Chest clinic

22/09/2023

ഡോ. Shameer Vk (കോഴിക്കോട് മെഡിക്കൽ കോളജിലെ മെഡിസിൻ വിഭാഗം അസി. പ്രൊഫസർ ) എഴുതുന്നു

നിപ്പ ബാധിച്ച് മരണത്തെ മുഖാമുഖം കണ്ട് ഐ സി യു വിൽ കിടക്കുന്നു. തിങ്ങി നിറഞ്ഞിരിക്കുന്ന ഐ സി യു വിൽ എല്ലാവർക്കും നിപ്പ. ആവശ്യത്തിന് സ്റ്റാഫില്ല. ഉള്ള ആരോഗ്യപ്രവർത്തകർ ചികിത്സ എത്തിക്കാൻ വേണ്ടി പരക്കം പായുന്നു. സ്വന്തം ക്ഷീണം വക വെക്കാതെ എൻഡോട്രക്കിയൽ ട്യൂബുകളും എടുത്ത് കട്ടിലിൽ നിന്ന് എണീക്കുന്നു. ഓരോരുത്തർക്കായി ട്യൂബുകളിട്ട് വെന്റിലേറ്ററിൽ കണക്ട് ചെയ്തു കൊണ്ടിരിക്കുന്നു. അവസാനത്തെ രോഗിക്കും ട്യൂബിട്ട ശേഷം അവിടെ കുഴഞ്ഞു വീഴുന്നു.

ഞങ്ങളുടെ ഒരു പി ജി വിദ്യാർഥി കഴിഞ്ഞ ദിവസം കണ്ട സ്വപ്നമാണ്. ഉറക്കത്തിൽ മാത്രമല്ല ഉണർന്നിരിക്കുമ്പോഴും ഇത്തരം രംഗങ്ങൾ ഭാവനയിൽ കാണുന്നവർ ജൂനിയർ ഡോക്ടർമാരിലും നഴ്‌സുമാരിലും ഐസൊലേഷനിലെ മറ്റു സ്റ്റാഫിലും അത്ര കുറവല്ല. ഇവരുടെ ഭയം കണ്ടൈൻമെന്റ് സോണുകൾ പ്രഖ്യാപിച്ചത് കൊണ്ടോ സ്‌കൂളിന് അവധി കൊടുത്തതോ കൊണ്ട് ഉണ്ടായതല്ല. ഈ രോഗത്തെ കുറിച്ചു വായിച്ചു കിട്ടിയ അറിവിൽ നിന്നാണ്. ഈ വഴിയിലൂടെ മുൻപേ നടന്നവർ പറഞ്ഞു കേട്ട അനുഭവങ്ങളിൽ നിന്നാണ്.

നിപ്പയെ നേരിടാൻ കണ്ടയിൻമെന്റ് വേണോ സ്കൂൾ അടക്കണോ, ആളുകളെ ഇങ്ങനെ ഭയപ്പെടുത്തണോ?

വേണ്ടെന്ന അഭിപ്രായക്കാർ ആണ് കൂടുതലും എന്നു തോന്നുന്നു.

വേണ്ട. കാരണം നിപ്പ കോവിഡിനെ പോലെ പടർന്നു പന്തലിച്ചു പോവില്ല. ലക്ഷണം ഇല്ലാത്തവർ പകർത്തില്ല. വളരെ അടുത്ത് സമ്പർക്കത്തിൽ വരുന്നവർക്കേ പകരൂ. ഈ കാരണങ്ങൾ കൊണ്ടൊക്കെ നിപ്പ കോവിഡിനെക്കാൾ പിടിച്ചു കെട്ടാൻ എളുപ്പമാണ്.

എന്നാൽ ഒരു കണ്ടീഷൻ.

പനിയും ചുമയും തൊണ്ടവേദനയും വന്നാൽ ആൾക്കൂട്ടത്തിൽ പോകില്ലെന്ന് ഉറപ്പ് കൊടുക്കാൻ നമുക്ക് കഴിയുമോ?

ആശുപത്രിയിൽ കിടക്കുന്ന ബന്ധുക്കളെ ഒരു പൊതി ഓറഞ്ചുമായി കാണാൻ പോയില്ലെങ്കിൽ അവർ എന്തു വിചാരിക്കും, ഭാവിയിൽ എനിക്കൊരു അസുഖം വന്നാൽ അവരും വരേണ്ടതല്ലേ എന്ന ഉദാത്ത മനോഭാവം നമ്മൾ ഉപേക്ഷിക്കുമോ?

ഈ ഒരു സാഹചര്യത്തിൽ എങ്കിലും ഒരു രോഗിയെ പരിചരിക്കുമ്പോൾ മാസ്ക് ധരിക്കുമോ, ഓരോ തവണയും കൈ സോപ്പിട്ടു കഴുകുമോ? അവരുടെ വസ്ത്രങ്ങൾ പ്രത്യേകം സോപ്പിലിട്ട് വൃത്തിയാക്കുമോ?

തിയറി കേൾക്കുമ്പോൾ നല്ല സുഖമുണ്ട്. എളുപ്പത്തിൽ ചെയ്യാവുന്നവ തന്നെ. ഇനി ഓരോരുത്തരും അവരവരുടെ ജീവിതത്തിൽ ഇത് പ്രാവർത്തികമാക്കുന്നത് ഒന്ന് സങ്കൽപ്പിക്കുക. കഴിഞ്ഞ ആറു മാസത്തിൽ നമ്മൾ എങ്ങനെ പെരുമാറി എന്ന് വെറുതെ ഒന്ന് ഓർത്തെടുക്കുക.

നമുക്ക് പനിയും ചുമയും വന്നപ്പോൾ അത് വിയർപ്പ് തലയിൽ കുടിച്ചത്, വെള്ളം മാറി കുളിച്ചത് അല്ലെങ്കിൽ മഴ നനഞ്ഞത്. അയൽവാസിക്ക് വന്ന പനി മിക്കവാറും കോവിഡോ വേറെ എന്തോ വൈറസോ. പനി വന്ന്, മേലു വേദന വന്ന് കിടക്കയിൽ നിന്ന് എഴുന്നേൽക്കാൻ പോലും പറ്റാതായാൽ കിടക്കും. അല്ലെങ്കിൽ ഒരു പാരസെറ്റമോൾ അല്ലെങ്കിൽ ഒരു ചുക്ക് കാപ്പി അടിച്ച് മെല്ലെ പുറത്തിറങ്ങും. അമ്മാവന്റെ മോളുടെ കല്യാണം അല്ലേ, നമ്മൾ ഇല്ലാതെ എങ്ങനാ!

കുട്ടിക്കൊരു പനി വന്നാൽ, പത്താം ക്ലാസ്സിൽ അല്ലേ ഒരു ദിവസത്തെ ക്ലാസ്സ്‌ കളയണോ, അല്ലെങ്കിൽ കുട്ടിയെ വീട്ടിൽ നിർത്തിയാൽ നോക്കാൻ ആര്? അച്ഛനോ അമ്മക്കോ ലീവ് എടുക്കണ്ടേ?

ഓരോ കല്ലിലും തൂണിലും 2018 ലെ നിപ്പയുടെ ഓർമ്മകൾ തളം കെട്ടിക്കിടക്കുന്ന കോഴിക്കോട് മെഡിക്കൽ കോളേജ് കാഷ്വാലിറ്റി ഒന്നോർക്കുക. രണ്ടാഴ്ച മുൻപ് എന്തായിരുന്നു?
ഓരോ രോഗിയുടെയും കൂടെ നിൽക്കുന്ന നാലാമത്തെ കൂട്ടിരിപ്പുകാരനെ പുറത്തിറക്കാൻ പെടാപ്പാട് പെടുന്ന സെക്യൂരിറ്റി. അയാളോട് കയർത്തും അയാളെ സമർത്ഥമായി കബളിപ്പിച്ചും ഉള്ളിൽ തന്നെ സ്ഥാനം പിടിച്ച് ആത്മ നിർവൃതി അടയുന്ന എത്ര പേർ!! ഒന്നര വയസ്സായ കുഞ്ഞു തൊട്ട് 75 വയസ്സായ അമ്മൂമ്മ വരെ ബൈസ്റ്റാൻഡർമാർ.
അതേ സമയം തന്റെ ഇമ്മ്യൂണിറ്റിയെ കുറിച്ച് അമിതമായ ആത്മവിശ്വാസത്തിൽ മാസ്കിനു മുകളിലൂടെ മൂക്ക് പുറത്തിട്ടു കാഷ്വാലിറ്റിയിലെ ശുദ്ധ വായു അകത്തേക്ക് വലിച്ചു കയറ്റുന്ന ആരോഗ്യ പ്രവർത്തകർ, മെഡിക്കൽ വിദ്യാർത്ഥികൾ.

നിപ്പ സ്ഥിരീകരിക്കുന്നതിന് മുൻപ് ആ രോഗി കിടന്ന അത്യാഹിത വിഭാഗത്തിൽ അടുത്ത കട്ടിലിൽ രോഗി ആയി കിടന്നു പോയത് ഒരു തെറ്റല്ല. ആ രോഗി പോയിരുന്ന ചായക്കടയിലോ സൂപ്പർ മാർക്കറ്റിലോ യാദൃശ്ചികമായി ഉണ്ടായതും തെറ്റല്ല. പക്ഷെ രോഗം സ്ഥിരീകരിച്ച ശേഷം ഈ പറഞ്ഞ എന്തെങ്കിലും രീതിയിൽ സമ്പർക്കം ഉണ്ടാവാൻ സാധ്യതയുള്ള ഒരാൾക്ക് പനി വന്നാൽ സ്വയം ഐസൊലേഷനിൽ പോയി കണ്ട്രോൾ റൂമിലേക്കോ അടുത്ത ആരോഗ്യ സംവിധാനങ്ങളിലേക്കോ എത്ര പേര് വിളിച്ചു പറയും?

പലർക്കും നിപ്പ ഏതോ ഒരു നാട്ടിൽ ഏതോ ഒരു മൂലയിൽ കുറച്ചു പേരെ മാത്രം ബാധിക്കുന്ന ഒരു വൈറസ് ആയിരിക്കും. ഇതു വരെയുള്ള കണക്ക് വെറുതെ ഒന്ന് എടുത്തു നോക്കണം. മലേഷ്യയിൽ 265 ഇൽ 105, ബംഗ്ലാദേശിൽ 114 ഇൽ 78, സിലിഗുരി (ഇന്ത്യ) യിൽ 66 ഇൽ 45, നാഡിയ (ഇന്ത്യ) യിൽ 5 ഇൽ 5....ഇത് മരിച്ചവരുടെ എണ്ണമാണ്. കേരളത്തിലെ കണക്കിലേക്ക് കടക്കുന്നില്ല. എണ്ണം മാത്രമല്ല ഇവിടെ പ്രധാനം. മരിച്ചതിൽ ഏറ്റവും കൂടുതൽ ഒരു കുടുംബത്തിലെ അംഗങ്ങൾ അല്ലെങ്കിൽ ആരോഗ്യ പ്രവർത്തകരാണ് എന്നതാണ്. ഒരു കുടുംബത്തിലെ രണ്ടു ചെറുപ്പക്കാർ കുറച്ചു ദിവസത്തിനുള്ളിൽ മരിക്കുന്നത് ഉണ്ടാക്കുന്ന ആഘാതം ചിന്തിച്ചു നോക്കണം. അവിടെ ബാക്കിയാവുന്നവർ ഇനിയും ജീവിച്ചു തീർക്കണമല്ലോ.

അതേ പോലെ തന്നെ ആരോഗ്യപ്രവർത്തകരുടെ മരണം. 2018 ഇൽ ലിനി സിസ്റ്ററുടെ മരണം ഉണ്ടാക്കിയ വിറങ്ങലിപ്പ് ഇന്നും വിട്ടു പോയിട്ടില്ല. കൂട്ടത്തിൽ ഒരാൾ പോയ ശേഷം തുടർന്നും രോഗികളെ ശുശ്രൂഷിക്കുമ്പോൾ ഉള്ള മാനസികാവസ്ഥ, ധൈര്യം!

നിപ്പ ഒരു പക്ഷേ വീര്യം കുറഞ്ഞിട്ടുണ്ടാകാം. ജനിതക വ്യതിയാനം സംഭവിച്ചേക്കാം. ഒന്നിനും നമുക്ക് തെളിവുകൾ ഇല്ല. പ്രവാചനാതീതമായ സ്വഭാവക്കാരൻ ആണ്. ബംഗ്ലാദേശ് നിപ്പയും മലേഷ്യ നിപ്പയും രണ്ടായിരുന്നു. കോഴിക്കോട് നിപ്പയും എറണാകുളം നിപ്പയും രണ്ടായിരുന്നു. പകരാനുള്ള സാധ്യത, സംഹാരശേഷി എല്ലാം മാറി മറഞ്ഞു കൊണ്ടിരിക്കുന്നു. ഇനി ഒരു പക്ഷേ ഒട്ടും വന്നില്ലെന്നു വരാം. വവ്വാലുകളിൽ വൈറസ് ഉള്ളടത്തോളം കാലം എല്ലാ വർഷവും വന്നെന്നും വരാം. തത്കാലം ബഹുമാനിക്കുകയല്ലാതെ തരമില്ല. ഏറ്റവും മോശം അവസ്ഥ വരെ പ്രതീക്ഷിക്കുകയും വേണ്ടി വരും.

നിയന്ത്രണങ്ങളോ അവധിയോ ഒന്നും വേണ്ടി വരില്ല, പൗരന്മാർ തങ്ങളുടെ കടമ കൃത്യമായി ചെയ്യുമെങ്കിൽ. കരുതൽ എപ്പോഴും വേണ്ടിയും വരും.

14/12/2020

24/09/2020

World Lung Day

28/07/2020

07/11/2019

ഇത് ഒരു കഥയല്ല, നടന്ന സംഭവമാണ്. ഇതിലെ കുറ്റക്കാർ ആരൊക്കെയാണ് എന്ന് ഇത് വായിക്കുന്ന നിങ്ങൾ പറയണം.

കുറച്ചു മാസങ്ങൾക്ക്‌ മുൻപാണ് 58 വയസ്സുള്ള ആ സ്ത്രീ എന്നെ കാണാൻ വന്നത് (നമുക്കവരെ തല്ക്കാലം മീനാക്ഷി അമ്മ എന്ന് വിളിക്കാം ). അവരുടെ മകൻ പട്ടാളത്തിലാണ്.

മീനാക്ഷി അമ്മക്ക് പ്രമേഹമുണ്ട്, നല്ല കടുത്ത പ്രമേഹം. രക്തത്തിലെ പഞ്ചസാരയുടെ അളവ് ഒട്ടും കണ്ട്രോൾ അല്ല. മീനാക്ഷി അമ്മ മരുന്ന് ഡോക്ടറുടെ നിർദേശം അനുസരിച്ച് കറക്റ്റായി കഴിക്കുന്നുണ്ട് , കുഴപ്പമില്ലാതെ ആഹാരക്രമം നോക്കുന്നുണ്ട്, അത്യാവശ്യം നടക്കുന്നുമുണ്ട്. പക്ഷേ FBS അഥവാ ഫാസ്റ്റിംഗ് ബ്ലഡ്‌ ഷുഗർ 396. PPBS അഥവാ ആഹാരത്തിന് ശേഷമുള്ള ബ്ലഡ്‌ ഷുഗർ 492. എപ്പോഴും ഏറെക്കുറെ ഇത് പോലെ തന്നെയാണ് അവരുടെ റിസൾട്ട്‌. അങ്ങനെയാണ് എന്നെ വന്ന് കാണുന്നത്.

അവരുടെ മകൻ പട്ടാളത്തിൽ ആയത് കൊണ്ട് അവിടെ നിന്നുമാണ് ചികിത്സ. ഇപ്പോൾ കഴിക്കുന്ന മരുന്നുകൾ ഏതൊക്കെ എന്ന് ഞാൻ ചോദിച്ചപ്പോൾ ആ അമ്മ അതൊക്കെ എടുത്തു പുറത്തു വെച്ചു. സത്യമായും കണ്ണ് തള്ളി പോയി.

മീനാക്ഷി അമ്മ കഴിക്കുന്ന മരുന്നുകൾ..

1) ഗ്ലിമീപ്രൈഡ്‌ (glimepride) 2 mg ടാബ്ലറ്റ്, രാവിലെ 4 എണ്ണം, വൈകിട്ട് 4 എണ്ണം !!!
അവിടെ 2 mg ഗുളികയെ ഉള്ളൂവത്രെ.

അതായത് രാവിലെ 8 mg, രാത്രി 8 mg. മൊത്തം ഒരു ദിവസം 16 mg.

2) മെറ്റ്ഫോർമിൻ (metformin) 500 mg ടാബ്ലറ്റ്, രാവിലെ 2 എണ്ണം, ഉച്ചക്ക് 2 എണ്ണം, രാത്രി 2 എണ്ണം. അവിടെ 500 mg ഗുളികയെ ഉള്ളൂവത്രെ.

അതായത് 1000 mg വെച്ച് മൂന്ന് നേരം, മൊത്തം ഒരു ദിവസം 3000 mg.

3) വോഗ്‌ളിബോസ് 0.3 mg ടാബ്ലറ്റ്, രാവിലെ 1 എണ്ണം, ഉച്ചക്ക് 1 എണ്ണം, രാത്രി 1 എണ്ണം.

അപ്പോൾ ഒരു ദിവസം ആ അമ്മ കഴിക്കുന്ന മൊത്തം ഗുളികകളുടെ എണ്ണം
-- ഗ്ലിമീപ്രൈഡ് : 8
-- മെറ്റ്ഫോർമിൻ : 6
-- വോഗ്‌ളിബോസ്: 3

മൊത്തം 17 എണ്ണം!!!

എന്നിട്ടാണ് 396 ഉം 492 ഉം ഷുഗർ റിസൾട്ട്‌.

ആ അമ്മ കഴിക്കുന്ന മരുന്നുകൾ റബ്ബർ ബാൻഡ് ഇട്ട് കെട്ട് കണക്കിനാണ് കൊണ്ട് വന്നിരിക്കുന്നത്.

ഞാൻ ആ മരുന്നുകൾ എടുത്തു നോക്കി. ഗവണ്മെന്റ് സപ്ലൈ ആണ്. ബ്രാൻഡ് പേരില്ല. യഥാർത്ഥ മരുന്നിന്റെ പേര് തന്നെയാണ് എഴുതിയിരിക്കുന്നത്.

ഞാൻ ആ അമ്മയോട് തല്ക്കാലം ഇതൊക്കെ നിർത്തിയിട്ട് ഒരു പ്രമുഖ കമ്പനിയുടെ ഗ്ലിമീപ്രൈഡ്‌ 2 mg, മെറ്റ്ഫോർമിൻ 500 mg, വോഗ്‌ളിബോസ് 0.2 mg മൂന്നും ചേർന്ന ബ്രാൻഡ് മെഡിസിൻ രാവിലെ 1 രാത്രി 1 വെച്ച് കഴിക്കാൻ പറഞ്ഞു.

മീനാക്ഷി അമ്മ ആകെ കൺഫ്യൂസ്ഡ് ആയി. ഒരു ദിവസം 17 ഗുളിക കഴിക്കുമ്പോൾ 396 ഉം 492 ഉം ആണ് ഷുഗർ. അപ്പോഴാണ് ഞാൻ വെറും 2 ഗുളിക കഴിക്കാൻ പറയുന്നത്, അതും കഴിക്കുന്ന മരുന്നിന്റെ അതേ ചേരുവ.

എന്തായാലും മനസ്സില്ലാ മനസ്സോടെ ആണെങ്കിലും മീനാക്ഷി അമ്മ ഞാൻ പറഞ്ഞത് പോലെ ആ മരുന്നുകൾ നിർത്തി, പുറത്തു നിന്നും ഞാൻ എഴുതി കൊടുത്ത അതേ മരുന്ന് വാങ്ങി കഴിച്ചു.

പത്ത് ദിവസം കഴിഞ്ഞു മീനാക്ഷി അമ്മ റിവ്യൂവിന് വന്നു. FBS അഥവാ ഫാസ്റ്റിംഗ് ബ്ലഡ്‌ ഷുഗർ 98. PPBS അഥവാ ആഹാരത്തിന് ശേഷമുള്ള ബ്ലഡ്‌ ഷുഗർ 164!!!

അന്ന് ആ അമ്മ എന്നോട് ചോദിച്ച ഒരു ചോദ്യമുണ്ട്, അത് കാരണമാണ് ഈ പോസ്റ്റ്‌. 'എന്റെ പൊന്ന് ഡോക്ടറെ, ഇത്രയും കാലം ഞാൻ ഇതൊക്കെ വലിച്ചു കയറ്റി, എന്നിട്ടും.... ഇതൊക്കെ യഥാർത്ഥത്തിൽ മരുന്നാണോ അതോ ചോക്ക് പൊടിച്ചു വെച്ചതാണോ? '

ഇവിടെ ആരൊക്കെയാണ് കുറ്റക്കാർ?

1) യാതൊരു മനസാക്ഷിയുമില്ലാതെ ലാഭം മാത്രം കണ്ണ് വെച്ച് മരുന്നിനു പകരം ചോക്ക് പൊടി പോലുള്ള കാര്യങ്ങൾ വെച്ച് മരുന്നുണ്ടാക്കുന്നവർ.

2) വാങ്ങുന്ന മരുന്നുകൾ സമയത്തു ക്വാളിറ്റി ടെസ്റ്റിംഗിന് വിധേയമാകാത്ത ക്വാളിറ്റി ടെസ്റ്റിംഗ് അതോറിറ്റി.

3) വില മാത്രം മാനദണ്ഡമാക്കി, മരുന്നിന്റെ ക്വാളിറ്റിക്ക്‌ യാതൊരു മുൻഗണനയും കൊടുക്കാതെ വാങ്ങുന്ന ഗവണ്മെന്റ് നയം.

4) ഒരു മരുന്നിന്റെ അടിസ്ഥാന വിലയിലും വളരെ താഴ്ത്തി ടെൻഡറിനു നൽകുമ്പോൾ പോലും ഒരു സംശയവും തോന്നാത്ത അധികാരികൾ.

5) ഇതൊക്കെ അറിഞ്ഞിട്ടും നിസ്സഹായതയോടെ അത് കൊടുക്കേണ്ടി വരുന്ന ഡോക്ടർമാർ ഉൾപ്പെടെയുള്ള ജീവനക്കാർ.

6) ഇതൊന്നും അറിയാതെ കൊട്ട കണക്കിന് മരുന്ന് റബ്ബർ ബാൻഡ് ഇട്ട് വെച്ച് കപ്പലണ്ടി തിന്നും പോലെ വാരി തിന്നുന്ന രോഗി.

* ക്വാളിറ്റി ടെസ്റ്റ്‌ പേരിന് നടക്കുന്നുണ്ടത്രേ. പക്ഷേ ഒരു മരുന്നിന്റെ ക്വാളിറ്റി ടെസ്റ്റ്‌ റിസൾട്ട്‌ വരുമ്പോഴേക്കും മിക്കവാറും ആ ബാച്ച് മരുന്ന് കൊടുത്തു തീർത്തിട്ടുണ്ടാകും.

* ഇനി വല്ലപ്പോഴും ക്വാളിറ്റി ടെസ്റ്റ്‌ പാസ്സാകാത്ത ഏതെങ്കിലും കമ്പനിയെ നിരോധിച്ചു എന്നിരിക്കട്ടെ, അവർ അടുത്ത വർഷം വേറൊരു പേരിൽ പുതിയ ടെൻഡർ കൊടുക്കും.

* ഒരു സാധനത്തിന്റെ അടിസ്ഥാന വിലയിൽ നിന്നും വളരെ താഴ്ത്തി അത് നൽകണമെങ്കിൽ ഒന്നുകിൽ കൊടുക്കുന്നയാൾ ചാരിറ്റി മനസ്സുള്ള ആൾ, അല്ലെങ്കിൽ പച്ചക്ക് ലാഭം മാത്രം ലക്ഷ്യം വെച്ച് വെട്ടിപ്പ് നടത്തുന്ന ആൾ. ഇതറിയാൻ പത്താം ക്ലാസ്സ്‌ പോലും പാസ്സാകണമെന്നില്ല.

( ചൈനയിലെ ബെയ്‌ജിങിൽ ഞാൻ പോയിട്ടുണ്ട്. അവിടെ എന്തിന്റെയും കോപ്പി കിട്ടും. മൊബൈൽ ഫോൺ, വാച്ച്, ഷൂസ്, അങ്ങനെ എന്തും കോപ്പി കിട്ടും. 8000 രൂപ വിലയുള്ള ഡീസലിന്റെ ഷൂസ് ഞാൻ വാങ്ങിയത് വെറും 300 രൂപയ്ക്കാണ്. എന്നിട്ടും അത് ഒറിജിനൽ ആണെന്ന് ഞാൻ കരുതുന്നു എങ്കിൽ എന്റെ തലയിലെ ഏതെങ്കിലും നട്ട് ലൂസ് ആയിരിക്കണം. )

* നിങ്ങൾ എന്താ ടെൻഡർ കൊടുക്കാത്തത് എന്ന് പേര് കേട്ട ഒരു ഇന്ത്യൻ എംഎൻസി കമ്പനിയുടെ വൈസ് പ്രസിഡന്റിനോട് എന്നെ കാണാൻ വന്നപ്പോൾ ഞാൻ ചോദിക്കുകയുണ്ടായി. അപ്പോൾ അദ്ദേഹം പറഞ്ഞത് ഇങ്ങനെയാണ്- ഡോക്ടറെ, നമുക്ക് ക്വാളിറ്റി നില നിർത്തി, വളരെ തുച്ഛമായ ലാഭം എടുത്തു കൊടുക്കാൻ പറ്റുന്ന വിലയിൽ നിന്നും ഏകദേശം പത്തിരട്ടി കുറച്ചാണ് അതൊക്കെ കൊടുക്കുന്നത്. ഉദാഹരണത്തിന് ചില ടൈപ്പ് ഹെപ്പറ്റൈറ്റിസിനു കൊടുക്കുന്ന അർസോ ഡിയോക്‌സി കോളിക് ആസിഡ് എന്ന ഗുളികയുടെ എംആർപി 24 രൂപ. അത് അവർക്ക് കൊടുക്കാൻ പറ്റുന്ന ഏറ്റവും കുറഞ്ഞ വില 7.20 രൂപയാണ്, അതായത് 70 ശതമാനം വിലകുറവ്. പക്ഷേ ആ ടെൻഡർ പോയത് 1.20 രൂപയ്ക്കാണ്, അപ്പോൾ അതിൽ എത്ര മാത്രം മരുന്നുണ്ടാകുമെന്ന് ഊഹിക്കാമല്ലോ.

* പേരെടുത്ത കമ്പനികൾക്ക് ഒരിക്കലും അവരുടെ പേര് മോശമാകുന്ന രീതിയിൽ ക്വാളിറ്റി കുറക്കാൻ കഴിയില്ല. ഉദാഹരണത്തിന് കൊക്കകോള അല്ലെങ്കിൽ പെപ്സി. ഇത് ഇന്ത്യയിലോ അമേരിക്കയിലോ യൂറോപ്പിലോ ആഫ്രിക്കയിലോ എവിടെ വിറ്റാലും ക്വാളിറ്റി നോക്കണം. ഇന്ത്യയിൽ കൊടുത്ത കോള അല്ലെങ്കിൽ പെപ്സി എന്തെങ്കിലും പ്രശ്നം വന്നാൽ അവർക്ക് അത് ലോകം മൊത്തമുള്ള ബിസിനെസ്സ് ബാധിക്കും. ഓർക്കുക ഇന്ത്യയിൽ 10 രൂപക്ക് കിട്ടുന്നത് മിക്കവാറും അമേരിക്കയിൽ 10 ഡോളർ (700 ഇന്ത്യൻ രൂപ ) ആയിരിക്കും വില, അതായത് ഇന്ത്യയിൽ അല്പം ലാഭം നോക്കി ക്വാളിറ്റി നില നിർത്തിയില്ലെങ്കിൽ നല്ല മുട്ടൻ പണി ആയിരിക്കും അവർക്ക് ലോക മാർക്കറ്റിൽ കിട്ടുന്നത്.

* ഇതും കൂടി പറഞ്ഞാലേ പൂർണമാകൂ...

ജനങ്ങൾ എന്ത് പരിഹാസ്യരാണ്. മിക്ക വ്യക്തികളും ആഗ്രഹിക്കുന്നത്

- ബെൻസ് / ബിഎംഡബ്ല്യു / ഔഡി അവരുടെ കാറായി

- റാഡോ / റോളക്സ് / ടാഗ് ഹ്യൂവർ അവരുടെ വാച്ചായി

- അലൻ സോളി / പീറ്റർ ഇംഗ്ലണ്ട് / ലൂയി ഫിലിപ്പ് അവരുടെ ഡ്രെസ്സായി

- റെയ്ബാൻ / കാർട്ടിയർ / പൊലീസ് അവരുടെ സൺഗ്ലാസായി

- പെപ്സി / കോള അവരുടെ പാനീയമായി

- കെ‌എഫ്‌സി / ഡൊമിനോസ് / ചിക്കിംഗ് ഡൈനിംഗ് ഔട്ടിന്

- എന്തിന് അടിവസ്ത്രങ്ങളായി ജോക്കി / ക്രോക്കോഡൈൽ പോലുള്ളവ

എന്നാൽ മരുന്നുകളുടെ കാര്യം വരുമ്പോൾ അവർക്ക് ഏറ്റവും വിലകുറഞ്ഞ മരുന്നാണ് ആവശ്യം. അതിന്റെ ക്വാളിറ്റിയെ ക്കുറിച്ച് ചിന്തിക്കുന്നു പോലുമില്ല.

ഈ ക്വാളിറ്റി കുറഞ്ഞ മരുന്ന് കൊടുത്തു അസുഖം മാറിയില്ലെങ്കിൽ രോഗിയുടെ കണ്ണിൽ കുറ്റക്കാരൻ ഡോക്ടർ മാത്രം. ക്വാളിറ്റി ഇല്ലാതെ മരുന്ന് ഉണ്ടാക്കിയ കമ്പനിക്കാരോ, ക്വാളിറ്റി ടെസ്റ്റ്‌ ചെയ്യാത്ത ഏജൻസിയോ, ഇത് വിൽക്കാൻ അനുമതി കൊടുത്ത ഗവണ്മെന്റോ, കൊടുക്കുന്ന ഫാർമസിസ്റ്റിനോ പഴിയില്ല. പഴി അത് ഡോക്ടർക്ക്‌ മാത്രം.

NB : മരുന്ന് മാഫിയയുടെ ആൾ എന്ന സ്ഥിരം പല്ലവി ഇവിടെ കൊണ്ട് തട്ടരുത്. നിങ്ങൾ ഏതു മരുന്ന് വേണമെങ്കിലും വാങ്ങി കഴിച്ചോളൂ. പക്ഷേ അസുഖം മാറിയില്ലെങ്കിൽ ദയവു ചെയ്തു കുറ്റം പറയാതിരിക്കുക എന്നുള്ള ഏറ്റവും കുറഞ്ഞ മര്യാദയെങ്കിലും ചികിൽസിക്കുന്ന ആ പാവം ഡോക്ടർക്ക്‌ കൊടുക്കുക. നിങ്ങൾക്ക് അസുഖം മാറണം എന്ന് ഏറ്റവും കൂടുതൽ ആഗ്രഹിക്കുന്നത് നിങ്ങളെ ചികിൽസിക്കുന്ന ഡോക്ടർ തന്നെ ആയിരിക്കും, ഒരുപക്ഷേ നിങ്ങളെക്കൾ കൂടുതൽ.

Dr SHANAVAS A R

24/07/2019

24/09/2018

Do your symptoms interfere with your daily activities? Use the asthma severity assessment tool today to determine if you need to see a specialist. https://hubs.ly/H0dq6GG0

26/07/2018

26/07/2018