21/03/2023
السلام علیکم و رحمت الله برکاته !
د وزیر محمد اکبرخان روغتون کې د ۴۰ مېلیونه افغانیو په لګښت مختلفې څانګې افتتاح او ګټې اخستنې ته وسپارل شوې.
د عامې روغتیا وزارت مالي او اداري معین، مولوي محمد اسحق صاحبزاده او د روغتیايي عرضه خدماتو معین، مولوي حبیب الله اخندزاده د یوې غونډې په ترڅ کې د وزیر محمداکبرخان روغتون د رادیوفلوروسکوپي، کلچر، ریکوري او سټندرد عملیات خونې، نرس استېشن، ښځینه ارتوپیدي کلینیک، سپتیک څاه ګانې، امنیتي کمرې، پلې لارې، مسجد او د لېفټ سیستم افتتاح او ګټې اخستنې ته وسپاره.
د عامې روغتیا وزارت معینانو، د روغتیايي کارکوونکو نه ستړې کېدونکې هلې ځلې وستایلې او د وزیر محمداکبر خان روغتون د یاد شوو برخو پرانیستل او بیا ترمیم یې د روغتیايي عرضه خدماتو او د ناروغانو روغتیايي ستونزو د حل په برخه کې یو اغېزمن ګام وګاڼه.
همدارنګه د عامې روغتیا وزارت معینانو، ډاډ ورکړ چې د افغانستان اسلامي امارت د عامې روغتیا وزارت په هڅه کې ده؛ څو په هېواد کې د غوره او لا ډېرو روغتیايي خدماتو زمینه هېودوالو ته برابره کړي او په دې برخه کې هڅې روانې دي.
د یادونې وړ ده چې ددې روغتون د یادو شویو څانګو د جوړولو، بیاځلې ترمیم او تجهیز لګښت د افغانستان اسلامي امارت له داخلي بودیجې او همکارو موسسو له لورې ترسره شوي دي.
