25/12/2025
Moyo Chirandu Gono RemombeImwe hondo yatiinayo iri pakutadza kupatsanura musiyano uri pakati pe ChiVanhu ne Chitendero/Religion. Azvuva sanzu azvuva nemashizha aro. ChiVanhu chiri Muropa, mu Mhuri uye mu Nzvimbo nemu Mhepo. Religion Chitendero chiri mumusoro.
Chitendero unosarudza wega. Nhasi ukada kuita mu Kristu, unoita. Ugosarudza kuita mu Catholic, Pentecostal, Presbyterian, Protestant, Anglican, Lutheran, Baptist, Quacker, Methodist, Apostolic, SDA zvose zvawada. Kwapera svondo ukada kuita mu Rasta, unoita. Kwapera Mwedzi kana makore, ukada kuita mu Muslim, unoita unotendeuka pawadira.
Saka chichinzi Chitendero uye chine mabatirwo acho. Asi ChiVanhu unobarwa uri Mhofu, Soko, Nhire, Mbizi zvichidaro. Ugorarama uri Mhofu, Soko, Nhire kana Mbizi. Ugosvika pakufa kana kuzodzoka se Mudzimu kana Muchembere uri Mhofu, Soko, Nhire kana Mbizi. Zviri muropa. ChiVanhu hachisi chemusoro wako.
Hakuna Munhu anotaura ne Midzimu neMachembere ake paChikuva cheimwe Mhuri, Musha, Dzinza kana Rudzi. Hakuna Mudzimu unobata tsvimbo mumusha musiri mawo. Hakuna Mhondoro inopfeka Ngundu yobata Matare ayo muNyika musiri mayo. Kana ndiri Soko, handi tendeutswe mangwana ndofuma ndava Shumba.
Ndototanga kubata ChiVanhu mabatirwo anoitwa nevayera Shumba. Murongo, Mhiko, Zviga ne Midziyo ne ZviShongo zvevayera Shumba ndava kuto tevedzera. Mudzimu usiri wako haurairwe panze unouraisa.
Mudzimu weshiri uri Mudendere.
Chati Homu chareva !
