هبة فهمى
اخصائى صحة نفسية وتعديل سلوك
ماجيستير صحة نفسية
دبلومة اكلنيكى
استشارى علاقات اسرية
11/07/2025
🧠💬 هو أنا بتدلع… ولا محتاج/ة علاج نفسي فعلًا؟
فيه سؤال بيطارد ناس كتير:
"أنا حاسس بتعب… بس يمكن ببالغ؟ يمكن بدّلع؟!"
وده لأننا اتربينا نكبت مشاعرنا، ونقيس "الجدّ" بمعايير قاسية جدًا:
لو مش بانعزل تمامًا أو بعيط 24 ساعة، يبقى أكيد أنا كويس… صح؟
لو بشتغل وبتعامل مع الناس، يبقى أنا تمام… مش كده؟
❌ الحقيقة: التعب النفسي مش لازم يبقى دراما علشان يكون حقيقي.
✅ ولو حسيت إنك مش مرتاح، أو دايمًا قلقان/ة، أو في شيء جواك مش متشاف… ده كفاية.
الدلع هو إننا نهرب من مسؤوليتنا تجاه نفسنا.
لكن إنك تلاحظ تعبك وتطلب مساعدة = وعي + شجاعة.
العلاج النفسي مش رفاهية.
هو مساحة نرجّع فيها صوتنا الداخلي اللي ضاع وسط الزحمة،
ونفهم إحنا ليه تعبنا، ومنين نبدأ نرتاح بجد.
🟡 قولولي بصراحة:
عمركم حسيتوا إنكم تعبانين بس خفتوا تطلبوا مساعدة علشان "ماحدش يقول إنكم بتتدلعوا"؟
شاركوا تجربتكم أو رأيكم 💬
10/07/2025
💭 أنماط التفكير اللاواعي عند الأهل… وأثرها على أولادنا
كتير من الأهالي بيتصرفوا بنيّة الحب والخوف على أولادهم… لكن أحيانًا، من غير ما ياخدوا بالهم، بيقعوا في أنماط تفكير لاواعية ممكن تأذي أولادهم نفسيًا وتسيب أثر طويل.
👀 زي إيه؟
• "أنا بعمل كده عشان مصلحتك!"
• "أنا اتربيت كده وطلعت كويس."
• "لو ما سمعتش كلامي، عمرك ما هتنجح."
• "ما تبكِيش.. عيب!"
• "أنا بعرف أكتر منك، اسكت واسمع."
كل الجُمل دي نابعة من تفكير تلقائي متعلم، مش من وعي حقيقي باحتياجات الطفل النفسية.
💔 النتيجة؟
طفل بيشك في نفسه، بيتعود يقمع مشاعره، أو بيكبر شايل مشاعر غضب أو نقص أو خوف.
طب نعمل إيه؟ إزاي نكسر الحلقة دي؟
✅ 1. راقب كلامك وردود أفعالك:
سألْ نفسك: "هل أنا بتكلم بحب ولا بخوف؟ بسيطر ولا بحاور؟"
✅ 2. افصل بين مشاعرك ومشاعر ابنك:
ابنك مش انت. من حقه يغلط، يتعلم، يعبر، يرفض. حتى لو خالف توقعاتك.
✅ 3. تَعلّم واطّور:
في كتب، كورسات، أخصائيين... كلهم يساعدوك تفهم نفسيتك ونفسية أولادك.
✅ 4. اعتذر لما تغلط:
الاعتذار مش ضعف، بالعكس.. هو نموذج صحي لابنك عن التواضع وتحمل المسؤولية.
✅ 5. خليك حنون بس حازم:
في فرق كبير بين السيطرة والتربية. الحنان مش معناه تسيب، والحزم مش معناه قسوة.
🎯 حافظ على أولادك… بأنك تبدأ بنفسك.
الوعي هو أول خطوة في رحلة التربية السليمة.
"لما تعالج جواك، تربي طفل حر مش نسخة منك." 💚
07/07/2025
عارف/ة العلاج النفسي عامل إزاي؟
زي كورة خيط متعقدة...
بتدخل الرحلة وإنت مش فاهم فين البداية ولا النهاية،
بس مع كل جلسة، وكل إدراك، وكل خطوة بتاخدها
الخيط بيتفك... سنة سنة.
وفي يوم هتبص ورا وتلاقي إن كل العقد،
وكل اللخبطة،
اتحولت لبلوفر دافي... شكله حلو... ومفصل على مقاسك. 💛
ًا
07/07/2025
🧠💔 "ليه دايمًا برجعله؟!"
سؤال ناس كتير بتسأله بعد ما يخرجوا من علاقة مؤذية... أو وهم لسه فيها!
مش لازم يكون بيضربك أو بيهينك علني،
بس كل مرة تحس إنك خلاص هتبعد،
يرجع بكلمة حلوة، أو دمعة، أو وعد كدب...
وتصدق... وترجع.
🎭 دي مش قصة حب...
دي "لعبة نفسية" بيلعبها طرفين من غير ما يحسوا.
واحد بيفضل يجري ورا رضا التاني
وواحد يدي حتة أمل، وبعدين يسحبها تاني.
زي اللي بيقرب ويبعد، يطبطب ويكسر، يحبك بس يكسرك.
🔁 "لو اتحسّن، كل حاجة هتبقى حلوة"... صح؟
غلط.
كل مرة بتقول "هستنى شوية"،
أنت بتأذي نفسك أكتر منه.
بتقنع نفسك إنك السبب، أو إنك لازم "تصبر"، أو إنك هتغيره.
بس الحقيقة؟
أنت اللي بتتأذي الأول.
🧩 ليه بتتعلق بشخص بيأذيك؟
مش ضعف، ومش غباء.
ده اسمه تعلّق مرضي.
يعني:
• بتخاف تسيبه علشان ما تحسش بالوحدة
• بتصدق إنك مش هتلاقي أحسن منه
• بتحاول تثبت لنفسك إنك تستحق الحب
بس كل ده مش حب...
دي ثغرات جواك محتاجة شُغل وتعافي.
🚨 متخليش علاقتك تبقى مسرح لأدوار متكررة:
• الضحية
• المنقذ
• المتجاهَل
• المتحكم
لو فضلت تلعب الأدوار دي، عمرك ما هتشوف نفسك على حقيقتها... ولا الحب الحقيقي.
💡 طب أعمل إيه؟
علشان تتعافى من التعلّق المؤذي:
• ✋ اعترف إن في حاجة غلط… حتى لو بتحبه.
• 🧠 افهم إنت ليه بتتعلق؟ إيه اللي ناقصك بتحاول تلاقيه عنده؟
• 🚪 اخرج من اللعبة… متنتظرش "لحظة الانفجار"، قرر بإرادتك.
• 🫂 اطلب مساعدة (معالج نفسي / صديق واعي / كتب ودورات).
• 🪞 ارجع لنفسك… وابدأ تشوفها من غير الدور اللي كنت بتلعبه.
✨ خليك فاكر:
الحب مش وجع،
الحب مش لعبة شد وجذب،
الحب مش بيكسر… الحب بيبني.
لو حاسس إن الكلام ده لمسك، شاركه مع حد ممكن يكون محتاج يسمعه.
#تعافي ًا
06/07/2025
"ليه دايمًا برجعله رغم كل حاجة؟
عارف/ة إنه بيكسرني… بس مبقدرش أسيبه!
كل مرة بقول دي آخر مرة… وبرجع تاني.
ممكن تكون دي مش حب…
ممكن تكون تعلّق مؤذي بيستنزفك كل مرة من غير ما تحس.
في السلسلة دي هنتكلم عن:
❤️🩹 ليه بنتعلق؟
🎭 إيه الألعاب النفسية اللي بنلعبها وإحنا مش واخدين بالنا؟
🌱 وازاي تبدأ تتعافى، وتقول كفاية من غير وجع.
قول/ي لي في الكومنت:
حسيت/ي إن الكلام ده عنك؟ 👇
#تعافي ًا
05/07/2025
"أنا مش عارف أبدأ"... "كل ما أفكر أغير حاجة في حياتي، بخاف!"
كلمات بسمعها كتير في جلسات العلاج النفسي… ودا طبيعي جدًا.
الخوف بيكون أحيانًا هو العائق الأول في طريق التعافي، أو في اتخاذ قرار إننا نصلّح اللي اتكسر جوانا أو حوالينا.
ناس كتير متألمة… بس مش قادرة تتحرك من مكانها. مش لأنهم مش عارفين الطريق، لكن لأن الخوف مأخد مساحته في القرار.
الخوف من المجهول.
الخوف من الفشل.
الخوف من المواجهة.
الخوف من إننا نكتشف نفسنا الحقيقة.
لكن الحقيقة اللي بشوفها كل يوم، إن مجرد الاعتراف بالخوف هو أول خطوة في التحرر منه.
كلنا بنخاف… بس المهم مين اللي هياخد القرار في الآخر: "أنا" ولا "خوفي"؟
كمُعالجة نفسية، بشوف قد إيه التغيير ممكن يبدأ من لحظة صدق مع النفس، حتى لو بسيطة… حتى لو فيها تردد.
ابدأ من حيث أنت. بخوفك، بترددك، لكن ابدأ.
والتعافي مش قرار مرة واحدة… هو خطوات صغيرة متراكمة، كل خطوة فيهم فيها شجاعة، حتى لو الخوف مازال موجود.
#دبى #مصر #السعودية #الأمارات
03/07/2025
"المرحلة الأخيرة من الحزن ليست السعادة، بل القبول. حين تقبل ما حدث – لا لأنك موافق عليه، بل لأنك توقفت عن محاربته – تبدأ رحلتك الجديدة. القبول لا يعني النسيان، بل يعني أن الألم أصبح جزءًا منك، لا يسيطر عليك، بل يرافقك كظلٍ لصورة محبة عشتها، ولن تموت."
إليزابيث كوبلر
29/06/2025
🧠 الابتزاز العاطفي... لما الحب يتحوّل لسلاح!
هل حد بيحسسك بالذنب علشان توافق؟
بيقولك "لو بتحبني هتعمل كده"؟
بيهدد بالزعل أو البُعد لو اختلفت معاه؟
ده مش حب... ده ابتزاز عاطفي.
🚫 الحب مش ضغط نفسي
🚫 الحب مش استغلال مشاعرك
🚫 الحب مش خوف من رد الفعل
✅ احمي نفسك:
• اعرف حقوقك النفسية
• قول "لا" بدون تأنيب
• حط حدود تحافظ على سلامك
• خليك واعي… وخليك حر
✍️ هبة فهمي
26/06/2025
🎈 اضطراب التعلق التفاعلي عند الأطفال: لما الطفل بيبعد بدل ما يقرب 💔
هل لاحظتِ إن طفلك بيكون منعزل جدًا؟ مش بيطلب الحنان، وممكن يتجنب نظراتك أو حضنك؟ أو ممكن يكون بيظهر تعلق مبالغ فيه بأي شخص غريب؟
ده ممكن يكون مؤشر على اضطراب التعلق التفاعلي (RAD)، واللي بيظهر غالبًا في الأطفال اللي اتعرضوا لإهمال عاطفي أو تبديل رعاة (زي الأطفال في دور الأيتام أو اللي مرّوا بتجارب انفصال متكرر عن الأم).
📌 السمات اللي ممكن نلاحظها:
قلة أو انعدام الاستجابة العاطفية.
صعوبة في تكوين علاقات ثقة.
تصرفات غير مناسبة اجتماعيًا.
انعدام الخوف من الغرباء أو تعلق مفرط بيهم.
سلوك عدواني أو انسحابي.
👩👧 طب ونتعامل إزاي؟
1. 🫂 الاحتواء أولًا: الطفل ده محتاج أمان عاطفي، مش عقاب. لازم نحاول نكون مصدر ثابت وآمن ليه.
4. ⏳ الصبر.. الكتير منه: الطفل مش بيصدك.. هو خايف، محتاج وقت وثقة عشان يفتحلك قلبه.
🌱 تذكري: الطفل اللي مابيطلبش الحنان، مش معناه إنه مش محتاجه.. ساعات هو بس مش عارف يطلبه ❤️
24/06/2025
الابتزاز العاطفي: التلاعب المقنّع تحت ستار المحبة
الابتزاز العاطفي هو أحد أشكال التلاعب النفسي، يُمارس فيه شخص ما ضغطًا نفسيًا على الآخر لانتزاع سلوك أو قرار معين، عبر إثارة مشاعر الذنب أو الخوف أو الالتزام العاطفي الزائف.
🧠 الأشخاص اللي بيستخدموا الابتزاز العاطفي عادةً ما يلجأوا إلى أساليب غير مباشرة، مثل:
• التهديد بالانسحاب أو الهجر: "لو مش هتعمل كده، مش هكمل معاك!"
• استدعاء التضحية السابقة: "فاكر كل اللي عملته علشانك؟"
• اللعب على وتر الحب أو القرب: "لو بتحبني، هتسمع كلامي!"
• إثارة الشفقة: "أنا أكتر حد مجروح ومكسور، ومش لاقي حد يحنّ عليّ!"
⚠️ علامات إنك داخل علاقة فيها ابتزاز عاطفي:
• بتشعر بالذنب لما تقول "لا"
• بتضطر دايمًا تبرر اختياراتك
• بتاخد قراراتك بدافع الخوف من رد الفعل
• بتحس إن العلاقة بقت عبء نفسي بدل ما تكون مساحة أمان
🛡️ كيف تتعامل مع الابتزاز العاطفي؟
• الوعي أول خطوة للعلاج: الاعتراف بوجود نمط ابتزازي هو بداية التغيير.
• حدود واضحة وثابتة: لا تسمح أن مشاعرك تُستخدم كأداة ضغط.
• فصل المشاعر عن السلوك: افهم إنك تقدر تحب الشخص، لكن ترفض أسلوبه.
• تعلم قول "لا" بدون تبرير: الرفض لا يعني الأنانية.
• دعم نفسي أو علاجي: المعالج النفسي ممكن يساعدك تكتشف ديناميكيات العلاقة وتستعيد توازنك الداخلي.
🌱 العلاقات الصحية تُبنى على التعاطف المتبادل، مش على التلاعب العاطفي.
هل مررت يومًا بعلاقة شعرت فيها أن قراراتك لا تعبّر عنك بل عن خوفك من الآخر؟
شاركنا تجربتك أو رأيك 👇
22/06/2025
لو في حياتك ناس قريبة منك جداااا وبتحبهم جدا وخايف على زعلهم ،،، ومع كده بتحس في نفس الوقت انك معاهم منهك ،، وان في حاجة غلط في علاقتك بيهم
ومش فاهم ازاي بقيت حاسس انك بقيت مجبر تكمل في حاجة انت مش عايزها رغم حبك ليهم ،، ومتضطر تيجي على نفسك عشان الطرف التاني وان العلاقة تستمر ،، ومن غير ما تبقى فاهم ليه .. وايه اللى بيحصل !
لو ده في حياتك .. يبقى .. محتاجين تتابعو معايا .. عشان هكلمكم عن .. ونفهم سوا يعني ايه ابتزاز عاطفي .. وازاي تكشفوه .. وازاي تحافظ على مساحة حريتك الشخصية والنفسية ،، ويبقى عندك القدرة انك تكشف وتشوف الناس اللي بتمارس معاك الابتزاز العاطفي حتى لو الطرف التاني مش واعي بده !
Be the first to know and let us send you an email when Heba Fahmy posts news and promotions. Your email address will not be used for any other purpose, and you can unsubscribe at any time.
