23/12/2025
Tradita vashdon!
Prej më shumë se dy dekadash jemi pranë banorëve të shtëpisë së motrave të Nënë Terezës jo thjesht fizikisht por me shpirt e zemër. “Fondacioni Fëmijët Shqiptar” bëri bashkë në prag të festave të fundvitit aktoren e madhe Roza Anagnosti, e cila vjen për të dytin vit, përfaqësuesit grupit Eurosig-Insig-UBA Bank” si dhe drejtues të qendrës rajonale për autizmin në Farkë, për të përcjellë vëmendje dhe dashuri për të moshuarit që marrin shërbim në këtë shtëpi .
Drejtuesja e “Fondacionit Fëmijët Shqiptar” Dr. Liri Berisha shprehu mirënjohjen për motrat e Nënë Terezës në lidhje me sakrificat dhe mundin e përditshëm që ato bëjnë për të moshuarat në nevojë dhe pa kujdes familjar. Ajo e cilësoi ardhjen në këtë shtëpi një mision që çdokush që ka mundësi duhet ta përmbushë pa hezitim duke e trashëguar këtë traditë edhe tek më të rinjtë. Kujdesi ndaj njërëzve në nevojë është modeli më i arrirë që duhet të transmetohet – u shpreh ajo.
Në pamundësi për të qënë vetë prezent, drejtuesi i grupit “Eurosig-Insig- UBA Bank” Z.Kadri Morina u përfaqësua nga drejtori i marketingut të këtij grupi Blerim Bytyçi. Ai tha se misionet e bamirësisë së grupit të drejtuar nga Z.Morina për institucione të ndryshme humanitare kudo nëpër Shqipëri janë bërë pjesë e pandarë e punës së përditshme dhe fokusi i tij janë vatra të tilla si kjo shtëpi e motrave të Nënë Terezës ku nevoja për mbështetje është jetike. Z.Morina më herët ka kontribuar edhe në vendosjen e statujës së Nënë Terezës në Brazil.
“I kemi borxh edhe Nënë Terezës jo vetëm për atë perandori bamirësie që ajo ka ngritur por edhe për trashigiminë që na ka lënë, këto motra të mrekullueshme që kujdesen për ju”- u shpreh zoti Bytyçi duke premtuar në emër të grupit “Eurosig-Insig-UBA Bank” vijimësinë e mbështetjes për këtë strehë.
E madhja Roza Anagnosti e cila zgjodhi që daljen e saj të parë publike pas humbjes së bashkëshortit ta bëjë pikërisht në këtë strehë të njerëzve në nevojë tha se ardhja në shtëpinë e motrave të Nënë Terezës nuk është vetëm një mision human dhe dashamirës ndaj banorëve që strehohen aty, por edhe një përmbushje e madhe shpirtërore për vetë atë, e cila duke u takuar dhe komunikuar me ta gjen forcën dhe gëzimin për të vijuar përpara. Me vargjet e poetit dhe misionarit At Gjergj Fishta “N’ty mendoj kur agon drita, kur bylbyli mallshëm kndon” , aktorja Anagnosti përcolli emocione shumë të ndjera të zonjat e strehuara në këtë shtëpi.
Një nga banoret e kësaj strehe në emër të të gjithëve, përmes kartolinave të dedikuara, shprehu mirënjohjen ndaj Dr. Liri Berishës dhe aktores Roza Anagnosti që nuk harrojnë të sjellin pak gëzim në këtë shtëpi dhe vëmendje materiale për nevojat e tyre duke i bërë ditët e tyre më të lehta.
Në fund të kësaj vizite, në kudër të festave u shpërndanë rreth 50 pako me dhurata, të mbështetura falë bujarisë së grupit “Eurosig-Insig-UBA Bank”
