30/06/2024
🔥 ՀԱՐՑԱԶՐՈՒՅՑ ՀՆԱՐԱՎՈՐ ՄԱՐԴԱ․ՍՊԱՆԻ ՀԵՏ (առաջիկա գրքիցս մի հատված)
Գիտեք, երեխաները ավելի շատ են զգում ու հասկանում, քան մեծահասակները կարծում են։ Երեխանե՛րն են իրական ապրում, իսկ մեծահասակները հասարակության ճնշման տակ, միայն իմիտացնում են, որ ապրում են։ Գրեթե բոլոր մեծահասակ մարդիկ ունեն իրենց ստվերային կողմը։
Դա այն սև կողմն է, որը պետք է թաքցնել, ճնշել, որ չերևա, այն է, որ շատ գաղտնի է ու միայն քեզ է պատկանում, բայց դու էլ ես վախենում այնտեղ նայել։ Այնտեղ հիմնականում ճնշված հույզեր են, հատկապես ատելություն կամ զայրույթ, նախանձ կամ փառասիրություն, այնտեղ սեռական ճնշված կամ այլ ցանկություններ են ու այնպիսի ֆանտազիաներ, որոնք հասարակության կողմից ընդունելի չէ։
Այդ չընդունման պատճառով անձը ճնշում է, որպեսզի ոչ մի կերպով չդրսևորվի ու այն դառնում է ստվերդ, քո սև կողմը։ Դա այն ամենն է, որին հասարակությունը ամոթով ու մեղադրանքով է դիմավորում, հալածվում է ու պատժվում, այդ իսկ պատճառով անձը ամեն գնով փորձում է ճնշել ու թաքցնել, ինչպես հասարակությունից, այնպես էլ ինքն իրենից։
Նա շատ հաճախ նույնիսկ ամաչում է մտածել այդ մասին։ Բնականաբար նա ճշնում է իր ստվերային կողմին, բայց որքան ուժգին, այդքան ուժգին էլ ստվերն է հակադարձում ու հաճախ առաջանում է ներքին լարվածություն։ Դա քո անձի մի մասն է, դա դու ես, բայց դա հասարակության ուղիղ ու անուղղակի ճնշման արդյունքում այնքան անցանկալի կողմ է դառնում, որ ստիված թաքցնում ես։
Խնդիրն այն է, որ դու ինքդ քեզանից շատ հեռու չես փախչի երկար ժամանակով ու ստվերդ սկսում է քեզ հետապնդել։ Դու նրան ցանկանում ես, բայց այն վտանգավոր ու պատժաբեր է։ Շատ ժամանակ դրա մեջ տեսնում ես քո ամենաիրական հատվածները, որտեղ դու դու ես, իսկ ներկա, հասարակության համար ընդունելի ես-դ դու չես, այն հասարակության ցանկություն է, հասարակական դեր է, որը պահում ես, քանի որ այն հարմար է հասարակության մեջ ադապտացվելու համար, բայց իրական ես-դ ստվերային կողմն է։
Դու ամբողջ կյանքդ ապրում ես այն թաքցնելով, այն թուլություն կամ բացասական կողմ համարելով, բայց և՛ դրա դրսևորման ու ապրման կարիքը զգալով և՛ մի օր կյանքումդ հայտնվում է մի մարդ, ով քեզ համոզմում է, որ հանդիպես ստվերիդ հետ։
Նա քեզ ապացուցում է, որ դու հենց այդ ստվերային կողմն ես, որ դա ոչ թե թուլություն է, այլ առավելություն, ոչ թե ամոթ է, այլ հպարտություն, ոչ թե ցածրություն է, այլ վեհություն և դու կարող ես վերջապես հանդիպել այդքան գաղտնի քողարկած կողմիդ հետ, ապրել այն, կյանքը տեսնել ու զգալ դրանով և լինել այն։
Դու հասկանում ես, որ կարող ես ամբողջ կյանքիդ կուտակած հուզական էներգիան դուրս հանել ու զգալ, դրանով ապրել ու վայելել։ Դու դադարում ես ամաչել, վախենալ, մեղավոր զգալ, քեզ թույլ համարել, անկարող լինել, քեզ սահմանափակել ու կարողանալ այլոց աչքերին նայել։
Այլ կերպ ասած դու հասարակության կարծիքով միացնում ես քո միջի փսիխոպատին, որը քո հիմնական մասն է եղել, միացնում ես նրան ու նա աջակցում է քեզ ապրել, ապրել լիարժեք ու անմնացորդ, վերաջապես լինելով ինչ կաս, այլ ոչ այն, ինչ հասարակությունը քեզնից սպասում է։
Պատկերացրեք, թե ինչ նշանակություն կունենա այն մարդը քեզ համար, ով քեզ ծանոթացրել ու մտերմացրել է քո ստվերային կողմի հետ։ Ով դրանով քեզ ոչ միայն ազատել է ամբողջ կյանքիդ հոգեբանական կապանքներից, այլ նաև դրանով իսկ տվել է լիարժեքության զգացում և շնչելու հնարավորություն։
Նա քեզ համար դառնում է ամեն ինչ, քանի որ քո դիմաց բացում է անմնացորդ կյանքի դռները։ Դու նրա համար պատրաստ ես ամեն ինչի։
🔥 Գիրքը հոգեբանական-դետեկտիվ-թրիլեր ժանրի է, կարծում եմ այն ֆիլմի սցենարի կվերածվի։
✅Կիսեք նյութը, եթե հետաքրքիր էր։
