21/05/2026
الحمدلله!
په ډېر ویاړ او خوښۍ سره دا زېرى له خپلو ګرانو هېوادوالو سره شریکوم چې زموږ په هېواد کې د لومړي ځل لپاره د غاړې د مصنوعي ډیسک (Artificial Disc Replacement - ADR) پرمختللې او نوې بڼې عملیات په بریالیتوب سره پیل شول.
دا عصري جراحي، چې د ProDisc-C Device یا Spacer په نومونو هم پېژندل کېږي، د غاړې د مهرهيي ستونزو لپاره له نويو او پرمختللو درملیزو لارو څخه شمېرل کېږي. دا طریقه ناروغانو ته دا امکان برابروي چې د غاړې طبیعي حرکات (Neck Motion Preservation) وساتل شي، او همدارنګه د نږدې فقراتو د تخریب او ناروغۍ (Adjacent Level Disease) مخه ونیول شي.
په دې عملیاتو کې ناروغ د غاړې په حرکتونو کې له کومې ستونزې سره نه مخ کېږي. بله مهمه ځانګړنه یې دا ده چې د غاړې په فقراتو کې د مصنوعي ډیسک د نصب پر مهال د پیچونو (Screws) اړتیا نه وي، او د پورته او ښکته فقراتو د تخریب مخه هم نیول کېږي؛ برعکس د ځینو نورو عملیاتو په څېر چې فقراتو ته زیان رسېږي.
د یادونې وړ ده چې دا ډول پرمختللي عملیات زموږ په نږدې ګاونډیو هېوادونو کې هم په محدود ډول ترسره کېږي، ځکه چې لګښت یې لوړ دی. خو اوس الحمدلله زموږ هېواد هم د عصري نیوروسرجري او د ستون فقرات د جراحۍ (Spine Surgery) په برخه کې د پام وړ پرمختګ کړی دی.
زموږ موخه دا ده چې د افغانستان د خلکو ترمنځ د Zero Profile Fusion او Artificial Disc Replacement (ADR) د پایلو او نتایجو ترمنځ یوه څېړنیزه پروژه ترسره کړو، ترڅو خپلو هېوادوالو ته لا معیاري، ګټور او نړیوالو معیارونو ته برابر عملیات وړاندې کړو.
موږ ژمن یو چې خپلو هېوادوالو ته د نړۍ له معیارونو سره سم، پرمختللي او باکیفیته طبي خدمتونه وړاندې کړو.
