23/07/2025
💛Լույսն ու 🖤ստվերը ուրոլոգի աշխատանքում
Մտորումներ մի մասնագիտության մասին, որ հաճախ մնում է լռության մեջ... և դա այդպես է, շատ մարդիկ չգիտեն ինչ է ուրոլոգիան և իրականում չեն էլ պատկերացնում, թե ինչպիսի մեծուժ ու հոգեբանական պատրաստություն է պահանջվում ուրոլոգ լինելու համար...
Մարդկային մարմինը տարածություն է, որտեղ լույսն ու ստվերը մշտապես համատեղ գոյակցում են։ Որոշ օրգաններ ուշադրության կենտրոնում են, սիրելի թեմա՝ առողջության մասին խոսելիս։ Իսկ որոշները մնում են ստվերում, բայց նույնքան կենսական են։ Ուրոլոգիան հենց այդ «ստվերոտ» մասնագիտություններից է, որը աննկատ պահում է կյանքի որակը՝ հաճախ ուղղակի բառացիորեն։
Մարդիկ չեն սիրում խոսել ու բարձրաձայնել ուրոլոգիական խնդիրների մասին, խոսել, որ հաղթահարել են ուրոլոգիական մահաբեր հիվանդությունը... լինում են իրավիճակներ, երբ հասարակության լայն շրջանակներում՝ ճանաչելով ամաչում են բարևել իրենց բուժած ու իրենց կողքին եղած ուրոլոգին, չէ որ ամոթ է ուրոլոգիական խնդիր ունենալը,,💔
Որպես ուրոլոգ՝ ես ամեն օր բախվում եմ ոչ միայն բժշկական ախտորոշումների, այլ նաև հոգեբանական պատնեշների հետ։ Ամոթը, լռությունը, սպասումը, վախը։ Բայց հենց այդ լռության խորքում է հայտնվում վստահության ամենաճիշտ պահը՝ երբ մարդը թույլ է տալիս քեզ մտնել իր անհանգստության էպիկենտրոն, ներթափանցել իր հոգու խորք, գտնել տագնապի կամ վախերի բանալին և պտտել այն ճիշտ ուղղությամբ՝ բացելով դեպի առողջություն միտված դուռը...
Մենք բուժում ենք օրգաններ, որոնք արտահոսքի, զտման, հավասարակշռման համակարգերն են։ Բայց ավելի խորքում՝ մենք օգնում ենք մարդկանց նորից վստահել իրենց մարմնին, իրենց ուժին և ցույց տալ, որ ամեն ինչ դեռ առջևում է և որ օրգանիմզը դեռ պայքարում է ու դեռ պայքարելու է... Եվ դա արդեն մաքուր բժշկություն չէ՝ դա մարդկային հոգատարություն է, որը ձևավորվում է փորձից, զգայունությունից ու երբեմն՝ նաև անձնական ցավից։
Ես ուրոլոգ եմ։ Իմ գործի նպատակը միայն հիվանդությունը վերացնելը չէ, իմգործի նպատակը մարդու սեփական մարմնի՝ մոռացված, անտեսված, բայց կենսական հատվածների հետ կապի վերականգնումն ու ամրապնդումն է...
Եվ երբեմն, իսկ միգուցե նաև միշտ դա շատ ավելի մեծ բուժում է, քան կթվա իրականում...
Միշտ Ձեր՝
բ.գ.թ. Նարեկ Րաֆֆիի Մելքոնյան
