင်သလဲ။ ဘယ်လိုလူမျိုးတွေမှာဖြစ်နိုင်သလဲဆိုတာလေး ပြောပြပါမယ်။

၁။ အသက်ကြီးသူများ

အသက်ငယ်တဲ့သူတွေထက် အသက်ကြီးတဲ့သူတွေမှာ ရင်သားကင်ဆာ ပိုဖြစ်တာကို တွေ့ရှိရပါတယ်။

၂။ ရင်သားကင်ဆာမျိုးရိုးရှိသူများ

မိမိကိုယ်တိုင်ရင်သားကင်ဆာဖြစ်ဖူးတယ်ဆို ထပ်ဖြစ်နိုင်ချေများပါတယ်။ ဥပမာ-မိမိက ညာဘက်ရင်သားမှာ ကင်ဆာဖြစ်ဖူးတယ်ဆို ဘယ်ဘက်ရင်သားမှာ ကင်ဆာဖြစ်နိုင်ချေရှိပါတယ်။ ပြီးတော့ အမေ အဖွား မောင်နှမတွေထဲမှာ ရင်သားကင်ဆာဖြစ်ဖူးတဲ့သူတွေရှိရင် မိမိမှာလည်း ဖြစ်နိုင်ချေရှိတာမို့ ကြိုတင်စစ်ဆေးမှု ခံယူသင့်ပါတယ်။

၃။ ခန္ဓာကိုယ် ဝ သူများ

ပိန်တဲ့သူတွေထက် ဝတဲ့သူတွေမှာပိုပြီးရင်သားကင်ဆာဖြစ်နိုင်ချေများပါတယ်။ Estrogen (အီစတိုဂျင်) လို့ခေါ်တဲ့ဟော်မုန်းက ဝ တဲ့သူတွေမှာ ပိုပြီး ထိတွေ့မှုများလို့ပါ။

၄။ ရင်ဘတ်ကို ဓါတ်ရောင်ခြည်ထိတွေ့ဖူးသူများ

အကြောင်းအမျိုးမျိုးကြောင့် ရင်ဘတ်ကိုဓါတ်ရောင်ခြည်ကုထုံးနဲ့ကုသဖူးတယ်ဆိုရင် အသက်ကြီးလာတာနဲ့အမျှ ရင်သားကင်ဆာဖြစ်နိုင်ချေပိုများပါတယ်။

၅။ အမျိုးသမီးသဘာဝကိစ္စများ

ရာသီလာတာစောခြင်း၊ သွေးဆုံးတာနောက်ကျခြင်း၊ အသက်ကြီးမှ ကလေးရခြင်း၊ အိမ်ထောင်မပြုဖူးသူများ ဟာရင်သားကင်ဆာဖြစ်နိုင်ချေများတဲ့အနေအထားမှာရှိနေကြောင်းတွေ့ရှိရပါတယ်။

၆။ ဟော်မုန်းဆေးများသောက်ခြင်း

သွေးဆုံးပြီးတဲ့အခါ ခန္ဓာကိုယ်က estrogen( အီစတိုဂျင်) ဟော်မုန်းတွေထွက်တာနည်းသွားတဲ့အတွက်အသားအရည်ခြောက်ကပ်တာမျိုးတွေဖြစ်တတ်ပါတယ်။ အဲဒါကြောင့် အသားအရည်စိုပြေအောင် ဟော်မုန်းဆေးတွေသောက်တတ်ကြပါတယ်။ အဲဒီလိုသောက်နေတဲ့အမျိုးသမီးတွေဟာလည်း ရင်သားကင်ဆာဖြစ်နိုင်ချေပိုများတာ တွေ့ရပါတယ်။

၇။ အရက်သောက်ခြင်း

အရက်ဟာ ရင်သားကင်ဆာကိုဖြစ်စေတဲ့အရာတစ်ခုမို့ အမျိုးသမီးတွေအနေနဲ့ သတိထားသင့်ပါတယ်။

ဒီအချက်တွေကတော့ ရင်သားကင်ဆာကို ဖြစ်စေနိုင်တဲ့အချက်တွေပါပဲ။ ဆေးပညာတွေတိုးတက်လာတယ်ဆိုပေမယ့် ကာကွယ်ခြင်းကကုသခြင်းထက်ပိုကောင်းနေတုန်းပါပဲ။ ဂရုစိုက်ပါ။ ကာကွယ်ပါ။ ဖြစ်လာတဲ့အခါ အကောင်းဆုံးရင်ဆိုင်ပါ။

ဗဟုသုတမှသည် ကျန်းမာခြင်းဆီသို့ လမ်းပေါက်နိုင်ကြပါစေ။

ဒေါက်တာမာရီယာလင်း

Dr. Maria Lynn