15/11/2022
«World Keratoconus day in Armenia» ակնաբուժական գիտաժողով
Նոյեմբերի 10-ին «Հոլիդեյ ԻՆՆ» հյուրանոցի կոնֆերանս դահլիճում, Երիտասարդ ակնաբույժների հայկական ասոցիացիայի և Համահայկական ակնաբույժների ասոցիացիայի համատեղ նախաձեռնությամբ, առաջին անգամ Հայաստանում անցկացվեց «World Keratoconus day in Armenia» ակնաբուժական գիտաժողովը:
Կերատոկոնուսի համաշխարհային օրվան նվիրված 1-ին գիտաժողովի հանդիսավոր բացմանը ներկա էին ՀՀ առողջապահության նախարարի տեղակար Արմեն Նազարյանը, ԱԱԻ-ի տնօրեն Ալեքսանդր Բազարչյանը:
Միջոցառման մասնակիցներին ողջունեց ՀՀ ԱՆ Ակնաբանության գծով խորհրդատու, ԱԱԻ-ի Աչքի հիվանդությունների ամբիոնի վարիչ, Երևանի գլխավոր ակնաբույժ, AYO Armenia և PAO Armenia-ի նախագահ, բ․գ․դ․, պրոֆեսոր Արտաշես Զիլֆյանը: Պրոֆեսորը նշեց, որ գիտաժողովը կոչված է միավորելու աշխարհի լավագույն ակնաբույժների փորձն ու գիտական ձեռքբերումները՝ կուրության հանգեցնող կերատոկոնուս հիվանդության բուժումն առավել արդյունավետ դարձնելու, ակնաբուժության ոլորտի վիրաբուժական նորագույն տեխնոլոգիաները ներկայացանելու և դրանք բժշկական պրակտիկա ներգրավելու գործում:
Շուրջ 20 բանախոսների թվում էին նաև եվրոպական առաջատար կլինիկաների ճանաչված մասնագետներ, ովքեր մեծ ներդրում ունեն ակնաբուժության ոլորտի զարգացման գործում:
Գիտաժողովին մասնակցում էին նաև Առողջապահության ազգային ինստիտուտի Աչքի հիվանդությունների ամբիոնի կլինիկական օրդինատորները, որոնց համար «World Keratoconus day in Armenia» –ն արտերկրի ու տեղի լավագույն ակնաբույժների փորձին հաղորդակից դառնալու բացառիկ հնարավորություն էր, ինչն անհետևանք չի մնա որպես մասնագետ նրանց կայացման գործում:
