ՀԱՀ «Ձեռներեցներ առողջապահության ոլորտում» ծրագիր/ AUA EIH Program

01/04/2026

ՀԱՀ ՁԱՈ ծրագիրը շարունակաբար ընդլայնում է իր կրթական նախաձեռնությունները՝ քայլելով համընթաց առողջապահական ոլորտում իրականացվող բարեփոխումներին։

Սույն թվականի մարտի 24-ին մեկնարկել է «Բուժօգնության որակի կառավարման հիմունքներ» դասընթացը ՁԱՈ գործող շահառուների և մարզային բժշկական կենտրոնների որակի ապահովման պատասխանատուների համար։

09/02/2026

Սույն թվականի փետրվարի 7-ին տեղի ունեցավ ՀԱՀ ՁԱՈ ծրագրի թերապևտ մենթորների և թերապևտիկ ծառայություններ մատուցող շահառուների միջև հերթական հանդիպումը, որի ընթացքում մենթոր Բժ․ Արա Աճէմեանը և ծրագրի համակարգող Աստղիկ Աթանանը ներկայացրեցին մոտիվացիոն հարցազրույցի հիմնական դրույթներն ու հմտությունները։ Մոտիվացիոն հարցազրույցը բժիշկների համար կարևոր հաղորդակցական հմտություն է, որն օգնում է աջակցել այցելուներին՝ բացահայտելու իրենց ներքին մոտիվացիան և քայլ առ քայլ փոխելու առողջությանը վնասող վարքագիծը։

09/02/2026

ՀԱՀ ՁԱՈ ծրագիրը շարունակում է ձեռք բերել միջազգային ճանաչում․ ծրագրի շրջանակում պատրաստված մի շարք գիտահետազոտական ամփոփագրեր ընդունվել և ներկայացվել են Հանրային առողջապահության եվրոպական 16-րդ, 17-րդ և 18-րդ համաժողովներին։

Ավելին՝

Թրփանճեան առողջապահական գիտությունների ֆակուլտետի «Ձեռներեցներ առողջապահության ոլորտում» ծրագիրը շարունակում է ձեռք բերել միջազգային ճանաչում։

03/02/2026

ՀԱՀ Ժիրայր և Փաթրիշա Թրփանճեան առողջապահական գիտությունների ֆակուլտետն (ԹԱԳՖ) աջակցում է մարզային բժշկական կենտրոնների բուժօգնության որակի պատասխանատուների վերապատրաստմանը բուժօգնության որակի ոլորտում, ինչպես նաև՝ վերոնշյալ հաստատությունների ղեկավար տնօրենների վերապատրաստմանը առողջապահության ոլորտում ձեռներեցության ուղղությամբ։ Սա հնարավոր է դարձել շնորհիվ ԹԱԳՖ-ի լայնածավալ գիտահետազոտական, կրթական և ներդրման փորձին բուժօգնության որակի և ձեռներեցության ոլորտներում, մասնավորապես՝ «Ձեռներեցներ առողջապահության ոլորտում» ծրագրի շրջանակում։

Ավելին՝

Այս նախաձեռնությունը կարևոր նշանակություն ունի Հայաստանում բուժօգնության որակի ոլորտում ֆորմալ կրթության բացակայության պայմաներում։

30/01/2026

Սույն թվականի հունվարի 23-ին ՁԱՈ ծրագրի հերթական խումբը ներկայացրեց մասնակիցների կազմած Բիզնես գաղափարների իրականացման գործառնական ծրագրերը փորձագետներին։

16/12/2025

ՀԱՀ ՁԱՈ ծրագիրը շարունակում է շահառուների և մենթորների միջև հանդիպումները, որոնց ընթացքում քննարկվում են մասնագիտական թեմաներ և կլինիկական դեպքեր, ինչպես նաև մասնակիցները և մենթորները փոխանակվում են փորձով։

Սույն թվականի դեկտեմբերի 13-ին տեղի ունցավ թերապևտ մենթորների հետ հանդիպումը, որի ժամանակ քննարկվեցին մետաբոլիկ համախտանիշի ժամանակ սեմագլյուտիդի կիրառման մոտեցումները, իսկ դեկտեմբերի 15-ին կայացավ ատամնաբույժների հանդիպումը, որի ժամանակ քննարկվեց բրուքսիզմը և դրա հետևանքները։

16/12/2025

ՀԱՀ ՁԱՈ ծրագրի հերթական խումբն ավարտեց կրթական բաղադրիչը և ավարտին հասցրեց իրենց Բիզնես գաղափարների իրականացման գործառնական ծրագրերը, որոնք իրենցից ներկայացնում են բիզնես ծրագրի և որակի ապահովման ծրագրի համակցում։

02/12/2025

ՁԱՈ ծրագիրը հրապարակել է Հայաստանի գյուղական համայնքներում երեխաների բերանի խոռոչի առողջության վերաբերյալ հետազոտության արդյունքները

Հոդվածն արտացոլում է կարիեսի և ատամնափառի բարձր տարածվածությունը տարրական դասարանների աշակերտների շրջանում, ինչպես նաև՝ բացասական կապը երեխաների ատամնափառի ցուցիչի և ծնողների՝ բերանի խոռոչի առողջության վերաբերյալ գիտելիքների միջև։ Դա նշանակում է` որքան բարձր է բերանի խոռոչի առողջության վերաբերյալ ծնողի գիտելիքների մակարդակը, այնքան առողջ են երեխայի ատամները։

Ավելին՝

Նախագիծը մեկնարկել է 2022 թվականին, երբ ՁԱՈ ծրագրի աջակցությամբ Արմավիրի մարզի Մրգաշատ գյուղում հիմնվեց մանկական ատամնաբուժական ծառայություն։

01/12/2025

ՀԱՀ ՁԱՈ ծրագրի կողմից 2 գիտական ամփոփագիր ներկայացվել է սույն թվականի նոյեմբերի 12-14-ը Հելսինկիում կայացած Հանրային առողջապահության եվրոպական 18րդ համաժողովին և տպագրվել Հանրային առողջապահության եվրոպական ամսագրում:
Ավելին՝
https://newsroom.aua.am/2025/11/26/tchs-delegation-fogarty-fellows-participate-european-public-health-conference/

22/09/2025

Սույն թվականի սեպտեմբերի 16-ին մեկնարկեց ՀԱՀ ՁԱՈ ծրագրի հերթական կրթական բաղադրիչը, որը ներառում է ձեռներեցության և բուժօգնության որակի վերաբերյալ դասընթացներ։ Կրթական բաղադրիչի արդյունքում մասնակիցները զինվում են առողջապահության ոորտի ձեռներեցին անհրաժեշտ կարևոր գիտելիքներով և հմտություններով, և իրենց բիզնես-գաղափարը վերածում մանրամասն գործառնական ծրագրի։

30/07/2025

Հայաստանի ամերիկյան համալսարանի «Ձեռներեցներ առողջապահության ոլորտում» ծրագիրն աջակցում է ոլորտի ձեռներեցներին հիմնել կամ ընդլայնել իրենց մասնավոր առողջապահական ծառայությունը ՀՀ մարզայի փոքր քաղաքներից կամ գյուղական համայնքներից որևէ մեկում՝ այդպիսով լրացնելով որակյալ առողջապահական ծառայությունների բացը տվյալ համայնքում։