19/07/2025
د طب پوهنځي د استادانو د ظرفیت لوړونې پنځه ورځنی روزنیز ورکشاپ پرانیستل سو
د بُست پوهنتون د طب پوهنځي د استادانو د مسلکي ودي او علمي ظرفیت لوړونې په موخه پنځه ورځنی روزنیز ورکشاپ پرانیستل سو.
د طب پوهنځي رئیس، ډاکټر زبیحالله انوري، د پرانیستې په مراسمو کې وویل:
"موږ هڅه کوو چې د رخصتیو له فرصت څخه علمي ګټه واخلو او د استادانو او متخصصو ډاکټرانو د مسلکي مهارتونو د پیاوړتیا لپاره دا اغیزمن پروګرام را پیل کړو."
نوموړي زیاته کړه، چې دا روزنیز ورکشاپ به د پنځو ورځو لپاره دوام وکړي، او ګډونوال به پکې په مهمو اکاډمیکو او تدریسي موضوعاتو زده کړې ترلاسه کړي.
د یاد ورکشاپ مهمې محوري موضوعات عبارت دي له:
• د استادانو انفرادي، عملیاتي پلان او د تطبیق راپور.
• د تدریسي کیفیت د ښه والي پلان او د تطبیق راپور.
• د محصل په مټ د استاد د خپل ځان د ارزوني ، تحلیل او راپور.
• د درسي کورس پالیسي چمتو کول.
• د لارښود استاد فعالیتونه .
د طب پوهنځی مسؤلین باور لري، چې دا ډول روزنیز پروګرامونه نه یوازې د تدریس د کیفیت د لوړوالي لامل ګرځي، بلکې د علمي پراختیا او مسلکي همغږۍ لپاره هم بنسټیز اهمیت لري.
د یادوني وړده چي دا ورکشاپ د طب پوهنځی د کیفیت د لوړاوي کمېټې له لوري چمتو سوی دی.
د خپرنیزو او فرهنګي چارو مدیریت
