Piruza Simonyan Neuro

10/12/2024

Բուժում ենք դիրքային գլխապտույտն առանց դեղորայքի:

14/12/2023

ՀԻՇՈՂՈՒԹՅԱՆ ՎԱՏԱՑՈՒՄ
⠀
Երիտասարդ հասակում հիշողության վատացման և կոնցենտրացիայի խանգարման պատճառ հաճախ լինում են.
1. Աշխատանքի և հանգստի բալանսի խախտումը
2. Տագնապային և դեպրեսիվ խանգարումները
3. Հիպոթիրեոզը
4. Երկաթի և/կամ B12 վիտամինի դեֆիցիտը
5. Տոքսիկ էնցեֆալոպաթիաները (ալկոհոլի և/կամ թմրանյութերի օգտագործման հետևանքով զարգացած)
6. ՄԻԱՎ վարակը։
⠀
Մեծահասակ տարիքում՝
1. Հիշողության ֆիզիոլոգիական վատացումը
2. Ալցհեյմերի հիվանդությունը
3. Անոթային դեմենցիան։
⠀
Ցանկացած դեպքում, հիմնական հիվանդության բուժմանը զուգահեռ, անհրաժեշտ է կոգնիտիվ թրեյնինգ՝ հիշողությունը ամրապնդող պարապմունքներ, օր.՝ նոր լեզու սովորել, խաչբառներ լրացնել, կարդալ, շա՜տ կարդալ:
⠀
Միայն այս ամենը կնպաստի նոր նեյրոնային կապերի ստեղծմանը, և ոչ թէ «հիշողության համար» կիրառվող դեղերը՝ այսպես կոչված նոոտրոպները կամ ուղեղի արյան շրջանառությունը լավացնող դեղերը: Ոչ մի գիտական հետազոտություն չի ապացուցել նրանց ներթափանցումը հեմատոէնցեֆալիկ բարիերով և, հետևաբար, ապացուցված չէ նրանց արդյունավետությունը հիշողության լավացման գործընթացում:
⠀
Մեր օրգանիզմը չի ծախսում էներգիա մի բանի վրա, ինչը մենք չենք «օգտագործում»: Օր.՝ եթե երկար տարիներ մարզասրահ հաճախող մարզիկը դադարի այցելել մարզասրահ, ապա նրա մկանային զանգվածը կնվազի, նույնն էլ գլխուղեղի աշխատանքի պրոցեսում է. եթե մենք մեր ուղեղը չենք «ծանրաբեռնում» նոր ինֆորմացիայով, այն աստիճանաբար սկսում է «ալարել» աշխատել:
⠀
Bonus ✨
Memini.ru կայքում կարող եք ստուգել հիշողությունը և գտնել կոգնիտիվ թրեյնինգի վարժություններ:
⠀
Առողջ եղե՛ք:
⠀

11/10/2023

ՀՂԻՈՒԹՅՈՒՆ ԵՎ ՄԻԳՐԵՆ
⠀
Միգրեն ունեցող կանանց մեծամասնության մոտ հղիության ընթացքում ցավային նոպաները լինում են հազվադեպ կամ ընդհանրապես չեն զարգանում: Սակայն որոշ կանանց մոտ կարող է դիտվել լրիվ հակառակ պատկեր:
⠀
Եթե մինչ հղիությունը ընդունել եք որոշակի դեղորայք, ապա հղիության ընթացքում միգրենի թերապիան պետք է վերանայել. հղիության ժամանակ թույլատրելի դեղերի քանակը խիստ սահմանափակ է:
⠀
Շատ կարևոր է հղիության ընթացքում ուշադրություն դարձնել կենսաձևին: Գլխացավեր կարող են առաջանալ հոգնածությունից, քնի խանգարումից, էմոցիոնալ գերլարվածությունից, ջրազրկումից և այլն: Խուսափել դրանցից ձեզ կօգնի գլխացավի օրագիրը:
⠀
Եթե այնուամենայնիվ զարգացել է գլխացավ, ապա փորձեք կիրառել ոչ դեղորայքային մեթոդներ՝ քայլք մաքուր օդին, շնչառական գիմնաստիկա, հանգիստ, քուն, մեկ բաժակ սուրճ կամ թեյ, ինչպես նաև Cefaly սարքի միջոցով վերակնային նյարդի ստիմուլյացիա (նկ.2):
⠀
Եթե ցավը պահպանվում է, ապա կարելի է ընդունել Պարացետամոլ, որը համարվում է ամենաանվտանգ դեղը, որ կարելի է ընդունել հղիության ժամանակ։
⠀
Ինչ վերաբերում է տրիպտաններին, ապա դրանք հղիության ժամանակ ցուցված չեն, քանի որ չկան հետազոտություններ դրանց անվտանգության վերաբերյալ:
⠀
Ծանր և հաճախակի գլխացավերի դեպքում դեղորայքի չարաշահումից խուսափելու հաշար հարկավոր է դիմել բժշկի՝ պրոֆիլակտիկ թերապիա սկսելու համար:
⠀
Առողջ եղե’ք:
⠀

11/10/2023

28/05/2023

ԶԱՐԿԵՐԱԿԱՅԻՆ ԳԵՐՃՆՇՈՒՄ ԵՎ ԳԼԽԱՑԱՎ
⠀
Երբ մարդն ունենում է գլխացավ, հաճախ առաջին հերթին չափում է զարկերակային ճնշումը: Նախկինում կար տարածված կարծիք, որ զարկերակային ճնշման բարձրացումը գլխացավի հիմնական պատճառն է: Սա այլևս հնացած միֆ է: Սակայն ամեն ինչ այդքան միանշանակ չէ:
⠀
Ըստ տարբեր հետազոտությունների` գլխացավ զարկերակային ճնշման (ԶՃ) բարձրացման պատճառով առաջանում է միայն այն ժամանակ, երբ ԶՃ-ն գերազանցում է 180 մմ ս.ս.` սիստոլիկը (վերին ցուցանիշ) կամ 120 մմ ս.ս.` դիաստոլիկը (ստորին ցուցանիշ): Այս դեպքում իսկապես գլխացավի պատճառը զարկերակային բարձր ճնշումն է, գլխացավն էլ երկրորդային է, այսինքն՝ այլ հիվանդության հետևանքով առաջացած:
⠀
Սակայն Հաճախ դիտվում է նկարագրվածի հակառակ պատկերը: Հենց գլխացավն է հանդիսանում ԶՃ-ի բարձրացման պատճառ: Եվ ընդհանրապես, ցանկացած ցավ կարող է բարձրացնել ԶՃ-ն մինչև 30 մմ ս.ս.։ Այս պարագայում ԶՃ-ն կվերադառնա նախնական մակարդակին, երբ գլխացավի էպիզոդն անցնի:
⠀
Գիտնականներն ամբողջ աշխարհում, անթիվ հետազոտություններ կատարելիս, եկել են այն եզրակացությանը, որ եթե զարկերակային ճնշումը չի գերազանցում 180/120 մմ ս.ս., այն չի կարող հանդիսանալ գլխացավի պատճառ, և նման դեպքերում պետք է փնտրել գլխացավի այլ պատճառներ: Հաճախակի հանդիպող պատճառներից են՝ լարվածության գլխացավը և միգրենը:
⠀
Իսկ թե ինչու է գլխացավն անցնում հիպոթենզիվ հաբ ընդունելուց հետո, ապա այն պատձառով, որ այդ դեղերից շատերն ունեն հակացավային էֆեկտ և նույնիսկ օգտագործվում են որոշ գլխացավերի պրոֆիլակտիկ բուժման կոմպլեքսում:
⠀
Խորհրդատվության գրանցվելու համար գրել անձնական նամակ:
⠀

06/05/2023

ՄՇՏԱԿԱՆ ՀՈԳՆԱԾՈՒԹՅՈՒՆ
⠀
Հոգնածություն առավոտյան արթնանալի՞ս, խամրած հայա՞ցք, գլխացավե՞ր, հյուծվածությու՞ն, հիշողության խանգարու՞մ: Այս վիճակի հիմնական պատճառը հաճախ խրոնիկական հոգնածության համախտանիշն (ԽՀՀ) է:
Այս համախտանիշի պատճառը հայտնի չէ, սակայն կան բազում տեսություններ. իմունային, հորմոնալ, գենետիկ, դեպրեսիա և այլն:
⠀
Հիմնական ախտանշաններն են`
- Մշտական հոգնածության զգացում առնվազն 6 ամսվա ընթացքում կամ հոգնածության պարբերական զգացողություն, որը ծանրաբեռնվածության հետևանք չէ, և այս ամենը չի անցնում հանգստից հետո
- ախտանշանների վատթարացում մտավոր կամ ֆիզիկական աշխատանքից հետո
- գիշերային լիարժեք քնից հետո հոգնածության զգացում
- քնկոտություն օրվա ընթացքում, քնելու անկարողություն գիշերը
- հաճախակի գլխացավեր առանց դրանց առաջացման օբյեկտիվ պատճառների
- անբացատրելի մկանային ցավ
- հիշողության վատացում և կենտրոնացման իջեցում
- հաճախակի ինֆեկցիոն հիվանդություններ և այլն:
⠀
Ներկայումս ԽՀՀ-ի հստակ ձևավորված բուժում, ցավոք, չկա: Հետազոտությունները կատարվում են զանազան երկրներում: Բուժումն ուղղված է առանձին ախտանշանների մեղմացմանը` կյանքի որակը բարելավելու, աշխատունակությունը բարձրացնելու նպատակով:
⠀
Սակայն մշտական հոգնածության դիմակի տակ կարող են թաքնված լինել ոչ միայն "հոգու", այլ նաև մարմնի հիվանդություններ: Այդ թվում`
- երկաթի դեֆիցիտ (նաև` լատենտ)
- զանազան պատճառագիտության անեմիաներ
- սրտաբանական հիվանդություններ
- դեպրեսիա
- քնի և արթունության ռեժիմի խանգարում
- լյարդի, երիկամների, վահանաձև գեղձի հիվանդություններ
- շարակցական հյուսվածքի զանազան հիվանդություններ
- մկանային համակարգի առաջնային հիվանդություններ
⠀
Այդ իսկ պատճառով, վերը նշված գանգատների դեպքում պետք է ժխտել այլ օրգան-համակարգերի տարբեր հիվանդությունները:
⠀
7 կարևոր փաստ, որոնք պետք է գրավեն ձեր ուշադրությունը խրոնիկական հոգնածության դեպքում. Թերթի՛ր:
⠀
Հետևե’ք իմ էջին, կիսվե’ք ընկերների հետ ավելի տեղեկացված լինելու համար:
⠀
Խորհրդատվության գրանցվելու համար գրել անձնական նամակ:
⠀

26/04/2023

Էլեկտրոնեյրոմիոգրաֆիա (ԷՆՄԳ)
⠀
- նեյրոֆիզիոլոգիական հետազոտություն է, որի նպատակն է մկանների և պերիֆերիկ նյարդերի ֆունկցիոնալ վիճակի գնահատումը:
⠀
ԷՆՄԳ-ն հնարավորություն է տալիս գնահատելու պերիֆերիկ նյարդա-մկանային կառույցների ախտահարումը, ախտահարման բնույթը և մակարդակը:
⠀
Տարբերում են հետազոտության 2 մեթոդ`
⠀
- ստիմուլյացիոն` էլեկտրական իմպուլսի միջոցով կատարվում է նյարդի ակտիվացում, գրանցվում և ուսումնասիրվում է մկանների և պերիֆերիկ նյարդերի բիոէլեկտրական ակտիվությունը
⠀
- ասեղային` միանգամյա օգտագործման հատուկ ասեղների միջոցով, որոնք մտցվում են մկանների մեջ, հետազոտվում է նյարդաթելերի և մկանների շարժողական միավորների բիոէլեկտրական ակտիվությունը:
⠀
Մեթոդի ընտրությունը կատարվում է բժշկի կողմից` կախված պացիենտի վիճակից:
⠀
Հետազոտության ցուցումներն են`
- թունելային համախտանիշներ (օրինակ` դաստակի թունելային համախտանիշ)
- մոնո- և պոլինեյրոպաթիաներ
- մկանների տարբեր հիվանդություններ
- ռադիկուլյար համախտանիշ, նյարդային հյուսակների ախտահարում (պլեքսոպաթիաներ)
- նյարդա-մկանային հաղորդակցման խանգարումներ (միասթենիա, միասթենանման համախտանիշներ)
- մոտոնեյրոնի հիվանդություններ
- էքստրապիրամիդալ հիպերկինեզներ
⠀
Ուրախ եմ տեղեկացնել, որ վերջերս անցել եմ նեյրոֆիզիոլոգիական այս հետազոտության ուսուցումը և պատրաստ եմ ողջ գիտելիքներս և ներուժս ներդնել ձեզ է՛լ ավելի առողջ տեսնելու համար:
⠀
Հետևե’ք իմ էջին, կիսվե’ք ընկերների հետ ավելի տեղեկացված լինելու համար:
⠀

08/04/2023

ՔՆԻ ԿԱԹՎԱԾ
⠀
Այսօր եկել եմ պատմելու մեր ուղեղի մի շատ հետաքրքիր ու «միստիկ» հատկության մասին։
⠀
Քնի ժամանակ մարդու գլխուղեղը պարալիչի է ենթարկում մեր մկանները։ Հնչում է, համաձայն եմ, փոքր ինչ տարօրինակ, սակայն այս երևույթը ինքնանպատակ չէ և ունի գիտական բացատրություն. մկանները ռեֆլեկտոր կերպով ենթարկվում են պարալիչի, որպեսզի մենք չկարողանանք շարժվել երազներ տեսնելու ժամանակ և չարթնանանք այդ շարժումների պատճառով: Այդ իսկ պատճառով է, որ, երբեմն, երբ մարդն արթնանում է, չի կարողանում անմիջապես շարժվել։ Պարադոքսալ է, բայց փաստ:
⠀
Քնի կաթվածը ոչ մի հիվանդության հետևանք չէ և կյանքին կամ առողջությանը չսպառնացող երևույթ է: Սակայն, երբ այն պատահում է առաջին անգամ, շատերի մոտ ծնում է վախ և դառնում տագնապի առաջացման պատճառ:
⠀
Հանկարծակի արթնանալու դեպքում ուղեղը դեռ չի հասցնում «արթնացնել» մկանները, և մարդը չի կարողանում ներշնչել: Սովորաբար պացիենտներն այս երևույթը նկարագրում են այսպես` «կարծես մեկը նստած լինի կրծքավանդակիս»:
⠀
Քնի կաթվածի ժամանակ կարող են լինել նաև ձայնային և տեսողական հալյուցինացիաներ: Օրինակ՝ մարդ կարող է տեսնել տարբեր ուրվականներ, «չար» ոգիներ, լսել վհուկների ձայներ և այլն:
⠀
Ի՞նչ անել քնի կաթվածի դեպքում.
1. Փորձե՛ք հանգստանալ և գիտակցել, որ կյանքին սպառնացող ոչ մի երևույթ տեղի չի ունենում:
2. Փորձե՛ք շարժել ձեռքերի կամ ոտքերի մատները, ինչ-որ բան արտաբերել: Դա կօգնի մարմինը դուրս բերել պարալիզացված վիճակից:
3. Եթե կա քնի խանգարում, փորձե՛ք կարգավորել քնի և արթունության ռեժիմը։
4. Պրոֆիլակտիկայի նպատակով խորհուրդ է տրվում քնել ոչ թե մեջքի, այլ կողքի կամ փորի վրա։
⠀
Ըստ վիճակագրության՝ մարդկանց 7%-ը բախվում է քնի կաթվածի հետ:
Իմ պրակտիկայում ես դեռ չեմ հանդիպել այս երևութի հետ, միգուցե դա կախված է նրա հետ, որ այս մասին շատերը չգիտեն և պատճառը փնտրում են ոչ գիտական ու միստիկ աղբյուրներում:
⠀
Իսկ դուք ծանո՞թ եք այս երևույթին, հետաքրքիր է իմանալ ☺️
⠀
Հետևե’ք իմ էջին, կիսվե’ք ընկերների հետ ավելի տեղեկացված լինելու համար:
⠀

19/03/2023

Ի՞նչ արժե բժիշկ դառնալը
Մաս 2
⠀
Ռուսաստանում փորձաշրջանիս առաջին հերթապահության ժամանակ, հերթապահ բժիշկների՝ նյարդաբանի, ռեանիմատոլոգի, սրտաբանի հետ չկարողացանք փրկել թոքերի 85% ախտահարմամբ (COVID-19-ի հետևանքով) և գլխուղեղի արյան շրջանառության սուր խանգարումով պացիենտի կյանքը: Պացիենտի սիրտը կանգնեց ձեռքերիս տակ՝ սիրտ-թոքային վերակենդանացում կատարելիս: Երբ ռեանիմատոլոգը արդեն ասում էր, որ իմաստ չկա շարունակելու, ես դեռ շարունակում էի…
⠀
Իմ պարտականությունների մեջ էր մտնում հայտնել հարազատներին այդ բոթը: Հավատացե՛ք, կյանքիս ամենադժվար պահերից էր:
⠀
Այդ օրվանից սկսած ամեն հերթապահության ժամանակ «բախվում էի» մահվան հետ:
Ամեն հերթապահության ժամանակ հայտնում էի հարազատներին ծանր լուրը:
Ամեն հերթապահության ժամանակ լսում էի. «Ինձ ճիշտն ասեք, ես մահանում եմ», «Խնդրում եմ, մի դեղ ներարկեք և տանջանքներիս վերջ տվեք»:
⠀
Վերադառնալով ուսանողական տարիներին, հիշում եմ պաթոլոգիկ անատոմիայի ցիկլերը: Այնպես էր ստացվել, որ մեր ուսման բազան մանկական պաթանատոմիական կենտրոնն էր, և մենք ամեն օր տեսնում էինք բալիկների կտրված կյանքեր:
⠀
Այս ամենը չէր կարող չփոխել յուրաքանչյուրիս աշխարհայացքները, վերանայել վերաբերմունքը կյանքի նկատմամբ:
⠀
Համաձայն վիճակագրության՝ բժիշկները բախվում են դեպրեսիայի հետ ավելի հաճախ, քան հիմնական բնակչությունը: Համաշխարհային ուսումնասիրությունների վերջին 3 մետա-անալիզները ցույց են տվել դեպրեսիայի առկայություն
բժշկական համալսարանի ուսանողների 27%-ի մոտ և պրակտիկ բժիշկների մինչև 60%-ի մոտ:
⠀
Յուրաքանչյուր բժիշկ անցնում է անսահման բարդ ուղի, մինչև արժանանա սպիտակ խալաթ կրելուն և պատվով կրելու բժիշկ կոչումը: 🤍