27/11/2018
شپږ (۶) خواړه، چې د معدې تیزابیت ختموي
زیاتره خلک وخت ناوخت د معدې د تیزابیت له ستونزې څخه زوریږي. د معدې د تیزابیت لاملونه ډیر دي، خو له حد نه زیات خوړل، بې وخته خوراک او د غذا ډول یې له اساسي لاملونو څخه شمیرل کیږي.
په دې لنډه لیکنه کې درسره د هغو خوړو لیست شریکوو، چې د معدې تیزابیت په کمولو او ختمولو کې مرسته کوي.
۱. شومړې: شومړې چې د لسي او تروو په نومونو هم یادیږي، کولای شي د معدې تیزابیت ختم کړي. له ډوډۍ خوړلو وروسته یو ګیلاس شومړې وڅښئ او په دې ډول د معدې د تیزابیت مخه ونیسئ.
۲. زیره: که چیرې د معدې له تیزابیت څخه ناراحته وئ، نو زیره استعمال کړئ. زیره د هاضمې سیسټم پیاوړی کوي او د غذا په هضمولو کې هم پوره مرسته کوي.
۳. د نعناع پاڼې: د نعنا (ویلني) پاڼې هم د خوراک په هضمولو کې مرسته کوي او ورسره د معدې تیزابیت ختموي. له خوراک څخه وروسته د نعنا یو یا دوه پاڼې وژوئ او د معدې تیزابیت مو تداوي کړئ.
۴. ادرک: ادرک کولای شي،د معدې تیزابیت کم او ختم کړي. همدارنګه د هاضمې سیسټم قوي کوي او د خوړو په هضم کې مرسته کوي.
۵. لاچي یا هیل: که چیرې د معدې له تیزابیت څخه ناراحته وئ، نو لږه لاچي په اوبو کې جوش کړئ او بیا یې وڅښئ. لاچي هم د خولې بوی ښه کوي او هم د معدې تیزابیت له منځه وړي.
۶. د مڼې جوس: د مڼې طبیعي جوس هم کولای شي، د معدې تیزابیت له منځه یوسي. ځینې نور خواړه هم شته، چې کولای شي د معدې تیزابیت ختم کړي. خو پورته ذکر شوي خواړه تر ټولو غوره ثابت شوي دي.
یادونه: که غواړئ د معدې له تیزابیت څخه په امن کې اوسئ، نو د خوراک اندازه، وخت او د خوړو ډول یا غذایي رژیم مو منظم کړئ.
