19/02/2026
Մասնագիտական մտորումներ և ոչ միայն:
Տարիներ առաջ, երբ դեռ շատ երիտասարդ էի, նեղ մասնագիտական վերապատրաստման էի Եվրոպայի ամենից առաջադեմ օնկոգինեկոլոգիական կենտրոններից մեկում, որտեղ մշակվում էին օնկոգինեկոլոգիայի առաջատար ուղեցույցները: Մի օր վիրաբուժական բաժանմունքի վարիչն ինձ հարցրեց, թե ինչ մասնագետ եմ (նկատի ուներ քիմիոթերապև՞տ, թե՞ վիրաբույժ) և քանի՞ տարվա փորձ ունեմ: Երբ ասացի, որ 4 տարի է, ինչ բժիշկ եմ աշխատում, նա ինձ ընդհատեց` ասելով, որ փաստորեն քիմիոթերապևտ եմ: Ասացի` ոչ, վիրաբույժ եմ, նա կրկին ինձ ընդհատեց` ասելով. Vous n’êtes pas médecin, vous êtes chirurgien. Թարգմանաբար նշանակում է` Դուք բժիշկ չեք, դուք վիրաբույժ եք: Հասկանալու համար այս խոսքերը, պետք է ծանոթ լինել եվրոպական բժշկական կրթական մեխանիզմներին, որպեսզի պատկերացնեք, թե ինչ դժվար ճանապարհ է անցնում վիրաբույժը աշխատանքի իրավունք ստանալու համար, և ինչ տարբերություն կա վիրաբույժի և ոչ վիրաբուժական պրոֆիլի մասնագետների միջև (որևէ կերպ չեմ նսեմացնում ոչ վիրաբույժ իմ կոլեգաների անչափ կարևոր գործը, առանց որի վիրաբույժները չեն կարող աշխատել): Բժշկի համար ակադեմիկ ճանապարհորդությունն ունի կարևոր կենսական նշանակություն, հատկապես մեր երկրում:
Տարբեր դպրոցներով անցնելը, տարբեր վիրտուոզ վիրաբույժների գործը տեսնելն ու սովորելը ինձ համար բացե ին մի կարևոր ճշմարտություն. ես ինքս ինձ վիրաբույժ գինեկոլոգ կհամարեմ միմիայն այն պարագայում, եթե հավասարաչափ, կրկնում եմ, հավասարաչափ և ազատ աշխատեմ ինչպես բաց և լապարոսկոպիկ, այնպես էլ տրանսվագինալ եղանակներով, և ամեն պարագայում տիրապետեմ տվյալ մուտքի հնարավոր ծավալներին: Խնդիրը պարզ էր, լուծումները ևս: ԵՒ մոտ վեց տարի առաջ վերջիվերջո նպատակիս հասա: Ճանապարհը, ինչ խոսք, բարդ էր և խորդուբորդ: Այս ճանապարհին դու մենակ ես, ինքդ քեզ հետ, ժամանակ, միջոցներ, ամեն ինչը գնում է քեզանից, բայց ոչինչ ու ոչ-ոք չէր կարող խանգարել ինձ, եթե ես կայացրել եմ որոշում: Գուցե մի քիչ ուշ, այլ վայրում, այլ պայմաններում, բայց ես պիտի հասնեի իմ նպատակին: Հիմա, երբ լապարոսկոպիկ սակրոկոլպոլևատորոպեկսիաները կամ տրանսվագինալ ՍՍ-ֆիքսացիաները դարձել են ամենօրյա գործ, հետ եմ նայում, և հիշում, որ տարիներ առաջ ես չէի էլ երազում, որ այս ամենը հնարավոր է այսքան կարճ ժամանակահատվածում:
Ասածս ինչ է, հավատացեք Ձեզ, երբեք մի նահանջեք և լսեք միայն Ձեր ներքին ձայնին, մնացածն ընդամենը ժամանակի հարց է:
Նկարը գեներացված է ԱԲ-ի կողմից` տեքստի հիման վրա։
