11/08/2025
په پکتیکا ولایت کې دعامې روغتیا ریاست په انګړ کې د کتلوي معافیت لپاره دوه پوړیزه ودانۍ د جوړولو د بنسټ ډبره کېښودل شوه، په یادو مراسمو کې د عامې روغتیا وزارت د روغتیایې خدماتو د وړاندې کولو معین ښاغلی مولوي عبدالولي (حقانی)، دیاد ولایت والي ښاغلي مولوي عبدالخالق (عابد) او دعامې روغتیا ریاست رئیس یونیسف اداري او د روغتیا برخې ګڼو مسؤلینو ګډون درلود.
یاده دوه پوړیزه ودانۍ چې د عامې روغتیا وزارت په هڅو او د یونیسف اداري په مالي او تخینیکې همکارۍ چې شاوخوا دیارلس میلیونه افغانۍ لګښت او د شپږ میاشتو په موده کې به یې رغنیزې چاري پای ته ورسېږي..
د پکتیکا والي مولوي عبدالخالق عابد وویل «دا ولایت پراخه اراضي لري او خلک یې په روغتیا برخه کې لا ډیرو امکاناتو ته اړتیا لري.
نوموړی زیاتوي چې په شته خدماتو سربیره باید پکتیکا ته ځانګړې پاملرنه وشي»»
د عامې روغتيا وزارت د روغتيايې خدماتو وړاندې کولو معین مولوي عبدالولي حقاني وویل «په ټول توان هڅه کوي چې د هېوادوالو ستونزو او غوښتنو ته پر وخت ځان ورسوي او روغتيايې خدمتونه لا ډیر پیاوړي او معیاري کړي.
هغه د نوې ودانۍ جوړیدل په روغتیا برخه کې د شوې ژمنتیا برخه وبلله او دا څه یې د پکتیکا لپاره له حياتي کارونو څخه یاد کړل.
همدارنګه د عامې روغتیا وزارت د روغتیایې خدماتو معین او مل پلاوې د پکتیکا ولایت د ولایتې روغتون څخه لیدنه او ناروغانو د حال پوښتنه وکړه او په ورته مهال یې روغتیایې پرسونل ته لازمې سپارښتنې وکړي.
