12/03/2026
د ا.ا.ا د عامې روغتیا وزیر، ښاغلي مولوي نورجلال جلالي په خپل کاري دفتر کې د زړه ناروغيو درملنې اړوند پروژې له مسؤلینو سره لیدنه وکړه
په دې لیدنه کې چې د عامې روغتیا وزارت د مالي او اداري چارو مرستیال ښاغلي قاري عبدالولي صدیقي، د مالي چارو رئیس، د معالجوي طب لوی رئیس ، د تدارکاتو رئیس ، یو شمېر نورو مسؤلینو او د کابل د اندراګاندي د ماشومانو درملنې ملي روغتون د زړه ناروغيو درملنې څانګې روغتیايي کارکوونکو ګډون کړی و.
په ليدنه کې د قلبي پروژې مسؤلینو خپلې ستونزې، اړتیاوې او وړاندیزونه د عامې روغتیا له وزیر سره شریک کړل.
د عامې روغتيا وزير د هغوی وړاندیزونه او غوښتنې واورېدې او د اړوندو ریاستونو مسؤلینو ته یې لارښوونه وکړه چې د یادې پروژې اړتیاوې ژر تر ژره وڅېړي او د حل لپاره یې لازم اقدامات ترسره کړي.
ښاغلي وزير ټینګار وکړ، د عامې روغتیا وزارت هڅه دا ده چې نه یواځې په کابل کې، بلکې د هېواد په نورو ولایتونو کې هم د زړه ناروغيو اړوند خدماتو کچه لوړه او پراخه کړي، تر څو د هېوادوالو لپاره د روغتیايي ستونزو د حل په موخه لا زياتې اسانتياوې رامنځته شي.
همدارنګه، په دې ليدنه کې د موجودو ستونزو د ښې ارزونې او د خدماتو د پراختیا لپاره وړاندیز وشو، چې یوه ګډه تخنیکي کاري کمېټه جوړه شي.
د همدې وړاندیز پر بنسټ د اړوندو ریاستونو له استازو څخه یوه ګډه کمېټه جوړه شوه، تر څو د زړه ناروغيو اړوند خدماتو د پراختیا برخه کې لازمې چارې پر مخ یوسي.
