27/08/2025
څنګ ته يې ورغلم، وام څه کوې؟
وای درس لولم، وام خو ټولګۍ ته لاړه شه، وای ټولګۍ مو رنګېدلې، تر هغو چې ښوونکې ځای راته پيدا کوي، زه به خپل درس ولولم.
وام په راتلونکې کې به څه شی درڅخه جوړه شي؟
وای ډاکتره به شم،، نور به خلک نه مړه کېږي، زه به ښه دوا ورکوم، پيسې به هم نه ورڅخه اخلم.🥹
د يون صيب لاندې شعر هم ښه دی!
چې پیدا یې زه د ښکلو په مذهب کړم
نو به څله ناشکري له خپله رب کړم
د وږمو کلي کې ګرځم عطر پلورم
د ګلونو عبادت په خپل ادب کړم
حورې نه غواړم خو خدای باندې مین یم
زه د رب عبادت داسې بې مطلب کړم
د وجدان په دایره کې مې ژوندون دی
ضمیر دومره بې پروا له خپل نسب کړم
ما د ګلو خویندو ژوند په کې لیدلی
چې سبا او بېګاه چغې د مکتب کړم
چې وطن وي، مست اتڼ وي او سندرې
صبر که چې دا کارونه مرتب کړم
ربه دې کې به دې څومره لوی حکمت وی؟
چې پیدا دې لنډغرو ته غضب کړم
اوس په جار جانان ته وایم غاړه راکړه
وخته تا څومره ناوخته بې ادب کړم
یون یې هم د نېزه وړي په شان یووړ
ده خو وې د سېلابو مخه به ډب کړم.
۲۷/۵/۱۴۰۴
