16/08/2020
Շագանակագեղձի ադենոմա կամ շագանակագեղձի բարորակ գերաճ (ՇԲԳ)
Շագանակագեղձի ադենոման կամ շագանակագեղձի բարորակ գերաճը (ՇԲԳ) համարվում է տարեց տղամարդկանց մոտ ամենատարածված ուրոլոգիական հիվանդությունը, այն իրենից ներկայացնում է շագանակագեղձի բարորակ նորագոյացություն։ ՇԲԳ-ի հանգույցները աստիճանաբար աճելով սեղմում են միզուկի պրոստատիկ հատվածը և առաջացնում միզարձակության խանգարումներ։
ՇԲԳ-ն ոչ քաղցկեղային հիվանդություն է, որևէ կապ չունի քաղցկեղի հետ և քաղցկեղի չի վերածվում։
ՇԲԳ-ն սովորաբար հանդիպում է 50 տարեկանից հետո և տարիքի հետ զուգահեռ դրա հաճախությունը աճում է։ Կլինիկական դրսևորումները նույնպես տարիքային են. 55-ում տղամարդկանց 25%-ն ունի այս կամ այն աստիճանի օբստրուկտիվ ախտանիշներ (դժվարամիզություն, թույլ շիթով միզարձակություն, ընդհատվող միզարձակություն, միզապարկը դատարկել չկարողանալու զգացողություն), իսկ 75 տարեկանում տղամարդկանց կեսն արդեն ներկայացնում է այդ գանգատները։
Ախտորոշումը դնելուց հետո հիվանդը պետք է մանրամասնորեն տեղյակ պահվի բուժման բոլոր հնարավոր և ընդունելի տարբերակների մասին, վերջիններիս դրական, բացասական և կողմնակի հետևանքներով հանդերձ։ Թուլյ սիմպթոմատիկ հիվանդների համար լավագույն տարբերակը հսկողությունն է։
Դեղորայքային բուժում
Ալֆա-ադրենոպաշարիչներ
5-ալֆա ռեդուկտազի ինհիբիտորներ
Համակցված բուժում (առաջին երկու խմբերի պրեպարատներով բուժումը կոչվում է ՇԲԳ-ի համակցված բուժում, որը բավականին արդյունավետ է)։
Վիրահատական բուժում
1) Շագանակագեղձի ներմիզուկային մասնահատում (TURP)
Վիրահատությունների 95%-ը կատարվում է այս էնդոսկոպիկ եղանակով առանց կտրվածքի, որը պահանջում է 1-2 օրով հոսպիտալացում։ Շագանակագեղձի ներմիզուկային մասնահատումը աշխարհում համարվում է ՇԲԳ-ի բուժման «ոսկե ստանդարտ»:
2) Բաց վիրահատություն (բաց ադենոմէկտոմիա)։
Մինիմալ ինվազիվ բուժում
1) Շագանակագեղձի լազերային էնուկլեացիա (այս բուժման մեթոդը ավելի հաճախ կիրառվում է շագանակագեղձի համեմատաբար ավելի փոքր չափերի ժամանակ)։
2) Շագանակագեղձի ներմիզուկային պլազմային վապորիզացիա
3) Շագանակագեղձի զարկերակի էմբոլիզացիա
4) Շագանակագեղձի ներմիզուկային ասեղային աբլացիա և այլն (Այս բուժման եղանակների ճնշող մեծամասնությունը կիրառվում է հատուկ ցուցումների դեպքում և հաճախ երբ հնարավոր չէ կատարել շագանակագեղձի ներմիզուկային մասնահատում)։
Ֆիտոթերապևթիկ բուժում
Ֆիտոթերապևթիկ միջոցների արդյունավետությունն ապացուցված չէ, դրանց գործողության մեխանիզմն էլ մինչև վերջ պարզված չէ, չնայած, որ դրանք տարածում են գտել ԱՄՆ-ում և Եվրոպայում։
Հեղինակ՝ ՀԱՅԿ ՍԱՄՎԵԼԻ ՄԱՐԳԱՐՅԱՆ (Հեռ 055371151)
Ուրոլոգ
Member of EAU
CEO & Co-Founder at Հարցեր բժիշկներին - Բժշկական խորհրդատվություն։
