02/12/2025
Սոնոգրաֆիկ հետազոտության ժամանակ մասնագետները հաճախ են հանդիպում լեղապարկի պոլիպները և դա անհանգստացնում է մարդկանց:
Պետք է նշել, որ լեղապարկի պոլիպները հայտնաբերվում են պատահաբար, իրենք կլինիկորեն դրսևորում չունեն, ասել է թե՝ չեն առաջացնում որևիցե գանգատ։
Գրականության մեջ նշվում է , որ պոլիպները կարող են առաջանալ լեղապարկի բորբոքումների, սխալ սննդակարգի հետևանքով, ինչպես նաև գենետիկ նախատրամադրվածության, բայց հաճախ, առաջացման որևէ պատճառ չի նշվում և նրանք, որպես կանոն կարող են հայտնաբերվել ինչպես առանց ախտաբանական փոփոխությունների լեղապարկում, այնպես էլ բորբոքումների և քարերի ֆոնին, որից էլ կախված կարող ենք տարբերակել պոլիպների ենթատեսակները՝ խոլեստերինային , բորբոքային /լորձաթաղանթների ծալքավորումներից առաջացած/ և իրական-հյուսվածքային պոլիպներ։
Պոլիպների սոնոգրաֆիկ պատկերը տարբերվում է լեղաքարային կոնկրեմենտներից իր էլաստիկությամբ/առանց ակուստիկ ստվերի/, թելանման ձևով, առպատային ֆիքսացիայով։ Հանդիպում են ինչպես եզակի , այնպես էլ բազմաթիվ քանակով;
Պետք է նշել, որ նրանք առավել հաճախ հանդիպում են տղամարդկանց մոտ /35-45տ տարիքային խմբում/;
Պոլիպների առաջին վտանգը չարորակացման ռիսկն է, որը վերաբերում է առանձնակի հյուսվածքային պոլիպներին, հատկապես եթե նրանց չափերը հասնում են 1սմ և ավելի։
Մյուս վտանգը՝ խոլեսթերինային պոլիպներինն է, որոնք կարող են պոկվել պատից և խցանելով լեղապարկի վզիկը՝ առաջացնել լեղու արտահոսքի խանգարում , որը պատճառ կդառնա մեխանիկական դեղնուկի։
Պոլիպների ռադիկալ բուժումը միայն վիրահատական է՝ լեղապարկի հեռացմամբ։
Պոլիպը հայտնաբերելուց հետո մշակում եմ դինամիկ հսկման ժամանակացույց՝ կախված պոլիպի չափերից ու քանակից և ամիսների ընթացքում պաթոլոգիկ աճ արձանագրելու դեպքում՝ բուժառուին ուղղորդում վիրաբույժի կոնսուլտացիայի։
Այսքանը՝ ձեզ շատ հուզող պոլիպի մասին։
Առողջ եղեք և մի անտեսեք պրոֆիլակտիկ զննումները։
