30/10/2025
Sot, më 30 tetor, mbushen 44 vjet nga ndarja nga jeta e Dr. Stefan Gjonit (1906–1981)
Kujtojmë me respekt, mirënjohje dhe dashuri një nga figurat më të ndritura të mjekësisë shqiptare – mjekun që ia kushtoi tërë jetën shërbimit ndaj njerëzve dhe që mbetet një simbol i humanizmit në qytetin e Krujës.
Dr. Stefan Gjoni lindi në fshatin Dhërmi, në një familje të thjeshtë me tradita patriotike. Në moshën 14-vjeçare u largua drejt Shteteve të Bashkuara të Amerikës, ku u bashkua me të atin në Washington D.C. Pas përfundimit të shkollës së mesme në Emerson High School, ai vijoi studimet e larta në George Town Medical College dhe më pas në George Town Medical University, ku në vitin 1934 u diplomua si Medical Doctor (MD).
Pas diplomimit, Dr. Gjoni u kthye në Shqipëri, u martua në Sarandë, dhe pas një specializimi dyvjeçar pasuniversitar për të përshtatur formimin amerikan me sistemin europian, nisi punën si mjek në Tropojë, duke mbuluar edhe zonat e Prizrenit, Gjakovës dhe Pejës.
Në vitin 1939 u transferua në Kukës, ndërsa gjatë luftës italo-greke shërbeu në Gjirokastër, Peqin, Kavajë, e më pas në Krujë, ku do të mbetej deri në fund të jetës.
Nga viti 1945, Dr. Gjoni shërbeu me përkushtim në qytetin dhe rrethin e Krujës. Ai udhëtonte çdo javë për të vizituar pacientët në Milot, Mamurras, Laç dhe Fushë-Krujë, duke punuar me pasion dhe përulësi. Ishte gjithmonë në lëvizje, ditë e natë, pranë çdo pacienti që kishte nevojë për ndihmë.
Punoi për vite me radhë me një ekip të shkëlqyer profesionistësh si Mustafa Paja, Qazim Saja, Petrit Saliaga, Kamber Kovaci, Maliq Shullazi dhe Ali Halili – emra që qyteti i Krujës i ruan me nderim.
Dr. Gjoni ishte i dashur për njerëzit, i thjeshtë në sjellje, dhe shpesh shihej në biseda miqësore me qytetarët te dyqani i Faj Rames, tek kafja e Xak Menecit, apo te nallbani Hoxha.
Ai e deshi Krujën si shtëpinë e tij dhe zgjodhi që edhe prehja e fundit të ishte këtu, në këtë tokë që e mirëpriti me dashuri.
🕊️ Dr. Stefan Gjoni u nda nga jeta më 30 tetor 1981, duke lënë pas një kujtim të paharruar dhe një trashëgimi shpirtërore që vazhdon të jetojë në çdo krutan.
Sot, Spitali i Krujës mban me krenari emrin e tij – “ Dr. Stefan Gjoni” – dhe Këshilli Bashkiak i Krujës e ka nderuar me titullin e lartë “Qytetar Nderi i Krujës”.
Në kujtim të tij, i ndjeri Ing. Vasil Gjoni i kushtoi këto vargje prekëse:
_Në short të jetës plot lavdi,
Në viset tona veriore,
Dr. Gjoni, vetëm ti,
I thure vetes përmendore_.
I paharruar qoftë kujtimi Dr. Stefan Gjonit!
Një jetë e tërë në shërbim të njeriut!
