26/07/2024
තරුණ කාන්තාවක් නාසය සූරමින් හෙමීට ඇවිත් මගේ සායන මේසය ඉදිරියෙන් වාඩිවුණා.
මගේ පළමු අදහස වුණේ මේ තවත් එක් කැස්ස හෙම්බිරිස්සා ලෙඩෙක් කියලා වුණත් ඇගේ හැසීරීම පොඩ්ඩක් වෙනස්. බිම බලාගෙන, සොටු සූරමින් හිටපු ඇගේ මළානික මුහුණෙන් ඇයට කැස්ස හෙම්බිරිස්සාවට වඩා ගැටලුවක් ඇති බව මට වැටහුණා.
"මොනා වෙලාද අද ආවෙ?" මම හැමෝගෙන්ම අහන සුපුරුදු ප්‍රශ්ණය ඇගෙනුත් ඇහුවා.
ඇගෙන් උත්තරයක් ලබෙන්න තත්ත්පර කීපයක් ගියා. මම බලාගෙන හිටියා.
"මට මැරෙ*න හිතිලා තියෙන්නේ ඩොක්ටර්." ඈ කිව්වා. "ඊයේ රෑත් මට හිතුණා මැරෙ*නම . ඒත් කොහොමහරි උදේ වෙනකං අල්ලං හිටියා ඉස්පිරිතාලේ එන්න." ඇගේ දෑස් තෙත්වෙන්න පටන් අරන් තිබ්බ.
මම බේත් ලියන්න හිතාගෙන අල්ලන් හිටපු පෑන පැත්තකින් තිබ්බා.
"එහෙම තිරණයක් නොගෙන ඔයා අද ආපු එක ඇත්තටම ගොඩක් හොඳ තීරණයක්." මම කිව්වේ ඇයට තවත් කතා කරන්න සහායක් වෙන්න හිතාගෙන.
එලියේ පෝලිම කොච්චර දිග වුණත් ඇගේ කතාව මා කෙටියෙන් හෝ ඇසිය යුතුම වන්නේ ඇයව අනිවාර්යයෙන්ම විස්තර සහිතව, ඉතා ඉක්මනින් විශේඥ මනෝ වෛද්‍ය ඒකකය වෙත යොමු කල යුතු වන නිසා.
**************************
ජීවත් වෙද්දි මිනිස්සුන්ට නොසෑහෙන්න ප්‍රශ්ණ එනවා. දැන් මොකද කරන්නේ කියලා හිතාගන්න බැරුව, ප්‍රශ්ණ වලට මූණ දෙන විදිහක්වත් පේන්නෙ නැතුව මීට වඩා ජීවිතේ නැතිවුණා නම් හොඳයි කියලා හිතෙන වෙලාවල් එන්න පුළුවන්.
ඒත් කාලය සහ අවස්ථා ගෙවිලා යද්දි අතාරින්නේ නැතුව අල්ලගෙන හිටියොත් අපිට අනිවාර්යයෙන්ම ගොඩක් ප්‍රශ්ණ වලට විසදුම් හොයා ගන්න පුළුවන්.
ලංකාවේ ප්‍රධාන රජයේ රෝහල් හැම එකකම පාහේ දැන් විශේඥ මනෝ වෛද්‍ය වරයෙක්ගෙන් සමන්විත කණ්ඩායමක් ඉන්නවා මානසික ගැටළු වලට පිලියම් ලබා දෙන්න.
භින්නෝන්මාදය විතරක් නෙවෙයි, ඔබට මනෝ වෛද්‍ය සහය අවශ්‍ය ගැටලුව වෙන්නේ, මොකද කාන්සිය, විශාදය වගේ තත්ත්වයනුත් දැන් ලංකාවේ ගොඩක් බහුල තත්ත්වයන්. කවදාවත් සෞඛ්‍ය කාර්ය මණ්ඩලය ඔබ මෙවැනි ගැටලුවක් එක්ක ආවොත් නොසලකා හරින්නේ නෑ.
ඒ නිසා රජයේ සියලු මනෝ වෛද්‍ය සායන ඔබ වෙනුවෙන් විවෘත වෙලා තියෙද්දි, එතැනට යොමු වෙන විදිහ ගැන ගැටලුවක් තියෙනවා නම්, ඔබට කෙලින්ම බාහිර රෝගී අංශයෙන් වුණත් ඒ සායන ගැන දැනුවත් වෙලා යොමු කිරීම් කරගන්න පුළුවන්.
වැදගත්ම දේ, ඔබ කෙටිකාලීන ප්‍රශ්ණයකට සදාකාලික පැනයාමක් හොයන්න එපා. ඔබට ගැටළුවක් නම් උපදේශන සේවා ලබාගැනීමේ ඉඳලා අවශ්‍ය වුණොත් ඖෂධ භාවිතා කිරීම මගිනුත් මෙවන් ගැටලු වලට පිළියම් සොයා ගන්න පුළුවන්, මොකද මේ බොහොමයක් ලෙඩ එන්නේ අපේ මොළයේ සාමාන්‍ය රසායනික සංයුතිය වෙනස් වීම නිසාවෙන්. ඖෂධ මගින් මේ අසමතුලිත වූ සංයුතීන් නැවත යථා තත්ත්වයට ගැනීමෙන් සාමාන්‍ය ජීවිතයක් දක්වා පැමීණීමේ හැකියාව ඔබට තියෙනවා.
ඒ නිසා බියට ලැජ්ජාවට පත් නොවී එන්න. ඔබේ ජීවිතය ඔබට විතරක් නෙවෙයි, ඔබේ පවුලටත්, මිතුරන්ටත්, රටටත් ඉතා වටිනවා.
******************************
කතාව කෙටියෙන් අසා ගත් පසුව මම යොමුකිරීමේ පත්‍රිකාව ලියලා එහෙම්ම මනෝ වෛද්‍ය ඒකකයේ සිටින මගේ වෛද්‍ය සගයාට ඇමතුමක් දුන්නා. සමහර වෙලාවල් තියෙනවා සායන දිනයක් දීලා ගෙදර යවලා අපිට අත පිහා ගන්න බැරි.
"නෑ අද ක්ලිනික් තිබ්බේ නැති වුණාට කමක් නෑ භාතිය. මම මෙඩිකල් වෝඩ් එකේ ඉන්නේ රිෆරල් එකක." ඈ කියුවා. "මම දැන්ම එන්නම්. ලෙඩාව එවන්න!"
ඒ විගසම මම සෞඛ්‍ය කාර්ය සහායිකාවක් සමඟ ලෙඩාව මනෝ වෛද්‍ය සායනය වෙත යැවුවේ මගේ වෛද්‍ය මිතුරියට ස්තූතිවන්ත වන ගමන්.
